ބޭރު ސިފައިން ދޯނިތަކަށް އެރީ މިސް ކޮމިއުނިކޭޝަނެއްގެ ސަބަބުން: މިނިސްޓަރު
ރާއްޖޭގެ އިގްތިސާދި ހާއްސަ ސަރަހައްދުގެ ތެރޭގައި މަސްވެރިކަމަށް ނިކުމެ އުޅުނު ދޯނިތަކަށް އިންޑިއާ ސިފައިން އެރީ އެ މަސް ބޯޓުތަކުގައި ސެޓެލައިޓް ފޯނުން ބޭނުންކުރާތީވެ ކަމަށް ޑިފެންސް މިނިސްޓަރު ޢައްސާނު މައުމޫން މިއަދު ވިދާޅުވެއްޖެއެވެ.
ބޭރުގެ ސިފައިން ދިވެހި މަސްބޯޓުތަކަށް އެރި މައްސަލާގައި މިއަދުގެ ރައްޔިތުންގެ މަޖިލީހުގެ ޖަލްސާއަށް ޢައްސާނު ހާޒިރުކޮށް، މެންބަރުން ވަނީ ސުވާލުކޮށްފައެވެ. ޢައްސާނުއާ ސުވާލުކުރަން ހުށަހެޅުއްވީ ހެންވޭރު ހުޅަނގު ދާއިރާގެ މެންބަރު ހަސަން ލަތީފެވެ. ހަސަން، އޮޅުންފިލުއްވަން ބޭނުންވީ އެކަން ހިނގާފައިވާ ގޮތް މަޖިލީހަށް ސާފުކޮށްދެއްވުމަށެވެ.
އެ ސުވާލުގެ ޖަވާބުގައި ޑިފެންސް މިނިސްޓަރު ވިދާޅުވީ އިންޑިއާގެ ކޯސްޓުގާޑުގެ ސިފައިން އެރީ ހއ ކެލާގެ އިރު އިތުރުން 72 ނޯޓިކަލް މޭލުން، ރާއްޖޭގެ އީއީޒެޑްގައި މަސްވެރިކަން ކުރަން އުޅުނު އަސުރުމާ3، މާހޯރަ3 އަދި ނިރު7 އަށް ކަމަށެވެ.
އިންޑިއާގެ ކޯސްޓުގާޑުން އެ ތިން މަސް ދޯނި އެއްތަނަކަށް ގެންދިޔަ ކަމަށާއި ދޯނިތަކަށް އެރީ އިންޑިއާގެ ކޯސްޓުގާޑުގެ ދެ އުޅަނދެއްގެ ސިފައިން ކަމަށް ވިދާޅުވިއެވެ. އެއީ އައިސީޖީއެސް ''އަރިޔާމަން 252'' އަދި އައިސީޖީއެސް ''އަނާ 246'' ނަމަކަށް ކިޔާ ދެ ބޯޓު ކަމަށް މިނިސްޓަރު ވިދާޅުވިއެވެ.
ތިނަދޫ ދެކުނު ދާއިރާގެ މެންބަރު އަބްދުﷲ ސަނީފް ކުރެއްވި ސުވާލަކަށް ޖަވާބު ދެއްވަމުން ޢައްސާން ވިދާޅުވީ އެކަމާއި ގުޅިގެން އެއްކުރެވުނު މައުލޫމާތުތަކުން ކަށަވަރުވާ އެއް ކަމަކީ ދޯނިތަކަށް އިންޑިއާ ސިފައިން އޮޕަރޭޝަނެއް ހިންގީ 'މިސް ކޮމިއުނިކޭޝަން' ގެ ސަބަބުން ކަމަށެވެ.
ޓީމުން އެރީ ސެޓެލައިޓް ފޯނު އެ ދޯނިތަކުގައި ބޭނުންކުރާތީ އެ ހުރިތޯ ކަށަވަރަކުރަން، މަސްވެރިންގެ އަތުގައި ހުރި ފޯނުތައް، ސެޓެލައިޓް ފޯނު ބޭނުންކުރަތީ އެއީ އެމީހުން ގަބޫލުކުރާ ގޮތުގައި ގަވާއިދާ ހިލާފުކަމެއް ކަމަށް ބުނެ ބޯޑުކުރީ
މިނިސްޓަރު ވިދާޅުވީ އިންޑިއާގެ ސަރަހައްދަށް ގެނެވުނު ބަދަލާއެކު ސިފައިންނަށް ހީވޭފައި އޮތީ ރާއްޖޭގައިވެސް މަސްވެރިން ސެޓަލައިޓް ފޯނު ބޭނުންކުރުން މަނާކަން ކަމަށެވެ. އެއީ ރާއްޖޭގައި މަނާކޮށްފައިވާ ކަމެއް ނޫން ކަމަށް ވިދާޅުވިއެވެެ.
އެފަދަ ހާދިސާތައް ތަކުރާރުވެ ނުދިޔުމަށްޓަކައި ކުރެވޭނެ ކަމަކީ ކޮބައިތޯ މެދު ހެންވޭރު ދާއިރާގެ މެންބަރު އަލީ އާޒިމް ސުވާލުކުރެއްވުމުން މިނިސްޓަރު ވިދާޅުވީ އިތުރަށް ކުރެވޭނެ ކަމަކީ މި ސަރަހައްދުގައި ހަރަކާތްތެރިވާ ކޯސްޓުގާޑު ތަކާއި ނޭވީތަކާއި 'ލިއާޒޯން' އިތުރުކުރުން ކަމަށެވެ.
''ހަގީގަތުގައި އެ ވަސީލަތްތައް އެހެރީ ގާއިމުވެފައި ރާއްޖޭގައިވެސް އެބަހުރި ވިލިގިލީގައިވެސް އަޅުގަނޑުމެންގެ ކޯސްޓުގާޑުން ހަރަކާތްތެރިވާއިރު ބޭނުންކުރާނީ އިމަޖެންސީ ނަންމަބަރުތަކެއް'' ޢައްސާން ވިދާޅުވިއެވެ.
