ނަރުދޫގެ އެއްވުން ރޫޅާލުމުގައި ފުލުހުން ގޯހެއް ހެދިތޯ ބަލަނީ
ށ. ނަރޫދޫގައި މަންމަގެ ބެލުމުގެ ދަށަށް ދެ ކުއްޖަކު ގެންދަން ފުލުހުން އުޅުމުން އެ ކަމާ ދެކޮޅަށް އަޑު އުފުލައި ފުލުހުން ހުއްޓުވަން މަސައްކަތް ކުރި ބަޔަކު އެ ތަނުން ދުރަށް ޖެއްސުމުގައި އެއްވެސް ގޯހެއް ހިނގާފައިވޭތޯ ބަލަމުންދާ ކަމަށް ފުލުހުން މިރޭ ބުނެފި އެވެ.
އެ ތަނަށް އެއްވި މީހުން ދުރަށް ޖައްސަނިކޮށް ބަޔަކަށް އަނިޔާކޮށްފައިވާ ކަމަށް ބުނެ ރަށު ތެރޭގައި ވާހަކަ ދެކެވެމުންދާ ކަން "ދެން" އަށް އެނގިފައިވެ އެވެ. އަދި އެ ސަރަހައްދުގެ ހަމަނުޖެހުމުގެ އެކި ވީޑިއޯ ސޯޝަލް މީޑިއާގައި ވެސް ދަނީ ދައުރުވަމުންނެވެ.
ފުލުހުން ބުނީ އެފަދަ މައްސަލައެއް ރަސްމީ ސިފައެއްގައި އެއްވެސް ފަރާތަކުން ހުށަހަޅާފައި ނުވާ ކަމަށެވެ. ނަަމަވެސް މީޑިއާތަކުން ފުލުހުންގެ ސަމާލު ކަމަށް އެ ކަން އައުމުން، އެ ދުވަހު ފުލުހުން އަމަލުކޮށްފައިވާ ގޮތް އެ އިދާރާގެ ޕްރޮފެޝަނަލް ސްޓޭންޑަޑުން މިހާރު ބަލަމުންދާ ކަމަށް ފުލުހުން ބުންޏެވެ.
ފުލުހުން އެ ކުދިންގެ މަންމައާ ކުދިން ހަވާލުކުރަން ނަރުދޫއަށް އިއްޔެ ދިޔައީ ހުޅުމާލެ މެޖިސްޓްރޭޓް ކޯޓުން ދިން އަމުރެއް ތަންފީޒުކުރަން ކަމަށް ފުލުހުން ބުނެފައިވެ އެވެ. އަދި މިހާރު އެ ކުދިންގެ މަންމައާ ކުދިން ހަވާލުކޮށްފައިވާ ކަމަށް ވެސް ފުލުހުން އިއްޔެ ބުނެފައިވެ އެވެ.
މިކަން ހިނގައި ދިޔަ ގޮތުގެ މައުލޫމާތު އެނގޭ މީހަކު "ދެން" އަށް ކުރިން މައުލޫމާތު ދެމުން ބުނެފައިވަނީ އެއީ ދެ އަންހެން ކުދިން ކަމަށެވެ. އަދި އެއް ކުއްޖަކީ 7 އަހަރު ފުރިފައި ހުރި ކުއްޖެއް ކަމަށާއި، އަނެއް ކުއްޖާއަކީ 7 އަހަރުން ދަށުގެ ކުއްޖެއް ކަމަށް އޭނާ ބުންޏެވެ.
އޭނާ ބުނި ގޮތުގައި، ފުލުހުންނާއެކު އެ ކުދިންގެ މަންމައާއި، މަންމަ ފަރާތުގެ އާއިލާ އެންމެ ފުރަތަމަ އެރަށަށް ދިޔައީ އިއްޔެ ހެނދުނުގެ ވަގުތެއްގައެވެ. އަދި އެ ކުދިންގެ މަންމަ ކުދިންނާއި ބައްދަލު ކުރަން އެދުމުން، އެ ކުދިންގެ ބައްޕައާއެެކު ކުދިން މަންމަ ކައިރިއަށް ދިޔަ ކަމަށާއި، މަންމައާއެކު ދިރިއުޅެން ކ. ދިއްފުއްޓަށް ދިއުމަށް ދެ ކުދިން ވެސް އިންކާރު ކޮށްފައިވާ ކަމަށެވެ.
މީސް މީޑިއާގައި ދައުރުވެފައިވާ ވީޑިއޯތަކުން ފެންނަ ގޮތުގައި ފުލުހުން އެ ދެ އަންހެން ކުދިން ގެންދާ މަންޒަރު ފެނެއެވެ. އޭރު އެ ކުދިން ނުދިއުމަށް ބޮޑާ ހާކައި ރޮއެ ހަޅޭއްލަވައެވެ. ވީޑިއޯއިން ފެންނަ ގޮތުގައި އެ ރަށުގެ ވަރަށް ގިނަ ރައްޔިތުން އެ ސަރަހައްދަށް ވަނީ އެއްވެފައެވެ.
