ސިޔާސީ މަގާމުތަކުގެ ތަފްސީލު އާންމު ކުރަން ދަނީ ތައްޔާރުވަމުން: ރައީސް އޮފީސް
ސަރުކާރުގެ އިސް ސިޔާސީ މަގާމުތަކުގައި ތިއްބެވި ފަރާތްތަކުގެ ތަފްސީލުތައް ރައީސް އޮފީހުގެ ރަސްމީ ވެބްސައިޓުގައި އާންމުކުރަން ތައްޔާރުވަމުން ދާކަމަށް އެއޮފީހުގެ ކޮމިއުނިކޭޝަން މިނިސްޓަރު އިބްރާހިމް ހަލީލު ވިދާޅުވެއްޖެ އެވެ.
ސަރުކާރުން ސިޔާސީ މަގާމުތަަކަށް އައްޔަނުކޮށްފައިވާ މީހުންގެ ތަފްސީލު ހާމަނުކޮށްގެން އިންފޮމޭޝަން ކޮމިޝަނަރުގެ އޮފީހުން ވަނީ އެމައުލޫމާތު އާންމުކުރަން ރައީސް އޮފީހަށް އަމުރުކޮށްފަ އެވެ. އެހެންނަމަވެސް ވެބްސައިޓަށް ޓެކްނިކަލް މައްސަލައެއް ދިމާވެ މައުލޫމާތު އާންމުކުރުމުގައި ދަތިތަކެއް ކުރިމަތިވެފައިވާތީ މުއްދަތު ފާއިތުވެ ދިޔައިރުވެސް ސިޔާސީ މަގާމުތަކުގެ ތަފްސީލު ސަރުކާރުން އާންމެއް ނުކުރެ އެވެ.
މިކަމާއި ގުޅޭ އެންމެ ފަހުގެ މައުލޫމާތު ދެއްވަމުން ހަލީލު މިއަދު ވިދާޅުވީ ޓެކްނިކަލް މައްސަލަ މިހާރު ހައްލު ކުރެވިފައިވާ ކަމަށެވެ. އަދި ސިޔާސީ މަގާމުތަކުގެ ތަފްސީލުތައް މިހާރު ވެބްސައިޓުގައި އަދާހަމަ ކުރަން ފަށާފައިވާކަމަށާއި ކުޑަ ދުވަސްކޮޅެއްގެ ތެރޭގައި އެމަސައްކަތް މުޅިން ނިމޭނެ ކަމަށެވެ.
ސަރުގައި ތިބޭ ސިޔާސީ މުވައްޒަފުންގެ އަދަދު 700 އަށްވުރެއް އިތުރު ނުކުރުމަކީ ރައީސް ޑރ. މުހައްމަދު މުއިއްޒުގެ އަމާޒެކެވެ. މިއަދަދު ފަހަނައަޅާ ގޮސްފައިވާކަމަށްބުނެ ބައެއް ފަރާތްތަކުން ވާހަކަ ދައްކަމުން ދިޔަނަމަވެސް ސިޔާސީ މަގާމުތައް ބޭނުން ނުވާ މިންވަރަށް އިތުރުވެފައިނުވާކަން ސަރުކާރުން ކަށަވަރުކޮށްދެ އެވެ.
ނިމިދިޔަ ރައްޔިތުންގެ މަޖިލީހުގެ އިންތިހާބުގެ ކެމްޕެއިން ތެރޭގައި ވާހަކަފުޅު ދައްކަވަމުން ރައީސް މުއިއްޒު ވަނީ ސިޔާސީ މަގާމުތަކުގައި ތިއްބަވާ ފަރާތްތަކުން މަގާމުގެ މަސްއޫލިއްޔަތު އަދާނުކުރައްވާނަމަ ވަކިކުރައްވާނެކަމަށް ވިދާޅުވެފަ އެވެ.
ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރަކީ ސިޔާސީ މަގާމުތައް އެންމެ ބޮޑަށް އިތުރުވެގެންދިޔަ ސަރުކާރެވެ. މިކަމާއި ގުޅިގެން ގިނަ ބަޔެއްގެ ފާޑުކިޔުންވެސް އޭރު އަމާޒުވެގެން ދިޔަ އެވެ.
