ޕީޕީއެމް އަދި ޕީއެންސީގެ ބައެއް އިސްވެރިންނަށް އިލެކްޝަން ކޮމިޝަނުން ނަސޭހަތް ދީފި
އިދިކޮޅު ޕްރޮގްރެސިވް ކޮންގްރެސް ކޯލިޝަންގެ ބައެއް އިސް ފަރާތްތަކަށް އިލެކްޝަން ކޮމިޝަނުން ނަސޭހަތް ދީފިއެވެ.
ގާނޫނާ ޚިލާފަށް ކުރިއަށް ގެންދިޔަ ސިޔާސީ ހަރަކާތެއްގައި ޕީޕީއެމް އަދި ޕީއެންސީ ގެ ބައެއް އިސްވެރިން ބައިވެރިވެފައިވާތީ، އެކަން ދެވަނަފަހަރަށް ތަކުރާރު ނުކުރުމަށް އެދި އިލެކްޝަން ކޮމިޝަނުން ނަސޭހަތް ދީ އިލެކްޝަން ކޮމިޝަނުން މިއަދު ވަނީ ޓުވީޓެއް ކޮށްފައެވެ.
ހަމައެއާއިއެކު ޕީޕީއެމް އަދި ޕީއެންސީގެ ބައެއް އިސްވެރިންނަށް އީސީން ނަސޭހަތްތެރި ވެފައިވާއިރު، އެ ދެ ޕާޓީ 75000 ރުފިޔާއިން އިއްޔެގެ ވަގުތެއްގައި ވަނީ ޖޫރިމަނާ ވެސް ކޮށްފައެވެ.
އިލެކްޝަން ކޮމިޝަނުން ވިދާޅުވާ ގޮތުގައި، ޕީޕީއެމް އަދި ޕީއެންސީ 75000 ރުފިޔާއިން ޖޫރިމަނާ ކޮށްފައިވަނީ, ސިޔާސީ ޕާޓީގެ ގާނޫނާއި، އެެއްވެ އުޅުމުގެ ގާނޫނާއި، އާންމު ސިއްހަތު ރައްކާތެރި ކުރުމުގެ ގާނޫނުގެ ދަށުން އެޗްޕީއޭ އިން ކަނޑައެޅިފައިވާ ގައިޑްލައިނާއި ތަކުރާރުކޮށް ޚިލާފުވުމުގެ ސަބަބުންނެވެ.
މިދިޔަ ހުކުރު ދުވަހު އިދިކޮޅުން ބޭއްވި ސައިކަލު ބުރުގައި މި ދެޕާޓީން ބައިވެރިވެ އެޗްޕީއޭ ގެ މިންގަނޑާއި ޚިލާފުވެފައިވާ މައްސަލަ ފުލުހުން މިހާރު އަންނަނީ ބަލަމުންނެވެ.
އެ މައްސަލައާއި ގުޅިގެން ކުރީގެ ރައީސް ޑރ. މުހައްމަދު ވަހީދާއި، އެ ދެ ޕާޓީގެ ލީޑަރޝިޕްގެ ބައެއް އިސް ބޭފުޅުން އިއްޔެއާއި މިއަދު ވަނީ ފުލުހަށް ހާޒިރުކޮށްފައެވެ.
މިދުވަސްވަރަކީ ރާއްޖޭގައި ހަލުވި ކަމާއެކު ކޮވިޑު-19 ފެތުރެމުންދާ ދަނޑިވަޅެއްކަމުން ރާއްޖޭގެ ރައީސުލް ޖުމްހޫރިއްޔާ އިބްރާހިމް މުހައްމަދު ޞާލިހުވެސް މިކަން ވަނީ ކުށްވެރިކުރައްވާފައެވެ.
އދިކޮޅުން ރާއްޖޭގެ އެކި ރަށްތަކުގައި، މިދިޔަ ހުކުރު ދުވަހު ވަނީ ސަރުކާރާއި ދެކޮޅަށް މުޒާހަރާތައް ބާއްވާފައެވެ.
