ފުވައްމުލަކު މަގުތަކަށް ދޫކޮށްލާފައި ހުރި އުޅަނދުތައް ނަގަން 5 ދުވަސް
ފުވައްމުލަކު ސިޓީގެ މަގުމައްޗާއި ޕޭމެންޓުމަތީގައި ބަހައްޓާފައި ހުރި ވެހިކަލްތަކާއި ދާއިމީކޮށް މަގުމައްޗާއި ޕޭމެންޓްމަތީގައި ޕާކުކޮށްފައިވާ އުޅަނދުތައް ނަގަން 5 ދުވަހުގެ މުއްދަތެއް ދީފި އެވެ.
ފުވައްމުލަކުގެ މަގުތަކުގަައި ނުވަތަ ޕޭމެންޓުތީގައި ބަހައްޓާފައި ހުރި ވެހިކަލްތައް ނަގަން ސިޓީ ކައުންސިލުން އިއްޔެ އެންގީ، ދާއިމީ ގޮތެއްގައި އެ އުޅަނދުތައް ޕާކުކުރަމުންދާކަން ފާހަގަކުރެވިގެން ނެވެ.
ސަރުކާރުގެ ގެޒެޓުގައި ޝާއިއުކޮށްފައިވާ އިއުލާނުގައި ބުނެފައިވަނީ އެ އުޅަނދުތައް ދާއިމީ ގޮތެއްގައި ޕާކުކޮށްފައި ހުރުމުގެ އިތުރުން ހަލާކުވެފައިވާ އުޅަނދުތައް ވެސް މަގުމައްޗަށް ދޫކޮށްފައި ހުންނަކަން ވެސް ފާހަގަކުރެވޭ ކަމަށެވެ.
"މިގޮތަށް މަގުގައި ވެހިކަލްތައް ބަހައްޓާފައި ހުރުމުގެ ސަބަބުން ހިނގާބިގާވެ އުޅޭ ފަރާތްތަކަށާއި ދުއްވާ އުޅަނަދުތައް ދުއްވުމަށާއި، މަގުމަރާމާތުކޮށް ބެލެހެއްޓުމުގެ މަސައްކަތްކުރުމަށް ބޮޑެތި ދަތިތަކާއި ކުރިމަތިލާންޖެހެ އެވެ. މިގޮތަށް ބެހެއްޓިފައި ހުންނަ ވެހިކަލްތަކުގެ ސަބަބުން މަގުގެ ރައްކާތެރިކަން ގެއްލި ނުރައްކާތެރި ހާދިސާތައް ހިގަމުންދާކަން ފަހަކަށް އައިސް ފާހަނގަ ކުރެވިފައިވެއެވެ." އިއުލާނުގައި ބުނެފައިވެ އެވެ.
ކައުންސިލްގެ ހުއްދަ ނެތި އެއްވެސް ބާވަތެއްގެ ވެހިކަލެއް ދާއިމީކޮށް މަގުމައްޗާއި ޕޭމެންޓުމަތީގައި ޕާކުކުރުމާއި މަގުމައްޗާއި ޕޭމެންޓުމަތީގައި ހަލާކުވެފައިވާ ވެހިކަލްތަށް ބެހެއްޓުމަކީ މަނާކަމެއްކަން ފާހަގަކޮށް އެ ކައުންސިލުން ވަނީ އެ ގޮތަށް ހުއްދަނެތި ބަހައްޓާފައި ހުރި ގިނަ ދުވަސްވެ ހަލާކުވެފައިވާ ވެހިކަލްތަށް 05 (ފަހެއް) ދުވަހުގެ ތެރޭގައި ނެގުމަށް އަންގާފަ އެވެ. އަދި ދާއިމީ ގޮތެއްގައި ވެހިކަލްތައް މަގުމައްޗާއި ޕޭމެންޓުމަތީގައި ޕާކުކޮށްފައި ނުބެހެއްޓުމަށް ވެސް އިލްތިމާސްކޮށްފައިވެ އެވެ.
ކައުންސިލުން ބުނީ ފަސް ދުވަހުގެ މުއްދަތުގައި އެ އުޅަނދުތައް ނުނަގައިފިނަމަ، އެ އުޅަނދުތައް ކައުންސިލުން ނަގާނެ ކަމަށެވެ. އަދި އެގޮތަށް ވެހިކަލްތައް ނެގުމުގައި ލިބޭ އެއްވެސް ގެއްލުމެއްގެ ޒިންމާ ކައުންސިލުން ނުނަގާނެ ކަމަށެވެ.
