ބްރިޖުން ޓޯލް ނެގުމަކީ އަޅުގަނޑުގެ ސިޔާސަތެއް ނޫން: ރައީސް
މާލެ ސަރަހައްދުގެ ބްރިޖާއި ހައިވޭތައް ބޭނުންކުރާ އުޅަނދުތަކުން ޓޯލް ފީއެއް ނެގުމަކީ އެމަނިކުފާނުގެ ސިޔާސަތެއް ނޫން ކަމަށް ރައީސް ޑރ މުހައްމަދު މުއިއްޒު މިއަދު ވިދާޅުވެއްޖެ އެވެ.
ސިނަމާލެ ބްރިޖުގައި ޓޯލް ނިޒާމު ގާއިމްކޮށް ފީއެއް ތައާރަފްކުރަން ނިންމިކަން އިއުލާންކުރީ ރޭ، މާލޭ ސަރަހައްދުގެ މަގުތައް އަމާންކުރުމާއި ރައްކާތެރިކުރުމަށް ސަރުކާރުން އެކުލަވާލި "މާލެ ފަހި" ޕްރޮގްރާމުގަ އެވެ.
"ބްރިޖް އިން ޓޯލް ނެގުމަކީ އަޅުގަނޑު ގެ ސިޔާސަތެއްނޫން" ރަސްމީ އެކައުންޓުން 'އެކްސް' ގައި ކުރެއްވި ޕޯސްޓެއްގައި ރައީސް ވިދާޅުވި އެވެ.
އެމަނިކުފާނު ވިދާޅުވީ މާލެފަހި" ޕްލޭންގައި ޓޯލް ނެގުމާމެދު ދިރާސާއެއްކުރުމަށް ހިމަނާފައިވަނީ ފަންނީ ލެވެލްގައި އެކަމުގެ ލަފާ އެރުވުމުގެ ނިޔަތުގައި ކަމަށެވެ. އެގޮތުން ލިބޭ ފަންނީ ލަފާގައި ޓޯލް ނަގަން ހުށަހެޅުން އަޔަސް، މާލެ ސިޓީގެ މަގުތައް އެއްކޮށް ރަނގަޅު ފެންވަރަކަށް ހަދާ ނިމުމުގެ ކުރިން އަދި އެކަށީގެންވާ މިންވަރަކަށް ޕާކިންގެ މައްސަލަ ހައްލު ވުމުގެ ކުރިން އެފަދަ ކަމެއް ނުނިންމަވާނެ ކަމަށެވެ.
"ގައުމާއި ރައްޔިތުންގެ އިގްތިސާދީ ހާލަތު އެކަށީގެންވާ ފެންވަރަކަށް މަތިވުމުގެ ކުރިން ޓޯލް ނަގަން ނުފަށާނެ ކަމުގެ ޔަގީންކަން އަރުވަން" ރައީސް މުއިއްޒު ވިދާޅުވި އެވެ.
އަންނަ މަހު ޓޯލް ނެގުމާއި ގުޅޭ ގޮތުން ދިރާސާއެއް ކުރަން ނިންމާފައިވާއިރު، ޓޯލް ނަގަން ފަށާނެ ތާރިހަކާއި ގުޅޭ ގޮތުން "ދެން" އިން ސުވާލުކުރުމުން ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ އަމާޒު ހިފާފައިވަނީ އަންނަ އަހަރު ފަހުކޮޅަށް ފީއެއް ތައާރަފްކުރުމަށް ކަމަށެވެ.
"ޓޯލް ނެގެން ފެށޭނީ އަންނަ އަހަރު (2025) ފަހުކޮޅު ނުވަތަ އޭގެ އަނެއް އަހަރު ކުރީ ކޮޅުގައި" އަމީން ވިދާޅުވި އެވެ.
އަމީން ވިދާޅުވީ, ބްރިޖުން ޓޯލް ނެގުމަކީ ދުނިޔޭގެ ހުރިހާ ގައުމެއްގައި ވެސް ކުރަމުން އަންނަ ކަމެއް ކަމަށެވެ. ޗައިނާގެ ހިލޭ އެހީއާ ސަރުކާރުން ހަރަދުކޮށް އަޅާފައިވާ ސިނަމާލެ ބްރިޖްގެ މަސައްކަތް ފެށުމުގެ ކުރިން ވެސް ޓޯލް ނަގަން ޕްލޭން ކޮށްފައިވާކަން މިނިސްޓަރު ވިދާޅުވި އެވެ.
"ބްރިޖް ހުޅުވުމުގެ ކުރިން ވެސް އޮތީ ހުރިހާ ސާވޭއެއް ހަދާފައި, ތައްޔާރީތަކެއް ވެފައި, ޓޯލް އިންޓްރޮޑިއުސް ކުރަން. ނަމަވެސް އޭރު އިލެކްޝަން ކައިރިވެފައި އޮތުމާއި, ވެރިކަން ބަދަލުވުމާއެކު އެކަން ނުކުރެވި އޮތީ" އެއީ ކުރީގެ ރައީސް އަބްދުﷲ ޔާމީންގެ ސަރުކާރުގައި މަޝްވަރާކޮށްފައި އޮތް ކަމެއްކަން ހާމަކުރައްވަމުން ވިދާޅުވި އެވެ.
Ads by STO
