މަސް ކިލޯގެ އަގު 25 ރުފިޔާއަށް ޖައްސަން މަސްވެރިން ނުކުންނަން ގޮވާލައިފި
މަސް ކިލޯއެއްގެ އަގު މިއަދު ފަސް ރުފިޔާއަށް ވައްޓާލާފައިވާ ކަމަށާއި އެ އަގު 25 ރުފިޔާއަށް އަލުން އަނބުރާ އެރުވުމަށް ހުރިހާ މަސްވެރިން ނިކުންނަން ރައްޔިތުންގެ މަޖިލިހުގެ ކެންދޫ ދާއިރާގެ މެމްބަރު އަދި މަސްވެރިންގެ ޖަމިއްޔާތަކުގައި އިސްކޮށް އުޅުއްވާ މައުރޫފް ޒާކިރު (މަޓޭ) މިރޭ ގޮވާލައްވައިފި އެވެ.
"ކުރީ ސަރުކާރު... ކުރީ ސަރުކާރު..." ގެ ނަމުގައި ދަނޑުކޮށި ޖަގަހައިގައި ހިނގަމުންދާ ހަރުގެ ޖަލްސާގައި ވާހަކަ ދައްކަވަމުން އޭނާ ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރަށް އަށް މަސް ދުވަސް ނުވަނީސް މަސްވެރިންނަށް ހިތި ބޭސް ބޯންދީފައިވާ ކަމަށެވެ.
މިއަދު ރާއްޖޭގެ މަސްވެރިން ތިބީ މާޔޫސްވެފައި ކަމަށާއި އެ މީހުންނަށް ކުރެވުނު ކަންތަކާ މެދު ފިކުރުކޮށް ހެދުނީ ގޯހެއްކަން ފާހަގަކޮށް ކޮންމެ ދުވަހަކު އޭނާއަށް މަސްވެރިން ގުޅަމުންދާ ކަަމަށް މައުރޫފް ވިދާޅުވި އެވެ.
މައުރޫފް ވިދާޅުވެފައި ޅ. ފެލިވަރުގަ އާއި ގއ. ކޫއްޑޫގެ އިތުރުން ރާއްޖޭގެ އެކި ހިސާބުތަކުގައި ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އައީ މަސް ފެކްޓްރީތަކާއި މަސް ރައްކާކުރާނެ ރަނގަޅު ތަންތަން ގާއިމުކުރަމުން ކަމަށެވެ.
އެ މަސައްކަތާ އެކު ސޯލިހުގެ ވެރިކަން ނިންމާލީ މަސް ކިލޯއެއްގެ އަގު 25 ރުފިޔާއަށް ބޮޑުކޮށްފައި ކަން ފާހަގަ ކުރައްވަމުން އޭނާ ވިދާޅުވީ އަގަށް ބަދަލު ގެނައީ އެކަން ކުރެވޭނެތީ ކަމަށެވެ. އެމްޑީޕީގެ ސަރުކާރެއް މިއަދު އޮތްނަމަ އަދިވެސް މަސް ކިލޯއެއްގެ އަގު ހުންނާނީ 25 ރުފިޔާގައި ކަމަށެވެ.
"ވެރިކަން އަޅުގަނޑުމެންނަށް ދިން ނަމަ، ދިވެހި ރައްޔިތުން އަޅުގަނޑުމެންނަށް ދިން ނަމަ މިއަދު ވެސް މަސް ކިލޯއެއް ހުންނާނީ 25 ރުފިޔާގައި،" މައުރޫފް
މަހުގެ އަގަށް އެމްޑީޕީގެ ސަރުކާރުން ބަދަލު ގެނައުމުން ދައުލަތަށް ގެއްލުންވާ ކަމަށް ބުނެ ވާހަކަ ދައްކަމުން އަންނަނީ ހަގީގަތް އޮޅުވައިލަން ކަމަށް އޭނާ ވިދާޅުވި އެވެ. ކުރީގެ ސަރުކާރުން އެ ކަން ކުރީ ހިސާބު ޖަހައި އެކަން ވާނެ ގޮތުގެ މުޅި ޕްލޭނާ އެކުގައި ކަމަށް މައުރޫފް ވިދާޅުވި އެވެ.
މަސް ކިލޯއެއްގެ އަގަށް މި ސަރުކާރުން ގެނައި މި ބަދަލާ އެކު، އެކަމާ ދެކޮޅު ހަދައި، މަސް ކިލޯއެއްގެ އަގު އަލުން އަނބުރާ 25 ރުފިޔާއަށް ބޮޑު ކުރަން މަސައްކަތް ފެށުމަށް މަސްވެރިންނަށް އޭނާ ގޮވާލެއްވި އެވެ. ކުރިން ވެސް މަސްވެރިން ކުރި މުޒާހަރާތަކުގެ އިސް ސަފުގައި ހުންނެވި މަޓޭ ވިދާޅުވީ ދެން ވެސް މަސްވެރިންގެ މަސައްކަތްތަކުގައި އެމްޑީޕީގެ އެއްބާރުލުން ލިބޭނެ ކަމަށެވެ.
"މަސްވެރިން އެ ތިބީ ރޯން. ހުރިހާ މަސްވެރިންނަށް އަޅުގަނޑު ގޮވާލަން ޔޫނިއަންތައް ހަދައިގެން ނިކުންނަން. ނިކުމެ މުޅި މަސްވެރިކަމުގެ ސިނާއަތު މަސްވެރިންގެ އަތް ދަށަށް ނަގައި، މަހުގެ އަގު އަލުން އަނބުރާ 25 ރުފިޔާއަށް ހަދަން މަސައްކަތް ކުރަން،" މައުރޫފް
ބޮޑު ކަންނެލި މަސްވެެރިންގެ ޔޫނިއަން (ބީކޭޔޫއެމް) ގެ ހިންގާ ކޮމިޓީގެ މެންބަރަކަށް ވެސް ހުންނެވި މައުރޫފް ވިދާޅުވީ އެ ޖަމިއްޔާއިން އައީ މަސްވެރިކަމާ ގުޅުން ހުރި ކަންކަމުގައި ކުރީގެ ސަރުކާރާ އެކު މަޝްވަރާ ކުރަމުން ކަމަށެވެ.
އެ ގޮތުން ރާއްޖޭން ބޭރު ކުރާ މަހަށް ނަގާ 25 އިންސައްތައިގެ ޑިއުޓީ ނުލައި މަސް ބޭރު ކުރެވޭނެ ގައުމުތައް އޭރު ހޯދައި އެ ގައުމުތަކާ އެކު އައީ މަޝްވަރާތައް ކުރެވެމުން އައި ކަމަށް އޭނާ ވިދާޅުވި އެވެ. ކަންނެލި ގަނެވޭނެ އެންމެ ދަށް އަގު ކަނޑައެޅުމަށް ސަރުކާރާއި މަސް ގަންނަ ކުންފުނިތަކާ އަދި މަސްވެރިންގެ ޖަމިއްޔާތަކުން އޭރު އައީ މަޝްވަރާތައް ކުރަމުން ކަމުގަ އެވެ.
