ސިޔާސީ މަގާމުތަކުގެ އަދަދު ވަކިވަރެއްގައި ހިފަހެއްޓެން ޖެހޭ: ޝުޖާއު
ސިޔާސީ މަގާމުތަކުގައި ތިބޭ މީހުންގެ އަދަދު ކެޕް ކުރުން ނުވަތަ އެއްވަރެއްގައި ހިފަހެއްޓަން ބާރަށު ދާއިރާގެ ޕީއެންސީ މެންބަރު އިބްރާހިމް ޝުޖާއު މިއަދު ވިދާޅުވެއްޖެ އެވެ.
މަޖިލިހުގެ މެންބަރުންގެ އަދަދު މަދު ކުރުމާ ގުޅޭ ގޮތުން މެންބަރުންގެ ހިޔާލު ހޯދުމަށް ޝުޖާއު ގަރާރެއް ހުށަހަޅުއްވާފައިވެ އެވެ. އެ ގަރާރުގެ މަޝްވަރާއަށް މިނިވަން މުއައްސަސާތަކާއި ބެހޭ ކޮމިޓީން މިއަދު ބޭއްވި ބައްދަލުވުމުގައި ޝުޖާއު ވިދާޅުވީ މާލީ ގޮތުން ދައުލަތުން އުފުލަން ޖެހޭ ބުރަ ކުޑަކުރުމަކީ ތިންބާރުންވެސް އެކުއެކީގައި ކުރަންޖެހޭ ކަމެއް ކަމަށެވެ. އެއީ ހަމައެކަނި މަޖިލީހުގެ ހަރަދުތައް ކުޑަކުރުން ނޫން ކަމަށާއި، ސިޔާސީ މަގާމުތަކުގެ ކުރެވޭ ހޭދަވެސް ކުޑަކުރަން ޖެހޭ ކަމަށް ވިދާޅުވި އެވެ.
"ސިޔާސީ ޓޯކިން ލައިން ހަމައެކަނި ބަދަލުކޮށްލައިގެން އެޖެސްޓް ކުރެވޭ ވަރަށްވުރެ. އަޅުގަނޑު ގަބޫލުކުރާ ގޮތުން ރައްޔިތުންގެ މަޖިލީސް ކެޕް ކުރުމާއި ސިޔާސީ މަގާމުތަކުގައި ތިއްބަވާ ބޭފުޅުން ކެޕްކުރުމަކީ މިހާރު ގާނޫނު ހަދައިގެން ގެންނަން ޖެހޭ ބަދަލެއް" ޕީއެންސީގެ ސީނިއާ ޑެޕިއުޓީ ޕީޖިީ ލީޑަރު ޝުޖާއު ވިދާޅުވި އެވެ.
ސިޔާސީ މަގަމާތުތައް ވަކި އަދަދެއްގައި ހިފެހެއްޓެން ޖެހޭ ކަމަށް ޝުޖާއު ވިދާޅުވެފައިވާއިރު، މި ސަރުކާރުގެ ސިޔާސީ މަގާމުތައް 700 އަށްވުރެ ދަށުގައި ހިފެހެއްޓުމަކީ ރައީސް ޑރ މުހައްމަދު މުއިއްޒުގެ ރިޔާސީ ވައުދުފުޅެކެވެ. އެހެން ނަމަވެސް މިނިސްޓްރީތަކާއި ކުންފުނިތަކަށް ސިޔާސީ ގޮތުން އައްޔަންކޮށްފައިވާ މީހުންގެ އަދަދު އިތުރުވެފައިވާތީ އިދިކޮޅުގެ ފާޑުކިޔުން ސަރުކާރަށް ވަނީ އަމާޒުވެފަ އެވެ. މި ސަރުކާރުގެ ސިޔާސި މަގާމުތަކުގެ އަދަދު ރަސްމީކޮށް އަދި މީހާތަނަށް ހާމަކޮށްފައެއް ނުވެ އެވެ. އެކަމަކު އެ އަދަދުތައް ހާމަކުރާނެ ކަމަށް ރައީސް އޮފީހުން މީގެ ކުރިން ބުނެފައިވެ އެވެ.
