ފުލުހަށް ހުށަހެޅޭ މައްސަލަތަކުގެ އަޕްޑޭޓް 14 ދުވަހުން ބެލޭ ގޮތް ހަދަނީ
ފުލުހަށް ހުށަހެޅޭ މައްސަލަތަކުގެ އަޕްޑޭޓް ކޮންމެ 14 ދުވަހަކުން ބެލޭނޭ ނިޒާމެއް ގާއިމުކުރުމުގެ މަސައްކަތް ކުރައްވަމުންދާ ކަމަށް ކޮމިޝަނާ އޮފް ޕޮލިސް އަލީ ޝުޖާއު ވިދާޅުވެއްޖެއެވެ.
ދައުލަތުގެ މީޑިއާ، ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުން މިދިޔަ އަހަރުގެ ޑިސެމްބަރު މަހު ޕޮލިސް ކޮމިޝަނަރަކު ކަމަށް އައްޔަންކުރި ޝުޖާއު ވިދާޅުވީ، ފުލުހުންނަށް ހުށަހެޅޭ މައްސަލަތަކަށް ''ވާނުވާ'' ނޭގެ މައްސަލަ އަކީ ރައްޔިތުންގެ މެދުގައި އަބަދުވެސް އޮންނަ ކަންބޮޑުވުމެއް ކަމަށެވެ. އޭގެ ޝަކުވާ ވެސް ލިބެމުންދާ ކަމަށް ވިދާޅުވިއެވެ.
އެ އިދާރާއަށް ހުށަހެޅޭ މައްސަލަތަކުގައި އާއްމުންގެ ދެކޭ ގޮތާއި ގުޅޭ ގޮތުގެ ތަޖުރިބާ ފޯރަމްތައް ދޭތެރެ ދޭތެރެއިން ބާއްވައެވެ. އޭގެ ފޯރަމެއް މިދިޔަ އަހަރުވެސް ބޭއްވިއެވެ.
'' އެ ފޯރަމްގައިވެސް މިކްސް ރެސްޕޮންސެއް ލިބުނު'' އޭނާ ވިދާޅުވިއެވެ.
ޝުޖާއު ވިދާޅުވި ގޮތުގައި ގިނަ ފަހަރު މައްސަލަތައް ކުރިއަށް ދަނީ ފުލުހުންގެ އިސް މީހަކަށް ނުވަތަ އެ ތަނުގައި އުޅޭ ރަހުމަތްތެރިއަކަށް ގުޅައިގެން ކަމަށް ގިނަ ބަޔަކު ބުނެފައިވާ ކަމަށެވެ. އެެގޮތަށް ދެކޭ ދެކުނު ބަދަލުކުރަން ޖެހޭ ކަމަށް ވިދާޅުވިއެވެ.
ފުލުހުންނަށް ހުށަހެޅޭ ހުރިހާ މައްސަލަ އަކީ ވެސް އާއްމު ރައްޔިތު މީހާ އަށް މުހިއްމު މައްސަލައެއް ކަމަށް ވިދާޅުވިއެވެ. އެހެންވެ މިހާރަށްވުރެ ފަސޭއިން، ހުށަހެޅޭ މައްސަލަތުގެ އަޕްޑޭޓެއް ލިބޭނެ އިންތިޒާމު ހަމަޖައްސަވަމުންދާ ކަމަށް ވިދާޅުވިއެވެ.
''ފުލުހުންގެ އިދާރާއަށް ހުށަހެޅޭ މައްސަލަަތަކުގެ ވާނުވާއެއް އެ ހުށަހެޅި ފަރާތަށް އެޓް ލީސްޓު 14 ދުވަހުން އެއް ދުވަހު މަދުވެގެން އެ ފަރާތަށް ގުޅާލައިގެން އެ ކުރުވެނޭ މަސައްކަތްތައް ހިއްސާކުރެވޭނެ ނިޒާމެއް ގާއިމްކުރުން.''
ޝުޖާއު ވިދާޅުވީ އެފަދަ ނިޒާމެއް ގާއިމްކުރެވިގެން ދިޔުމުން ރައްޔިތުން ފުލުހުންނާ މެދު އޮންނަ އިތުބާރު މިހާރަށްވުރެ ބޮޑުވެގެންދާނެ ކަމަށެވެ.
