އޯއައިސީ ފިގުހު އެކަޑަމީގެ މެންބަރަކަށް ޝަހީމް އައްޔަންކުރައްވައިފި
އިސްލާމީ ގައުމުތަކުގެ ޖަމިއްޔާ އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) ގެ އިންޓަނޭޝަނަލް އިސްލާމިކް ފިގުހު އެކަޑަމީގެ މެންބަރަކަށް އިސްލާމިކް މިނިސްޓަރު ޑރ މުހައްމަދު ޝަހީމް އަލީ ސައީދު އައްޔަންކުރައްވައިފި އެވެ.
އެކަން ހާމަކޮށްފައިވަނީ އިސްލާމިކް މިނިސްޓްރިގެ ރަސްމީ އެކައުންޓުން "އެކްސް" ގައި ކުރި ޕޯސްޓެއްގަ އެވެ.
މިނިސްޓްރީން ބުނީ، ޝަހީމް އެ މަގާމަށް އައްޔަންކުރައްވާފައިވަނީ މި މަހުގެ 8 ވަނަ ދުވަހު ބޭއްވި އޯއައިސީގެ ފިގުހު އެކަޑަމީގެ އިދާރީ ބައްދަލުވުމުގައި ކަމަށެވެ.
ޝަހީމް ވަނީ މީގެ ކުރިން އޯއައިސީގެ ސެކްރެޓަރީ ޖެނެރަލްގެ އެޑްވައިޒަރުކަމާއި، އޯއައިސީގެ ވޮއިސް އޮފް ވިސްޑަމް ސެންޓަރުގެ އިންޗާޖުކަންވެސް ކުރައްވާފަ އެވެ.
މުސްލިމު ވޯލްޑް ލީގް (ރާބިތަތުލް އާލަމީލް އިސްލާމީ) ގެ އެންމެ މަތީ މަޖިލީހުގެ މެންބަރަކަށް އޭޕްރިލް މަހު ޝަހީމް އައްޔަންކުރައްވާފައިވެ އެވެ.
ދުނިޔޭގެ އެންމެ ނުފޫޒު ގަދަ 500 މުސްލިމު ލީޑަރުންގެ ލިސްޓުގައި ހިމެނިވަޑައިގެންނެވި ޝަހީމް ވަނީ ރާއްޖޭގެ އިސްލާމިކް ޔުނިވާސިޓީގެ ވައިސް ޗާންސެލަރުކަމާއި، އެ ޔުނިވާސިޓީގެ ޗާންސެލަރުކަމުގެ މަގާމުވެސް ފުރުއްވާފަ އެވެ. މަދީނާ ޔުނިވަސިޓީން ކިޔަވާ ވިދާޅުވީ ޝަހީމް އަކީ ކީރިތި ގުރުއާނާ ބެހޭ މަރުކަޒުގެ މުޝްރިފް މުސާއިދުކަމާއި، ވިލާކޮލެޖްގެ ފެކަލްޓީއޮފް ޝަރީއާގެ (ފައުންޑިން) ޑީންކަމުގެ މަގާމުވެސް ފުރުއްވާފައިވާ ބޭފުޅެކެވެ.
މީގެ ކުރިންވެސް އިސްލާމިކް މިނިސްޓަރުކަން ކުރެއްވި ޝަހީމް އަކީ ދީނީ އަދި އިލްމީ މައުލޫތަކުގައި ވަރަށް ގިނަ ފޮތްތައް ލިޔުއްވާފައިވާ ބޭފުޅެކެވެ. ޝަހީމް އަކީ ދީނީ ހޭލުންތެރިކަމާ އިލްމު ފެތުރުއްވުމުގައި ވަރަށް މަގްބޫލު ބޭފުޅެކެވެ.
