މާވަށު ކައުންސިލް ތަފާތު: ޓީޗަރުންނަށް ގާއިމުކޮށްދިނީ ކޮފީ ކޯނަރެއް، ދެން އެކުރަނީ ހުރިހާ ކްލާހެއް އޭސީ
ޓީޗަރުންނަށް ހާއްސަ ކޮފީ ކޯނަރެއް ގާއިމުކޮށްދިނުމަށް ފަހު ރަށު ސްކޫލުގެ ހުރިހާ ކްލާސް ރޫމްތަކެއް އޭސީ ކުރުމަށް ލ. މާވަށު ކައުންސިލުން ތައްޔާރުވެއްޖެ އެވެ.
ނިމިދިޔަ ޓީޗަރުންގެ ދުވަހުގެ މުނާސަބަތުގައި މާވަށު ކައުންސިލުން ވަނީ އެ ފަރާތްތަކަށް ހާއްސަ ކޮފީ ކޯނަރެއް ސްކޫލުގައި ގާއިމުކޮށްދީފަ އެވެ. އެ ކޮފީ ކޯނަރު ހަދައިދީފައި ވަނީ ސްޓާފް ރޫމުގަ އެވެ. އެފަދަ ތަނަކަށް ބޭނުންވާނެ މެޝިނަރީސް އާއި ތަކެއްޗާ އެކު ހުޅުވި ކޯނަރަށް ގާތްގަނޑަކަށް 16،000 ރުފިޔާ ހޭދަކުރި އެވެ.
ކައުންސިލުގެ ރައީސް، އަހްމަދު މޫސާ "ދެން" އަށް ވިދާޅުވީ މާވަށު ސްކޫލުގެ ހުރިހާ ކްލާސް ރޫމެއް އޭސީ ކުރުމުގެ މަސައްކަތަށް ދެ ލައްކަ ރުފިޔާ ބަޖެޓުކޮށް މި އަހަރު ފެށުނުއިރު މަސައްކަތު ތާވަލުގައި ހިމަނާފައިވާ ކަމަށެވެ. ކައުންސިލުގެ ވިސްނުން އޭރު ހުރީ 24،000 ބީޓީޔޫގެ އެއް އޭސީއިން ކޮންމެ ކްލާހަކަށް ފުދޭނެ ކަމަށް ކަމަށެވެ. ނަމަވެސް އެޑިޔުކޭޝަން މިނިސްޓްރީ އާއެކު ބޭއްވި މަޝްވަރާ ބައްދަލުވުމަށްފަހު، އެ މިނިސްޓްރީން ލަފާދީފައި ވަނީ 18،000 ބީޓީޔޫގެ ދެ އޭސީ ކޮންމެ ކްލާހެއްގައި ބެހެއްޓުމަށެވެ. އަދި ކޮމްޕިއުޓަރު ލެބްގައި 24،000 ބީޓީޔޫގެ ދެ އޭސީ އެޅުވުމަށެވެ.
ޓީޗަރުންގެ ދުވަހުގެ މުނާސަބަތުގައި އެ ފަރާތްތަކަށް ހާއްސަކޮށް ހުޅުވި ކޮފީ ކޯނަރު / ފޮޓޯ:މާވަށު ކައުންސިލް
"އަޅުގަނޑުމެން އަތުން އެބަދޭ 32 އޭސީ 18،000 ބީޓީޔޫގެ. އެ އާއެކުގައި 24،000 ބީޓީޔޫގެ ދެ އޭސީ. އެހެންވުމުން އަޅުގަނޑުމެން އޭރު ބަޖެޓުކުރި ވަރަށް ވުރެ ތަންކޮޅެއް އެބަ ބޮޑުވޭ. ލައްކައެއްހާ ރުފިޔާ ގާތްގަނޑަކަށް ބޮޑުވޭ،" އަހްމަދު ވިދާޅުވި އެވެ.
އޭސީ ހަރުކުރުމުގެ މަސައްކަތް ކުރުމަށް ހަމަޖެހިފައި ވަނީ އެ ކައުންސިލާއި ރަށު ފެނަކަ ބްރާންޗާ އަދި ގޭމް ޖަމިއްޔާ އާ ގުޅިގެންނެވެ. މަސައްކަތަށް ފެނަކައިގެ އެހީތެރިކަން ލިބޭނެކަން ޔަގީންކުރެވިފައިވާއިރު، ގޭމްއިން ވެސް ވަރަށް ބޮޑަށް ތައްޔާރުވެފައިވާ ކަމަށް އޭނާ ވިދާޅުވި އެެވެ. މަސައްކަތަށް ބޭނުންވާ ކަންކަން ދެނެގަތުމަށް ކަމާ ގުޅުންހުރި ޓީމްތަކުން މިދިޔަ ބުރާސްފަތި ދުވަހު ހުރިހާ ކްލާސް ރޫމެއް ޗެކްކުރި އެވެ.
"މިހާރު ދަނީ އެއްޗިއްސަށް ރިކުއެސްޓް ކުރުމާއި އިއުލާނު ކުރުމާ އެފަދަ ކަންކަން. އުންމީދު ކުރަނީ މި އަހަރު ނިމުމުގެ ކުރިން އަޅުގަނޑުމެންނަށް ހުރިހާ ކްލާސް ރޫމެއް އޭސީ ކުރެވިގެންދާނެ ކަމަށް،" އަހްމަދު ވިދާޅުވި އެވެ.
ހުރިހާ ކްލާސް ރޫމްތަކެއް އަހަރު ނިމޭއިރަށް އޭސީ ކުރުމަށް ވަނީ އަމާޒު ހިފާފައި / ފޮޓޯ:މާވަށު ކައުންސިލް
ފާހަގަކުރެއްވީ ރަށު ކައުންސިލުން މަސައްކަތް ކުރަނީ ހުރިހާ އެންމެނަށް އެކަމަކުން ފައިދާ ކުރަނިވި، ދިގު މުއްދަތަކަށް ދެމި ހުންނަ ކަންކަން ކުރުމަށް ކަަމަށެވެ. ކައުންސިލުގެ ރައީސް އެދިވަޑައިގެންނެވީ ރަށްތަކުގެ ކައުންސިލުތަކުން ވެސް ގިނަ ބަޔަކަށް ފައިދާކުރަނިވި ދެމެހެއްޓެނިވި ތަރައްގީގެ ކަންކަން ކުރެއްވުމަށެވެ.
