ބީއެމްއެލުން ގޮތް ނޭނގި ފައިސާ ކަނޑާ މައްސަލަ: ރައްޔިތުން ނަފްސާނީ ގޮތުން ބޮޑު ހާސްކަމެއްގެ ތެރޭގައި، ބޭންކު އަދިވެސް ހަނު!

ބެންކަށް މީހުން ފައިސާ ޖަމާކުރަނީ ކީއްކުރަންތޯއެވެ؟ ފައިސާ ރައްކާތެރި ކޮށްފައި ބަހައްޓަން ދެއްތޯއެވެ. އެއްވެސް މީހަކު ދާއޮހޮރުވައިގެން ބުރަ މަަަސައްކަތްކޮށް، ލިބޭ އާމްދަނީއިން ކުޑަ މިންވަރެއް ވެސް އެމީހަކު ނުކުރާ ވިޔަފާރިއަކަށް ޚަރަދުވާކަށް އެދޭނެ ހެއްޔެވެ؟ ހަމަޔަގީނުން ވެސް އެފަދައިން ފައިސާތައް އިސްރާފުވާކަށް އެކަކު ވެސް ބޭނުމެއް ނުވާނެއެވެ. ޚާއްސަކޮށް ކޮވިޑް-19 ގެ މިނުރައްކާތެރި ބަލިމަޑުކަން ފެތުރިފައިވާއިރު، ކޮންމެ މީހަކު ވެސް އެންމެ ބޭނުން ވާނީ ވީހާވެސް ޚަރަދުތައް ކުޑަކޮށްފައި ފައިސާ ރައްކާ ކުރާށެވެ.

Ads by Sosun Fihaara

މިފަދަ ބަލިމަޑުކަމެއްގެ ތެރޭގައި ލިބޭ އާމްދަނީ ވެސް އެހާ މަދުއިރު، އެފައިސާއިން ބައެއް މިއަންނަނީ ކެނޑެމުންނެވެ. އެވެސް ތިމާ ނުކުރާ ވިޔަފާރިއަކަށެވެ.

އަޅުގަނޑުމެންނަށް ލިބޭ އާމްދަނީ ނުހަނު އިތުބާރާއެކު ހަވާލު ކޮށްފައިވާ އެންމެ ބޮޑު އެއް ފަރާތަކީ ބޭންކް އޮފް މޯލްޑިވްސް (ބީއެމްއެލް) އެވެ. ފައިސާ ރައްކާތެރިކަމާއެކު، ބޭންކުގައި ހުރި ނަމަވެސް އޭގެން ފައިސާ ޚަރަދު ކުރުމުގެ ބާރު އޮތީ އަޅުގަނޑުމެންގެ އަމިއްލަ އަތްމަތީގައި ކަމަށް ހީކުރީމެވެ.

ނަމަވެސް މިފަހަކަށް އައިސް ކަންތައްވެފައި މިވަނީ އެހެނެއް ނޫނެވެ. ބީއެމްއެލް އިން ގޮތް ނޭނގި، ކަސްޓަމަރުންގެ އެކައުންޓުތަކުން ފައިސާ ކަނޑަމުން އަންނަ މައްސަލައެއް މިވަނީ ފެން މަތިވެފައެވެ.

"ފޮރިން ޕާޗެސް" ކަމަށް ބުނެ ބޮޑެތި އަދަދުތަކުން ފައިސާ ކަނޑާފައިވާ ކަމަށާއި، އެއީ އެފަރާތްތަކުން ކޮށްފައިވާ ވިޔަފާރިއެއް ނޫން ކަމަށް ބުނެ ވެސް އެފަރާތްތަކުން ވަނީ ކަންބޮޑުވުން ފާޅުކޮށްފައެވެ.
އެގޮތުން ބައެއް މީހުންގެ އެކައުންޓުތަކުން 80-100 ދެމެދުން ފައިސާ ކަނޑާފައިވާއިރު، އަނެއްބައިމީހުންގެ އެކައުންޓުތަކުން އެއަށްވުރެ މަތިން ފައިސާ ކެނޑިކަމަށް ވެސް ބުނެފައިވެއެވެ.

މިކަމާއި ގުޅޭގޮތުން ބީއެމްއެލް އަށް ގުޅުމުން ފޯނަށް ޖަވާބު ނުދޭ ކަމަށާއި، ފޯނު ނަގާފައި ވެސް އެދެވޭ ޖަވާބެއް ނުދިން ކަމުގެ އަޑުތަކެއް ވެސް ވަނީ ފެތުރިފައެވެ.

ރައްޔިތުންގެ މިފަދަ ކަންބޮޑުވުންތަކާއި ގުޅޭގޮތުން ބީއެމްއެލް ގެ ބަހެއް ހޯދާލުމަށް "ދެން" ގެ ފަރާތުން އިއްޔެ ގުޅާލުމުން، އެ ބޭންކުގެ މީޑިއާ އޮފިޝަލު ސައީދު މުޙައްމަދު ވިދާޅުވީ ބީއެމްއެލް އިން މިކަމާއި ބެހޭގޮތުން ބަހެއް ދެއްވާނެ ކަމަށާއި ނަމަވެސް ޖަވާބު ދެއްވާނީ ލިޔުމަކުން ކަމަށް ވެސް ވިދާޅުވިއެވެ.

އެހެން ކަމުން ސައީދު އެދުނީ ބީއެމްއެލްގެ ފަރާތުން ޖަވާބު ބޭނުންވަނީ ކޮން ކަމަކާއި ގުޅިގެންކަން އެބޭންކަށް މެއިލް ކުރެއްވުމަށެވެ.

ނަމަވެސް އިއްޔެ ހެނދުނު 11:10 ހާއިރު "ދެން" ގެ ފަރާތުން ކުރި އެމެއިލަަށް ބީއެމްއެލް ގެ ފަރާތުން އަދިވެސް ޖަވާބެއް ލިބިފައި ނުވާކަން ހިތާމައާއެކު ފާހަގަ ކުރަމެވެ.