ކިތަންމެ ބޮޑު ކުއްޔެއް ދޭން ބުންޏަސް ބޭރު ގައުމެއްގެ ސިފައިން ބައިތިއްބަން ދިވެހި ފަސްގަނޑުން ޖާގައެއް ނެތް: މުއިއްޒު
ކިތަންމެ ބޮޑު ކުއްޔެއް ދޭން ބުންޏަސް ބޭރު ގައުމެއްގެ ސިފައިން ބައިތިއްބަން ދިވެހި ފަސްގަނޑުން ޖާގައެއް ނެތް ކަމަށް ޕީޕީއެމްގެ ނައިބު ރައީސް އަދި ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ވިދާޅުވެއްޖެއެވެ.
މުއިއްޒު މިހެން ވިދާޅުވީ ރާއްޖޭގައި ތިބި އިންޑިއާ ސިފައިން ބޭލުމަށް ގޮވާލާ މީސް މީޑިއާގައި އާންމު ރައްޔިތުން ޝުއޫރު ފާޅުކުރަމުން ދާ ދަނޑިވަޅެއްގައެވެ.
ޑރ.މުއިއްޒު ވިދާޅުވީ އިގްތިސާދީ ގޮތުން ގައުމާ ރައްޔިތުން ބަނޑަށް ޖެހި ގޮތް ހުސްވެފައި ތިއްބާ އާމްދަނީ އެއް ލިބޭނެ ގޮތެއް ހުށަހެޅިގެން ދިއުމުން ނޫނެކޭ ބުނަން އުނދަގޫވާނެ ކަމަށެވެ.
"ނަމަވެސް ކިތަންމެ ބޮޑު ކުއްޔެއް ދޭން ބުންޏަސް ބޭރު ގައުމެއްގެ ސިފައިން ބައިތިއްބަން ދިވެހި ފަސްގަނޑު އެންމެ އަކަ އިންޗިއެއްވެސް ކުއްޔަށް ނުދެމާތޯ." މުއިއްޒު ވިދާޅުވިއެވެ.
ރައީސް އޮފީހުގެ ތަރުޖަމާނު އިބްރާހިމް ހޫދު ވިދާޅުވީ ރާއްޖެއަކު އިންޑިއާ ސިފައިންނެއް ނެތް ކަމަށެވެ. ހޫދު މިހެން ވިދާޅުވި ނަމަވެސް އައްޑޫ ސިޓީގައި އަދި ލ.ކައްދޫގައި އިންޑިއާ ސިފައިން އޮޕަރޭޓު ކުރާ ދެ ހެލިކޮޕްޓަރު އޮވެއެވެ. އަދި އެ ދެއަތޮޅުގައި ވެސް އިންޑިއާ ސިފައިން ތިބޭ ކަމަށް މަޢުލޫމާތު ލިބިފައިވެއެވެ.
