ޑިވެލޮޕްމެންޓް ބޭންކު ހުޅުވަނީ އެސްއެމްއީ ހަބު ހިންގާ އިމާރާތުގައި
ބިޒްނަސް ސެންޓަ ކޯޕަރޭޝަން (ބީސީސީ)ގެ ދަށުން ހިންގަމުން އަންނަ އެސްއެމްއީ ހަބު ހިންގާ އިމާރާތުގައި ފައިނޭންޝަލް އޮޓޯރިޓީއާއި ޑިވެލޮޕްމަންޓް ބޭންކު ހުޅުވަން އިކޮނޮމިކް މިނިސްޓްރީން ނިންމައިފި އެވެ.
އެގޮތުން ބީސީސީ ހިންގާ ދެ ފްލޯ މިކަމަށްޓަކައި ހުސްކުރަން އެ ކޯޕަރޭޝަނުން ވަނީ ނިންމައިފަ އެވެ.
ހުސްކުރަން ނިންމީ އެންމެ ތިރީގައި ހިންގާ ފްލޯއާއި އެންމެ މަތީގައި މުނިފޫހިފިލުވުމުގެ ވަސީލަތްތަކާއިއެކު ހުރި ފްލޯ އެވެ. ކުދި އަދި މެދުފަންތީގެ ވިޔަފާރިތަކަށް ހާއްސަކޮށްގެން ހިންގާ އޮފީސް މިހާރެކޭ އެއްގޮތަށް އެ އިމާރާތުގެ ދެވަނަ ފަންގިފިލާގައި ހިންގާނެ އެވެ.
އެސްއެމްއީ ހަބު ހިންގާ އިމާރާތަކީ އަމިއްލަ ފަރާތަކުން ކުއްޔަށް ނަގާފައިވާ އިމާރާތެކެވެ. އެހެންކަމުން އާމްދަނީ ދެކޮޅު ނުޖެހޭތީ ހިންގުމުގެ ހަރަދު ކުޑަކުރަން ވިސްނަމުން ދާކަމަށް ބީސީސީން ވަނީ ބުނެފަ އެވެ.
ޗާންދަނީ މަގުގައި ހުންނަ ބީސީސީ އޮފީސް އިމާރާތުގައި ޑިވެލޮޕްމެންޓް ބޭންކު ހުޅުވާއިރު އެ ބޭންކަކީ ސަރުކާރުގެ ސިޔާސަތުތަކާ އެއްގޮތްވާ ގޮތުގެ މަތީން، ދެމެހެއްޓެނިވި އިޤްތިޞާދީ އަދި އިޖުތިމާޢީ ތަރައްޤީއަށް އިންވެސްޓުކުރުމާއި، ޢުމްރާނީ ތަރައްޤީއަށް ބޭނުންވާ ފައިސާ ހޯދަން ސަރުކާރުން ހަދާ ބޭންކެކެވެ.
ފައިނޭންޝަލް އޮތޯރިޓީ މެދުވެރިކޮށް އޯފް-ޝޯ ފައިނޭންސިން ޚިދުމަތްތަކުގެ އިތުރުން، އޮން-ޝޯ ފައިނޭންސިން ޚިދުމަތްތައް ފޯރުކޮށްދިނުމަށް ބޭނުންވާ ޤާނޫނީ އޮނިގަނޑު އެކުލަވައިލާނެ އެވެ.
Ads by STO
