ކަރަންޓުގައި ޖެހި ހާލު ސިރިއަސްވި ޒުވާނާ ނިޔާވެއްޖެ
ރ. އުނގޫފާރުގައި، ކަރަންޓުގައި ޖެހިގެން އައިޖީއެމްއެޗްގެ އައިސީޔޫގައި ފަރުވާދެމުން ދިޔަ ޒުވާނާ ނިޔާވެއްޖެ އެވެ.
އުމުރުން 18 އަހަރުގެ ހުސެއިން އަތީކް ނިޔާވެފައިވަނީ މިއަދު ހެނދުނުގެ ވަގުތެއްގައިކަން އާއިލާގެ މެމްބަރަކު ވަނީ "ދެން" އަށް ޔަގީންކޮށްދީފަ އެވެ.
އޭނާ ކަރަންޓުގައި ޖެހިފައިވަނީ ކުޑަ ދެ ކުދިންނަތަކަކާއި އެކު ފެންގަނޑެއްގައި ކުޅެން އުޅުމުގެ ތެރޭގައި އެތަނުގައި މަގުބައްތިއަކުންނެވެ. އެނގިފައިވާ ގޮތުން ކަރަންޓުގައި ޖެހުނު އެ ކުޑަ ދެކުދިން ސަލާމަތްކުރީ އެ ޒުވާނާއެވެ.
އުނގޫފާރު ހޮސްޕިޓަލުން ފަރުވާ ދިނުމަށް ފަހު އިތުރު ފަރުވާއަށް، އަތީކް އައިޖީއެމްއެޗަށް ބަދަލުކުރީ މި މަހުގެ 26 ވަނަ ދުވަހު އެވެ. އެކަމަކު އޭނާގެ ހާލަތަށް މާ ބޮޑު ބަދަލެއް އައިސްފައެއް ނުވެ އެވެ. އާއިލާގެ މެމްބަރަކު ބުނީ، މީގެ ދެ ދުވަހެއް ކުރިން ޑޮކްޓަރުން އުއްމީދު ކަނޑާލާފައިވާ ކަމަށެވެ.
