ޕްލޭނާ އެއްގޮތަށް ކުރިއަށް ނުދިޔަނަމަވެސް މިއަހަރު ރަސްމާލެ ހިއްކާ ނިންމާނެ
މި ސަރުކާރުގެ އެންމެ ބޮޑު ބޯހިޔާވަހިކަމުގެ މަޝްރޫއު، ރަސްމާލެ ހިއްކުމުގެ މަސައްކަތް ޕްލޭނާ އެއްގޮތަށް ކުރިއަށް ނުދިޔަނަމަވެސް މި އަހަރުގެ ނިޔަލަށް ހިއްކާ ނިންމާލެވޭނެ ކަމަށް އިންފްރާސްޓްރަކްޗާ މިނިސްޓަރު ޑރ. އަބްދުالله މުއްތަލިބް މިއަދު ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި މުއްތަލިބް ވިދާޅުވީ, ރަސްމާލެ މަޝްރޫއަކީ ސަރުކާރުން ސީދާ ފައިސާގެ މުއާމަލާތެއް ހިންގުމެއް ނެތި، ކޮންޓްރެކްޓަރުން ފައިސާ ރެއިޒްކޮށްގެން ކުރިއަށް ގެންދަން ހަވާލުކުރި މަޝްރޫއުއެއް ކަމަށެވެ.
ނަމަވެސް މަސައްކަތް މަޑުޖެހިފައި އޮތީ މަސައްކަތަށް ބޭނުންވާ ފައިސާ ކޮންޓްރެކްޓަރަށް ނުހޯދިގެން ކަމަށް މުއްތަލިބް ވިދާޅުވި އެވެ.
"ސަރުކާރުން މިހާރު މަސައްކަތްކުރަމުންދަނީ، މާ ލަސްތަކެއް ނުވެ ފެށިގެންދާނެ. ސަރުކާރުން މަސައްކަތްކުރަމުން މިގެންދަނީ، އަޅުގަނޑުމެންނަށް މި އަހަރުގެ ނިޔަލަށް މަސައްކަތް، އެއްކޮށް ހިއްކާ ނިންމާލެވޭ ވަރަށް ތަފާތު ގިނަ ފަރާތްތަކާ ގުޅިގެން މަސައްކަތްކުރަން," އޭނާ ވިދާޅުވި އެވެ.
އެ މަސައްކަތްތަކުގައި ކާމިޔާބީތަކެއް ހާސިލް ކުރެވިފައިވާ ކަމަށާއި އަމަލީ މަސައްކަތް ފެށޭ ހިސާބަށް ދިއުމުން ތަފްސީލް ހާމަ ކުރާނެ ކަމަށް އޭނާ ވިދާޅުވި އެވެ.
ރަސްމާލެ ހިއްކަނީ ސްރީލަންކާގެ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ (ސީއެމްސީސީ) އާ ހަވާލުކޮށްގެން 70 ހެކްޓަރުގެ ބިން ދިގު މުއްދަތަކަށް އެ ކުންފުންޏަށް ދީގެންނެވެ.
އެ ކުންފުންޏާ އެ މަޝްރޫއު ހަވާލުކުރީ އަށް މަސް ދުވަހުގެ ތެރޭގައި ނިންމާ ގޮތަށެވެ.
