ހައްޔަރުކުރި އިކްރާމަކީ ދަނޑުގައި މާރާމާރީ ހިންގި މައްސަލާގައި ހެކި ނެތިގެން ދޫކޮށްލި މީހެއް
އިއްޔެ ހުޅުމާލޭ ދެވަނަ ފިޔަވަހީގައި، ސްޕޯޓްސް ކާރަކުން ސައިކަލެއްގައި ޖެހި އެކްސިޑެންޓުވި މައްސަލާގައި ހައްޔަރުުކުރި މީހުންގެ ތެރޭގައި މީގެ ކުރިން މާރާމާރީގެ ތުހުމަތުގައި ފުލުހުންގެ ބެލުމުގެ ދަށަށް ގެންދިޔަ މީހަކު ހުރިކަން ހާމަވެއްޖެ އެވެ.
އެކްސިޑެންޓުވި ސްޕޯޓްސް ކާރުގައި ތިބި ތިން ފިރިހެނުން، ކޯޓު އަމުރުގެ ދަށުން ރޭ ހައްޔަރުކޮށް، އެ މީހުންގެ ވަނަވަރުވެސް ވަނީ ހާމަކޮށްފަ އެވެ. އޭގެ ތެރޭގައި ހިމެނެނީ:
- ކ. މާލެ/ ހ. ނޫރާންމާގެއާގެ، އިކުރާމުއްރަހްމާން
- ކ. މާލެ/ މ.ލޭންޑްއޮފްގާޑަން، އިބްރާހިމް އިކްރާމް، (33އ)
- ގއ. ކަނޑުހުޅުދޫ/ އާޒާދުގެ، ޖިނާހު އިސްމާއީލް
މި މީހުންގެ ތެރޭގައި ހިމެނޭ އިބްރާހިމް އިކްރާމް އަކީ މިއަހަރުގެ ފެބްރުއަރީ 13, ވަނަ ދުވަހު ގަލޮޅު ދަނޑުގައި ދެ ވަނަ ޑިވިޝަނުގެ ކުއާޓާ ފައިނަލުގައި ކުޑަހެންވޭރު ޔުނައިޓެޑް އާއި ވިކްޓަރީ ސްޕޯޓްސް ކްލަބް ކުޅުނު މެޗުގައި މާރާމާރި ހިންގިކަމުގެ ތުހުމަތުގައި ފުލުހުންގެ ބެލުމުގެ ދަށަށް ގެންދިޔަ މީހެކެވެ.
ފުލުހުން އޭނާ ހައްޔަރުކުރީ ދަނޑުގައި މާރާމާރީ ހިންގައި، ބިރުދައްކައި އިންޒާރު ދިނުމުގެ އިތުރުން އާންމު މަސްލަހަތަށް ގެއްލުން ދިންކަމުގެ ތުހުމަތުގަ އެވެ.
ކްރިމިނަލް ކޯޓުން ފެބްރުއަރީ، 20 ގައި އާއްމުކޮށްފައި ކޯޓު އަމުރުން އެނގޭ ގޮތުގައި އެ މާރާމާރީގައި އިކްރާމްގެ މައްޗަށް މީހެއްގެ ގައިގައި ޖެހިކަމުގެ ތުހުމަތު ނުކުރެވުނު ނަމަވެސް ފުރަތަމަ ދަނޑަށް އެރި މީހުންގެ ތެރޭގައި އޭނާ ހިމެނޭ ކަމަށާއި، އަދި އޭނާގެ ފަހަތުން ދެން ތިބި މީހުންވެސް ދަނޑަށް އެރި ކަމަށެވެ.
އެ ކޯޓު އަމުރުގައި ވީޑީއޯ ފުޓޭޖްއާ ހަވާލާދީ ބުނެފައިވަނީ އޭނާ ކުށެއް ކުރާ މަންޒަރު ނުވަތަ ކުށެއްކުރުމަށް ހިތްވަރު ދިންކަމުގެ އެއްވެސް ހެއްކެއް ނެތް ކަމަށެވެ. އެހެންވެ ކޯޓުން ވަނީ އޭނާ ބަންދުކުރަން ނުފެންނަން ކަމަށް ކަނޑައަޅާފަ އެވެ.
