ޑޮލަރު ރޭޓް ދަށްވިކަމަށް ބުނެ ސަރުކާރުން ހަދަނީ ދޮގު: ސޯލިހު

ޑޮލަރު ރޭޓް ދަށްވި ކަމަށް ބުނެ ސަރުކާރުން އަންނަނީ ރައްޔިތުންނަށް އޮޅުވާލަމުން ކަމަށާއި، އެއީ ހުސް ދޮގު ވާހަކަ ކަމަށް ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.

Ads by Hajj Corporation

މިރޭ މާފަންނު އުތުރު ދާއިރާއަށް އެމްޑީޕީގެ ޓިކެޓުގައި ވާދަކުރައްވާ އިފްހާމް ހުސެއިންގެ ކެމްޕޭން ޖަގަހައިގައި ވާހަކަފުޅު ދައްކަވަމުން ސޯލިހު ވިދާޅުވީ، މިހާރު ޑޮލަރު ރޭޓަކީ 17.50 ކަމަށާއި، މިއީ މި ވޭތުވެދިޔަ ކޮންމެ އަހަރަކުވެސް ޖަނަވަރީ އިން ފެށިގެން އެޕްރީލް މަހުގެ ނިޔަލަށް ޑޮލަރު ރޭޓް ހުންނަވަރު ކަމަށެވެ.

މިދިޔަ އަހަރު ޑޮލަރު ރޭޓު ހުރި ގޮތުގެ ވާހަކަ ދައްކަވަމުން ވިދާޅުވީ، 2023 އަހަރުގެ މިދުވަސްވަރު ޑޮލަރު ރޭޓަކީ 16.70 ލާރިކަމަށެވެ. އަދި މިދިޔަ އަހަރުގެ ރަމަޟާން މަހު ޑޮލަރު ރޭޓަކީ 16.20 ލާރި ކަން ފާހަގަކުރައްވާ ސޯލިހު ވިދާޅުވީ، މިއީ ރާއްޖެއަށް އެންމެ ގިނައިން ފަތުރުވެރިން އަންނަ ދުވަސްވަރުކަމަށްވެފައި، މިއީ ތަބީއީގޮތުން ރާއްޖޭގެ ރެވެނިއު އެންމެ މަތިވާ ދުވަސްވަރުކަމުން އާންމުކޮށްވެސް ޑޮލަރުގެ ރޭޓު ދަށްވާ ކަމަށެވެ.

ބޭނުންވަނީ މި ރޭޓުގައި ވީހާވެސް ދަށްކޮށް ޑޮލަރު ލިބޭގޮތަށް ހުރުން. އެހެން ވެއްޖެއްޔާ ރަނގަޅު. އެކަމަކު ރައްޔިތުންނަށް އޮޅުވާލައިގެން މާބޮޑެތި މަސައްކަތެއް ކޮށްދީގެން ޑޮލަރު ދަށްކުރީކަމަށް ހެދީމަ ރަނގަޅެއް ނޫން. އެ ހަދަނީ ދޮގު، އޮޅުވާލަނީ

ޑޮލަރުގެ ރޭޓްއާ ގުޅޭ ގޮތުން ސޯލިހު ވާހަކަ ދައްކަވާފައިވަނީ ވިދާޅުވެފައިމިވަނީ, ރާއްޖޭގައި ޑޮލަރުގެ އަގު ހަމަޖެހި، އަގު ދަށަށް ދާން ފަށައިފި ކަމަށް އިކޮނޮމިކް މިނިސްޓަރު މުހައްމަދު ސައީދު އިއްޔެ ވިދާޅުވެފައި ވަނިކޮށެވެ.

ސައީދު އިއްޔެ ވިދާޅުވީ، ފާއިތުވި ނޮވެންބަރު މަހުގައި ރާއްޖެއަށް ކުރިމަތިވެފައި އޮތް ދަތި ހާލަތުން މިހާރު މަޑުމަޑުން ރާއްޖެ އަރައިގަންނެ، ޑޮލަރުގެ އަގު ދަށްވަމުންދާ ކަމަށެވެ. އަދި ކުރިއަތްއޮތްތާ ޑޮލަރުގެ އަގު އިތުރަށް ދަށަށް ދާނެ ކަމަށް އެބޭފުޅާ ލަފާކޮށްފައިވެއެވެ.