ބިންވެރިންނަށް މިނިސްޓަރުގެ ލިޔުމެއް ދީފި
ކުރީގެ ރައީސް އިބްރާހިމް މުހައްމަދު ސޯލިހުގެ ދައުރުގެ ފަހުކޮޅު ބޯހިޔާވަހިކަން ފޯރުކޮށް ދިނުމަށް ހިންގި ''ބިންވެރިޔާ'' ސްކީމުގެ ދަށުން ގޯތި ލިބިފައިވާ ފަރާތްތަކަށް ބިން ދޫކުރާނެ ކަމުގެ ޔަގީންކަން ދިނުމުގެ ގޮތުން ލިޔުމެއް ދޫކުރަން ފަށައިފިއެވެ.
ހައުސިން މިނިސްޓްރީގެ ރަސްމީ 'އެކްސް'' އެކައުންޓުން ކޮށްފައިވާ ޕޯސްޓެއްގައި ބުނީ، ބިން ލިބުނު ފަރާތްތަކަށް ލިޔުން ދޫކުރާނީ މިނިސްޓަރު ޑރ އަލީ ހައިދަރު އަހުމަދުގެ ނަމުގައި ކަމަށެވެ.
''މިނިސްޓަރު ހައިދަރު ގެ ނަމުގައި ބިން ލިބުނު ފަރާތްތަކަށް ލިޔުމެއް ފޯރުކޮށްދީފިއެވެ. މި ލިޔުން ހިޔާވެހި ޕޯޓަލް މެދުވެރިކޮށް ފެންނާނެއެވެ'' ޕޯސްޓުގައި ބުންޏެވެ.
ބިންވެރިޔާ ސްކީމްގެ ދަށުން ހުޅުމާލެ ފޭސް ދޭކާއި އާއި ފޭސް ތިނެއް އަދި ގުޅިފަޅު އަދި ގިރާވަރުފަޅުން ފުރަތަމަ ބުރުގައި 9،001 ގޯތި ދޫކުރުމަށް ނިންމައި، ގޯތި ލިބުނު މީހުންނަށް ރަޖިސްޓްރީ ވެސް ދޫކޮށްފައިވެ އެވެ. އަދި މިހާރު ހިއްކާ ނިމިފައި ހުރި ބިންތަކުން ބިންކަނޑާ ބިން ހަވާލު ވެސް ކުރިއެވެ. ހުޅުމާލެ ތިނެއް އާއި ގުޅިފަޅު އަދި ގިރާވަރުފަޅުގެ ބިން ހިއްކާ ނުނިމުނަސް ވަނީ ގަވާއިދަށް ބަދަލު ގެނެސްގެން ބިމުގެ ރަޖިސްޓްރީ ވެސް ހަވާލުކޮށްފައެވެ.
ގިރާވަރުން ދޫކޮށްފައިވާ 1347 ގޯއްޗެއް, ގުޅިފަޅަށް ބަދަލުކުރަން ސަރުކާރުން ވަނީ ނިންމާފައެވެ. ހައުސިން މިނިސްޓްރީން ބުނެފައިވާ ގޮތުން ގިރާވަރުފަޅުން ގޯތި ދޫކުރަނީ އެސަރަހައްދަށް ކޮންމެހެން ބޭނުންވާ މުހިއްމު ހިދުމަތްތަކަށް އެކަށީގެންވާ ވަރަށް ބިން އެކަށަ އެޅުމެއް ނެތިކަމަށްވާތީ އެ ހިދުމަތްތަކާއެކު ގިރާވަރުފަޅުގެ ލޭންޑް ޔޫސް ޕްލޭނަށް ބަދަލު ގެނައުމުން ގިރާވަރުފަޅުން ބިން ދޫކޮށްފައިވާ އަދަދަށް ގޯތި ނުނެގެތީއެވެ.
