އެއާޕޯޓް އެމްޑީގެ ކާރު ވަގަށް ނެގި މައްސަލާގައި ދެ މީހަކަށް ދައުވާކޮށްފި

މި އަހަރުގެ އޭޕްރީލް މަހުގެ 29 ވަނަ ދުވަހުގެ 07:00 ހާއިރު މޯލްޑިވްސް އެއާޕޯޓްސް ކޮންޕެނީ ލިމިޓެޑްގެ މެނޭޖިންގް ޑިރެކްޓާ ދުއްވުމަށް ހާއްސަކޮށްފައިވާ ކާރެއް، ވެލާނާ އިންޓަނޭޝަނަލް އެއާޕޯޓްގެ ޓްރާންސްޕޯޓް އެންޑް ފެރީ ސާވިސް ބިލްޑިންގައި ޕާކްކޮށްފައި އޮއްވާ ވަގަށް ނަގާފައިވާ މައްސަލައިގައި ދެ މީހަކަށް ދައުވާ ކުރުމަށް ކްރިމިނަލް ކޯޓަށް ހުށަހަޅައިފި އެވެ. ޕްރޮސެކިއުޓަ ޖެނެރަލް (ޕީޖީ) އޮފީހުން ބުނި ގޮތުގައި ދައުވާ އުފުލި ދެ މީހުންނަކީ:

1. މ. ސީނީއަސުރުމާގެ، މުހައްމަދު ހައިޝަމް (42އ)
2. މ. މޮޑަންކޮމެޓް، އަހުމަދު ނިޒާމް (43އ)

ހައިޝަމްގެ މައްޗަށް ކޮށްފައިވަނީ އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ދައުވާ އެވެ. ނިޒާމްގެ މައްޗަށް ތިން ދައުވާއެއް އުފުލާފައިވެ އެވެ. އެއީ އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމާއި، އެއްވެސް މީހަކަށް އޮޅުވާލުމުގެ ނިޔަތުގައި އެއްޗަކަށް ބަދަލު ގެނައުމުގެ ދައުވާގެ އިތުރުން މުދަލަށް ގެއްލުންދިނުމުގެ ދައުވާ އެވެ. އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ދައުވާގެ އަސާސީ އަދަބަކީ 3 އަހަރާއި 2 މަހާއި 12 ދުވަހުގެ މުއްދަތަކަށް ޖަލަށް ލުމެވެ. އޮޅުވާލުމުގެ ނިޔަތުގައި އެއްޗަކަށް ބަދަލު ގެނަމުގެ ދައުވާގެ އަސާސީ އަދަބަކީ 9 މަހާއި 18 ދުވަހުގެ މުއްދަތަކަށް ޖަލަށް ލުމެވެ. މުދަލަށް ގެއްލުން ދިނުމުގެ ދައުވާގެ އަސާސީ އަދަބަކީ 9 މަހާއި 18 ދުވަހުގެ މުއްދަތަކަށް ޖަލަށް ލުމެވެ. ޕީޖީން ކުރި ދައުވާގައި ތުހުމަތުކުރާ ގޮތުން ހައިޝަމްއާއި ނިޒާމް ވަނީ 29 އޭޕްރިލް 2024 ދުވަހުގެ 00:00 އާއި، 06:30 އާ ދެމެދުގެ ވަގުތެއްގައި އެމްއޭސީއެލްގެ އެމްޑީ ދުއްވުމަށް ހާއްސަކޮށްފައިވާ ވޭން، އެކުންފުންޏަށް ނޭނގި ނަގައިގެން ގޮސްފަ އެވެ. އެ ވޭންގެ އިންޖީނު ނަންބަރާއި ޗެސިސް ނަންބަރު ކަހާލާއި، އެ އުޅަނދުގެ އަސްލު އޮޅުވާލުމުގެ އިތުރުން އެ އުޅަނދަށް ގެއްލުންދޭން ނިޒާމް މަސައްކަތްކޮށްފައިވާ ކަމަށް ޕީޖީން ތުހުމަތު ކުރެ އެވެ. މި މައްސަލައިގައި ވަގަށް ނަގާފައިވާ ކާރުގެ އަގަކީ 34560 އެމެރިކާ ޑޮލަރެވެ. އެ ކާރު ވަގަށް ނެގި މައްސަލައިގެ ތަހުގީގު ގައި ފުލުހުން ވަނީ ވަގަށް ގެންގޮސްފައިވާ އިތުރު ވެހިކަލްތަކެއްވެސް ހޯދާފަ އެވެ. ފުލުހުންގެ މީގެ ކުރިން ބުނެފައިވާ ގޮތުން ވެހިކަލް ޕާކުކޮށްފައިވާ ގަރާޖު ކުއްޔަށް ނަގައިގެން އުޅެނީ ނިޒާމް ކަމަށާއި އޭނާގެ ނަމުގައި 100 ވެހިކަލް ރެޖިސްޓްރީކޮށްފައިވާ ކަމަށެވެ. އޭގެ ތެރޭގައި ހިމެނޭ 86 ހަތަރު ފުރޮޅުލީ ވެހިކަލްގެ ތެރެއިން 42 ވެހިކަލް ރެޖިސްޓްރީކޮށްފައިވަނީ ނިޒާމްގެ އަންހެނުންގެ ނަމުގަ އެވެ. އެ މައްސަލައިގެ ތެރެއިން ޓްރާންސްޕޯޓު ތެރެއިން ކުރިއަށް އަންނަ އޮތް އަހަރުތަކަށް ވެހިކަލް ރެޖިސްޓްރީކޮށްފައިވާ ކަން ފަޅާ އަރާފައިވެ އެވެ.