ކޮވިޑް-19: ތިނަދޫ ބޯޓުން އިތުރު މީހަކު ފައްސި ވެއްޖެ
ގދ. ތިނަދޫ އާއި މާލެ އާއި ދެމެދު ދަތުރުކުރާ "ދެރަހަ" ބޯޓުން އިތުރު މީހަކު ކޮވިޑަށް ފައްސި ވެއްޖެއެވެ.
މިފަހަރު ފައްސި ވެފައިވަނީ ފުރަތަމައަށް އެބޯޓުން ފައްސިވީ މީހާގެ ކޮންޓެކްޓެއް ކަމަށް މައުލޫމާތު ލިބިފައިވެއެވެ.
އޮންލައިން ނޫސް "ސަން" އިން ބުނެފައިވަނީ ދެވަނައަށް ފައްސިވީ މީހާ ހުރީ އެބޯޓުގައި ކަރަންޓީނު ގައި ކަމަށާއި އޭނާ ރަށުތެރެއަށް ފައިބާފައި ނުވާ ކަމަށް ތިނަދޫ ކައުންސިލުގެ ރައީސް އަލީ އަމްޖަދު ވިދާޅުވެފައިވާ ކަމަށެވެ.
މިހާރު އެމީހާގެ ކޮންޓެކްޓް ޓްރޭސިންގ ހަދަމުންދާ ކަމަށް ވެސް އަމްޖަދު ވިދާޅުވިއެވެ.
ތިނަދޫ އިން ފުރަތަމަ ފައްސިވީ މީހާގެ ކޮންޓެކްޓް ޓްރޭސިންގުން 41 މީހަކު ދެނެގަނެވިފައި ވެއެވެ. އޭގެތެރޭގައި "ދެރަހަ" ބޯޓުގެ ނުވަ މީހަކު ވެސް ހިމެނެއެވެ.
އެބޯޓަކީ އަތޮޅު ތެރޭ އެހެން ރަށްތަކަށް ވެސް ދަތުރު ކުރި ބޯޓެކެވެ. އެގޮތުން އެ ބޯޓު ގާތްގަނޑަކަށް ހަތަރު ނުވަތަ ފަސް ރަށަކަށް ޖެއްސި ކަމަށް އަމްޖަދު ވިދާޅުވި އެވެ.
ތިނަދޫއިން ފުރަތަމަ ފެނުނު ކޭސް އާއެކު، އެ ރަށް މޮނިޓަރިންގެ ހާލަތަށް ގެންގޮސް، ރަށަށް އަރާ ފޭބުން ވަނީ މަނާކޮށްފައެވެ.
