ކޮރަޕްޝަން އޮތްވަރު ދެނެގަންނަން ހާއްސަ ޕޯޓަލްއެއް
ކޮރަޕްޝަނުގެ ހިރާސް ވަޒަންކުރުމަށް ހާއްސަކުރެވިފައިވާ "ހިންމި" ޕްލެޓްފޯމް މިއަދު އިފްތިތާހު ކޮށްފި އެވެ.
އެ ޕްލެޓްފޯމް އިފްތިތާހްކޮށްދެއްވީ އުމަރު ޒާހިރު އޮފީސް ބިލްޑިން ގައި ބޭއްވުނު އެންޓި ކޮރަޕްޝަން ކޮމިޝަންގެ "ހިންމި" ޕްލެޓްފޯމް އިފްތިތާހުކުރުމުގެ އަދި މުވައްޒަފުންގެ އަގު ވަޒަން ކުރުމުގެ ޖަލްސާގައި ނައިބު ރައީސް ހުސައިން މުހައްމަދު ލަތީފެވެ.
އޭސީސީން ބުނީ އެ ޕްލެޓްފޯމްގައި ކޮރަޕްޝަންގެ ހިރާސް އިދާރާތަކުގައި އޮތް މިންވަރު އެ އިދާރާއަކުން އަމިއްލައަށް ދެނެގަނެ ވަޒަންކުރުމަށް ބޭނުންވާނެ މައުލޫމާތާއި އެފަދަ އެސެސްމެންޓެއް ހިންގުމުގައި އަމަލުކުރަންޖެހޭ ގޮތުގެ އިރުޝާދާއި ލަފާ ހިމަނާފައިވާނެ ކަމަށެވެ.
އިދާރާއެއްގެ ތެރޭގައި ކޮރަޕްޝަނަށް ހުރި ހިރާސްތައް ދެނެގަނެ އެ ފުރުސަތުތައް ނައްތާލުމަށް މަސައްކަތްކުރެވޭނެ ގޮތުގެ މަގުދައްކައިދޭ ޓޫލްކިޓް ހިމެނޭ އެ ޕްލެޓްފޯމްގެ މަގްސަދަކީ ދައުލަތުގެ އިދާރާތަކުން ރައްޔިތުންނަށް ފޯރުކޮށްދޭ ހިދުމަތްތަކުގައި ދެފުށްފެނުމާއި، ޖަވާބުދާރީ ކުރުވުމުގެ ސިފަތައް އަށަގެންނެވުމަށް ބާރުއަޅައި ކޮރަޕްޝަނަށް ހުޅުވިފައިހުރި ހިރާސްތަކުގެ ދާއިރާތައް ދެނެގަނެ، މެދުރާސްތާގައި އެ ދާއިރާތަކުގައި ކޮރަޕްޝަން އޮތް މިންވަރު ދެނެގަތުން ކަމަށް އޭސީސީން ބުންޏެވެ.
އޭސީސީން ބުނީ "ހިންމި" ޕްލެޓްފޯމް މެދުވެރިކޮށް އިދާރާތަކުން ފުރިހަމަކުރާ ކަންކަމުގައި ހިމަނައި މަޢުލޫމާތުގެ ސިއްރުކަން ހިފަހައްޓައިދެވޭ ގޮތަށް ވަކި ލޮގްއިންއަކުން އިދާރާތައް ރަޖިސްޓްރީ ކުރެވިގެންދާނެ ކަމަށެވެ.
އެ ޕްލެޓްފޯމް މެދުވެރިކޮށް ކޮރަޕްޝަންގެ ހިރާސް ދެނެގަތުމަށް ހަދާ އެސެސްމެންޓްއަށް ބޭނުންވާ ފަންނީ އެހީތެރިކަން ކޮމިޝަނުން ފޯރުކޮށްދިނުމަށްވަނީ ހަމަޖެހިފައިވެ އެވެ. އަދި މީގެ އިތުރުން ދައުލަތުގެ އިދާރާތަކުން އެ ބަޔަކު ތިބި ތަނެއްގައި ތިބެގެން އަމިއްލައަށް އެބައެއްގެ ހިންގުމުގެ ނިޒާމުގައި ހުރި ކޮރަޕްޝަންގެ ހިރާސް ދެނެގަނެ، ރަނގަޅު ކުރަންވީ ކަންކަން ބެލޭނެ އެވެ. އަދި ހިރާސްކުޑަ ކުރުމަށް އޮޓޯ ޖެނެރޭޓްކުރާ މޮނިޓަރިންގ އަދި އިވެލުއޭޝަން ޕްލޭން ތަންފިޒުކުރުމުގެ އެހީތެރިކަން ފޯރުކޮށްދެވޭނެ ކަމަށް އޭސީސީން ބުންޏެވެ.
އޭސީސީން ބުނީ، ވަރަށް އަވަހަށް ސަރުކާރު އަދި ސަރުކާރު ހިއްސާވާ ކުންފުނިތަކުގެ ހިންގުމުގެ ނިޒާމުގައި ހުންނަ ކޮރަޕްޝަންގެ ހިރާސް ދެނެގަތުމަށް ހާއްސަކުރެވޭ ކޮރަޕްޝަން ރިސްކް އެސެސްމެންޓް ޓޫލް، ހިންމި ޕްލެޓްފޯމް ގުޅާލެވި، ކުންފުނިތަކުގެ ކޯޕަރޭޓް ގަވަނެންސް އަދި އިންޓެގްރިޓީ ހަރުދަނާ ކުރުމަށް މަސައްކަތްފެށިގެން ދާނެ ކަމަށެވެ.
