20 ވަނަ މަޖިލީހުގެ 93 މެންބަރުން މަގާމުގެ ހުވާ ކުރައްވައިފި
ކުރިއަށް އޮތް 20 ވަނަ ރައްޔިތުންގެ މަޖިލީހަށް އިންތިހާބުވި 93 މެންބަރުން މަގާމުގެ ހުވާ ކުރައްވައިފިއެވެ.
އުއްތަމަ ފަނޑިޔާރު މުއުތަސިމް އަދުނާންގެ ކުރިމަތިފުޅުގައި މެންބަރުން ހުވާ ކުރައްވާފައިވަނީ މިއަދު ރައްޔިތުންގެ މަޖިލީހުގެ އެކަމަށް ބޭއްވި ހާއްސަ ރަސްމިއްޔާތުގައެވެ.
މި މަޖިލިހުގައި ސުޕަމެޖޯރިޓީ ހޯދާފައިވަނީ ސަރުކާރު ހިންގާ ޕީއެންސީއިންނެވެ. ޕީއެންސީގެ 76 މެމްބަރުން މިފަހަރު މަޖިލީހުގައި ތިއްބަވާނެ އެވެ. އެއީ އެ ޕާޓީގެ ޓިކެޓުގައި ހޮވުނު 66 މެމްބަރުންނާ އަލަށް އެޕާޓީއާ ގުޅުނު 10 މެމްބަރުން ހިމެނޭހެންނެވެ.
ދެން ތިއްބަވާނީ އެމްޑީޕީގެ 12 މެމްބަރުން، އެމްޑީއޭގެ ދެ މެމްބަރުން އަދި ޖުމްހޫރީ ޕާޓީއާއި އެމްއެންޕީ ކޮންމެ ޕާޓީއަކުން އަދި އަމިއްލަ ގޮތުން މެންބަރެކެވެ.
އެމްޑީޕީ ފިޔަވައި ދެން ތިއްބެވި ގިނަ މެމްބަރުން ވަނީ ސަރުކާރާ ގުޅިގެން މަޖިލީހުގައި މަސައްކަތް ކުރަން ނިންމައިފަ އެވެ.
މަޖިލީހުގެ ގަވާއިދުގައިވާ ގޮތުން އާ މެމްބަރުންނާއެކު ބާއްވާ ފުރަތަމަ ޖަލްސާގައި މެމްބަރުންގެ ސިއްރު ވޯޓަކުން މަޖިލީހުގެ ރައީސާއި ނައިބު ރައީސް އިންތިހާބު ކުރަންޖެހެ އެވެ.
އެހެންކަމުން މެންބަރުން ހުވާ ކުރެއްވުމަށް ފަހު ރައީސާއި ނައިބު ރައީސް ކަނޑައެޅުމުގެ ޖަލްސާ ވަނީ 10:30 އަށް ތާވަލްކޮށްފައެވެ. މި ޖަލްސާގެ ރިޔާސަތު ބަލަހައްޓަވާނީ މީދޫ ދާއިރާގެ މެންބަރު އަހުމަދު ސިޔާމެވެ. އެއީ މެދުކެނޑުމެއްނެތި އެންމެ ގިނަ ދުވަހު މެމްބަރުކަން ކުރައްވާފައިވާ މެމްބަރުގެ ހައިސިއްޔަތުންނެވެ.
މަޖިލީހުގެ ސުޕަ މެޖޯރިޓީ ޕީއެންސީއަށް ލިބިފައިވާއިރު ރައީސް ޑރ. މުހައްމަދު މުއިއްޒު ވަނީ މަޖިލިސް ރައީސްކަމަށް ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ އަދި ނައިބު ރައީސް ކަމަށް ދިއްގަރު ދާއިރާގެ މެމްބަރު އަހުމަދު ނާޒިމް އެންޑޯޒް ކުރައްވައިފަ އެވެ.
