ނިދަންވީ ބާލީސް ދަށަށް ލޮނުމެދު އަރިއެއް ލައިގެން
ކައްކަން ބޭނުންކުރާ ބާވަތްތަކުގެ ތެރެއިން ކާ އެއްޗެހީގެ ރަހަ ރަނގަޅު ކުރުމަށްޓަކައި އެންމެ ގިނައިން ބޭނުން ކުރެވޭ އެއް ބާވަތަކީ ލޮނުމެދެވެ. އެހެން ނަމަވެސް، ފަހުގެ ދިރާސާތަކުން ދައްކަނީ ކާއެއްޗެހީގެ ރަހަ ރަނގަޅު ކުރުމުގެ އިތުރުން ލޮނުމެދުން ލިބޭ އެހެނިހެން ފާއިދާތައް ހުންނަ ކަމަށެވެ.
ނިދަން އުނދަގޫ ވާނަމަ ބާލީސް ދަށަށް ލޮނުމެދު އަރިއެއް ލާށެވެ. އޭރުން ތިބާއަށް ނިދުމަށް ފަސޭހަވާނެއެވެ. އަރާމު، ފޮނި ނިންޖެއް ލިބޭނެއެެވެ. މިއީ ޤަބޫލުކުރަން ދަތި ވާހަކައަކަށް ވިޔަސް، ލޮނުމެދުގެ ވަސް ޖެހުމަކީ މީހާއަށް ފަސޭހަ ކަމާއެކު ފުން ނިންޖަކަށް ގެނބިގެން ދިޔުމަށް މަގުފަހިވާނެ ކަމެކެވެ.
ބައެއް މީހުންނަށް ނޭފަތް ބެދުމުގެ ސަބަބުން ނިދުމަށް ވަރަށް އުނދަގޫ ވެއެވެ. ނޭފަތުން ރަނގަޅަށް ނޭވާ ނުލެވިގެން ނިދީގައި އޮންނަން ޖެހެނީ އަނގަ ހުޅުވައިގެންނެވެ. މިކަމުގެ ސަބަބުން ތުންފަތް ހިކި، ތުންފަތް ފަޅައިގެން ދާ ފަހަރު ވެސް މަދެއް ނޫނެވެ.
ބާލީސް ދަށަށް ލޮނުމެދު އަރިއެއް ލައިގެން ނިދުމުން އެކަމަށް ލުޔެއް ލިބޭނެއެވެ. ލޮނުމެދުގައި ހިމެނޭ މާއްދާ ތަކުގެ ސަބަބުން އެތެރެހަށްޓަށް އަރާމު ލިބެއެވެ. އެހެން ކަމުން، އަވަހަށް ނިދުމަށް ވެސް މަގު ފަހި ވެއެވެ.
ލޮނުމެދަކީ އޭގެ ޒާތުގައި ބަނޑަށް ވެސް ވަރަށް ރަނގަޅު އެއްޗެކެވެ. ގެސްޓްރިކް މައްސަލަ ޖެހުނަސް ލޮނުމެދުން އެކަން ހައްލު ކުރެވިދާނެއެވެ. ކުރަން ޖެހޭ ކަމަކީ ފެން ތަށްޓަކަށް ކުޑަ ލޮނުމެދު ކޮޅެއް އަޅައިގެން ބުއިމެވެ. އޭގެ ރަހަ ނުބައިވިޔަސް، އަވަހަށް ވޭން ކެނޑިގެން ދާނެއެވެ.
ލޮނުމެދަކީ ފާއިދާ ހުރި އެއްޗަކަށްވިޔަސް، ދުވާލެއްގެ މައްޗަށް މާ ގިނައިން ލޮނުމެދު ބޭނުން ކުރުމަކީ އެހާ ރަނގަޅު ކަމެއް ނޫނެވެ.
