ބަޖެޓް ސަޕޯޓްގެ ގޮތުގައި އިންޑިއާގެ 50 މިލިއަން ޑޮލަރުގެ ދަރަނި ރޯލްއޯވާ ކޮށްދީފި
ރާއްޖެއިން ސްޓޭޓް ބޭންކް އޮފް އިންޑިއާއިން ނަގާފައިވާ ލޯނަށް މިމަހު ދައްކަން ޖެހޭ 50 މިލިޔަން ޑޮލަރު, އެއް އަހަރަށް ރޯލްއޯވާކޮށްދީފިއެވެ.
ރާއްޖޭގައި ހުންނަ އިންޑިއާގެ ހައިކޮމިޝަނުން ބުނީ މިއީ ބަޖެޓް ސަޕޯޓްގެ ގޮތުގައި އިންޑިއާ ސަރުކާރުން ދިން ލުއެއް ކަމަށެވެ. އަދި ރޯލްއޯވާކޮށްފައިވަނީ އިތުރު އިންޓްރެސްޓެއް ނާރާގޮތަށް ކަމަށާއި, އެސްބީއަށް މިކަމުން ލިބޭ ގެއްލުމުގެ ބަދަލު ދޭނީ އިންޑިއާގެ ސަރުކާރުން ކަމަށެވެ.
މި ފައިސާއަކީ އެސްބީއައިން ޓްރެޝަރީ ބިލްގެ ގޮތުގައި ސަރުކާރުން ގަނެފައިވާ ފައިސާއެވެ. މި އަހަރު މުއްދަތު ހަމަވާ ތިން ޓީ ބިލެއް އެސްބީއައިއިން ވަނީ ގަނެފައެވެ. އޭގެ ތެރެއިން އެއް ޓީ ބިލަށް ޖެނުއަރީ މަހުގެ ތެރޭގައި ސަރުކާރުން ވަނީ ފައިސާ ދައްކާ ޚަލާސްކޮށްފައެވެ. އެއީ 50 މިލިޔަން ޑޮލަރުގެ ޓީ-ބިލެކެވެ. ދެވަަނަ ޓީބިލް ދައްކަން ޖެހެނީ މި ހިނގާ މެއި މަހުގެ ތެރޭގައެވެ. ރޯލް އޯވާކޮށްދީފައިވަނީ މި ޓީބިލެވެ,
ފޮރިން މިނިސްޓްރީން ބުނީ، އިންޑިއާ ސަރުކާރުން ޓީބިލް ރޯލްއޯވާ ކުރަން ނިންމީ މި މަހުގެ 8 އިން 10 އަށް އިންޑިއާއަށް ކުރެއްވި ރަސްމީ ދަތުރުފުޅުގައި ފޮރިން މިނިސްޓަރު މޫސާ ޒަމީރު އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ޖައިޝަންކަރާއެކު ބޭއްވި ބައްދަލުކުރެއްވުމަށް ފަހު ކުރެވުނު މަޝްވަރާތަކަށް ފަހުގައި ކަމަށޑެވެ.
މިއަދު އެ މިނިސްޓްރީން ނެރުނު ބަޔާނެއްގައިވަނީ ބަޖެޓް ސަޕޯޓްގެ ގޮތުގައި އިންޑިއާ ސަރުކާރުން ރާއްޖެއަށް ދެމުން ގެންދާ ދީލަތި އެހީތެރިކަމަށް ދިވެހި ސަރުކާރުން ވަނީ ޝުކުރުއަދާކޮށްފައެވެ.
އޭގެ އިތުރުން ސަރުކާރުން އުންމީދުކުރަނީ، ދެގައުމުގެ ރައްޔިތުންގެ ލާބައާއި ތަނަވަސްކަމަށްޓަކައި، ދެ ގައުުމުގެ ގުޅުން އިތުރަށް ބަދަހިވެގެން ދިޔުން ކަމަށް ފޮރިން މިނިސްޓްރީން ބުންޏެވެ.
ފޮރިން މިނިސްޓްރީން ބުނީ އިންޑިއާ ސަރުކާރުގެ އެހީގައި އުމްރާނީ ތަރައްގީގެ ގިނަ މަޝްރޫއުތަކާއި އިޖުުތިމާއީ ބޮޑެތި ޕްރޮޖެކްޓްތައް ކުރިއަށްދާ ކަމަށެވެ.
