އެސްއެސްސީ އިމްތިހާނު ނުނިންމައި ދަރިވަރުންތަކެއް ފިލި ވާހަކަ ދޮގުކޮށްފި
މި މަހު ކުރިއަށްދާ ސާނަވީ އިމްތިހާނުގެ އެސްއެސްއީ ދިވެހި މާއްދާގެ ޕޭޕަރު ނުނިންމައި ދަރިވަރުންތަކެއް ފިލައިގެން ދިޔަ ކަމަށް ބުނާ ވާހަކަ ތައުލީމީ ވުޒާރާއިން ދޮގުކޮށްފިއެވެ.
'އެކްސް' ގައި މީހަކު ވަނީ މި ޕޭޕަރު ކުރިއަށް ދިޔަ ވަގުތު ހުޅުމާލޭ ރެހެންދި ސުކޫލުގެ ފަސް ދަރިވަރަކު، އިމްތިހާނު ހޯލުން ނިކުމެ ސުކޫލުން ފިލައިގެން ގޮސްފައިވާ ކަމަށް ބުނެފައެވެ.
އެކަމާ ގުޅިގެން “ދެން” އިން ސުވާލުކުރުމުން ތައުލީމީ ވުޒާރާގެ މީޑިއާ އޮފިޝަލް ވިދާޅުވީ އެއީ ތެދުވާހަކައެއް ނޫން ކަމަށެވެ.
އެ ވުޒާރާއިން ބުނީ އިމްތިހާނު ހަދައި ނިމި، ޕޭޕަރު ވެސް ނެގި ފަހުން ދަރިވަރަކު ފާހަނާއަށް ދިއުމަށް ފަހު އެނބުރި ހޯލަށް ނުވަދެ ގެއަށް ދިޔަ ކަމަށެވެ.
އޭގެ އިތުރަށް އެއްވެސް ކަމެއް ހިނގާފައިނުވާ ކަމަށް އެ ވުޒާރާއިން ބުންޏެވެ.
އެނގިފައިވާ ގޮތުން އެ ދަރިވަރުން ދިޔައީ ސްކޫލު ގޭޓް މަތިން ފުންމާލައިގެނެވެ.
