ހުސްވެފައިވާ ޓެކްސް އެޕީލް ޓްރައިބިއުނަލްގެ 4 މެންބަރުންގެ މަގާމަށް 13 ބޭފުޅަކު, ކޮމިޓީއަށް!
ހުސްވެފައިވާ ޓެކްސް އެޕީލް ޓްރައިބިއުނަލްގެ 4 މެންބަރުންގެ މަގާމަށް 13 ބޭފުޅަކު ކުރިމަތިލައްވައިފި އެވެ.
ޓެކްސް އެޕީލް ޓްރައިބިއުނަލްގެ 4 މެންބަރުން ވަކިކުރަން ރައީސް ޑރ. މުހައްމަދު މުއިއްޒަށް ލަފާދިނުމަށް ރައްޔިތުންގެ މަޖިލީހުން ފާސްކޮށްފައިވަނީ އޮގަސްޓް މަހުގެ 19 ވަނަ ދުވަހެވެ. އެގޮތަށް ލަފާދޭން ނިންމާފައިވަނީ ޓެކްސް އެޕީލް ޓްރައިބިއުނަލާ ގުޅޭ ގޮތުން ޖުޑިޝަރީ ކޮމިޓީން ހުށަހަޅާފައިވާ މައްސަލައާ ގުޅިގެން އެ ކޮމިޓީން ކުރި ދިރާސާ އަށް ފަހު އެވެ.
ރައީސް މުއިއްޒު މަޖިލީހަށް ފޮނުވި ސިޓީފުޅު މިއަދުގެ ރައްޔިތުންގެ ޖަލްސާގައި އިދާރީ މޭޒުން އިއްވާފައިވެ އެވެ. އެ ސިޓީގައި ހިމަނާފައިވަނީ އެ މަގާމުތަކަށް އާންމުކޮށް އިއުލާނުކުރުމުން ކުރިމަތިލައްވާފައިވާ ބޭފުޅުންގެ ނަންތަކެވެ.
- ހަސަން ޒުހައިރު މުހައްމަދު, ގ. މާވަރުލު
- އާއިޝަތު އާދަމް, ރިވެލި, ރ. އަލިފުށި
- އިބްރާހިމް ޝަރީފް, ގ. އަލިޝާ
- ޝިފްޒާ އަބްދުލް ގައްޔޫމް, ގަސްދޮށުގެ, ގއ. ނިލަންދޫ
- އަހުމަދު ސައީދު, މ. ފަތްކޯނިހުޅަނގުބައި
- އަބްދުالله އަބްދުލް ހަކީމް, އަޒާން ޕެލަސް, ޅ. ނައިފަރު
- މުހައްމަދު އަމީން ޒާހިރު, ނީލާ, ސ. ހިތަދޫ
- މުހައްމަދު ފާރިސް ތޯހާ, ހ. ސޯސަން
- އަބްދުލް ޣަނީ މުހައްމަދު, ހ. ހޯސްސައިޑް
- އަހުމަދު އަލީ, ހުޅާމެލެ ފްލެޓް ނަންބަރު 108/G/1
- އަލީ ރިޒާ އިސްމާއިލް, ހުޅުމާލެ ހިޔާ 2/13/03
- ފާތިމަތު ޝަފީނާޒް/ ހުޅުމާލެ ގޯތި ނަންބަރު 1021
- މަޖީދު އަލީ/ މަތަރެސްމާގެ, ގއ. ދާންދޫ
އެ ނަންތަކުގެ ތެރެއިން ޓެކްސް އެޕީލް ޓްރައިބިއުނަލްއަށް އައްޔަންކުރާނެ 4 ބޭފުޅުންގެ ނަން ފާސްކޮށްދިނުމަށް ރައީސް ގެ ސިޓީފުޅުގައި އެދިވަޑައިގެންނެވި އެވެ.
އެއާއެކު އެ މައްސަލަ ދިރާސާކުރަން ޖުޑިޝަރީ ކޮމިޓީއަށް ފޮނުވަން ނިންމި އެވެ.
ޓެކްސް އެޕީލް ޓްރިބިއުނަލްގެ މައްސަލަ ދިރާސާކުރުމަށްފަހު ހުށަހެޅި ރިޕޯޓުގައި ނިންމާފައިވާ ކަންކަމުގެ ގޮތުގައި އެ ކޮމިޓީގެ މުގައްރިރު, މަނަދޫ ދާއިރާގެ މެންބަރު ހުސްނީ މުބާރިކު ވިދާޅުވީ އެ ޓްރައިބިއުނަލަށް ހުށަހަޅާ މައްސަލަ ބަލާ ބެންޗު ކަނޑައެޅުމުގައި މެންބަރުންގެ މެދުގައި ހަމަހަމަކަން ނެތް ކަމަށެވެ. އަދި އެއީ އެ އުސޫލާ މެދު ސުވާލު އުފެއްދުމުގެ ޖާގަ އޮތް އުސޫލެއް ކަމަށް ހުސްނީ ވިދާޅުވި އެވެ.
ބެންޗު ކަނޑައަޅަނީ އެންމެ ރަނގަޅަށް ނޫންކަން ފާހަގަކުރައްވާ ހުސްނީ ވިދާޅުވީ 94 މައްސަލަ ބަލާއިރު 60 މައްސަލަ ބަލާ ބެންޗުގައި އެއް މެންބަރަކު ހިމެނޭ ކަމަށާއި 32 މައްސަލަ ބަލާ ބެންޗުގައި އެއް މެންބަރަކު ހިމެނޭ ކަމަށެވެ.
ހުސްނީ ވިދާޅުވީ ޓްރައިބިއުނަލަށް ހުށަހަޅާ މައްސަލަ ބެލުމުގެ ގާބިލުކަން ކޮންމެ މެންބަރެއްގެ ކިބައިގާ ހުންނަން ޖެހޭއިރު, މިހާތަނަށް އެއްވެސް ރައުޔެއް ލިޔެފައި ނުވާ މެންބަރަކު ހިމެނޭ ކަމަށެވެ.
ގާނޫނުގައި ކަނޑައަޅާފައިވާ މުއްދަތުގެ ތެރޭގައި މައްސަލަ ނިމޭ މިންވަރު މަދުކަން ފާހަގަކުރައްވާ ހުސްނީ ވިދާޅުވީ 180 ދުވަސް ތެރޭގައި މައްސަލަ ނިންމަން އޮތްއިރު އެ ގާނޫނަށް އަމަލު ކުރަން ފެށި ފަހުން 51 މައްސަލަ ހުށަހެޅުނު އިރު އޭގެ ތެރެއިން 47 މައްސަލަ އޮތީ ނުނިމި ކަމަށެވެ.
ކޮމިޓީން ނިންމާފައިވަނީ އެކަށީގެންވާ ވަރަށް ވުރެ ބޮޑު ޖާގައެއްގައި އެތަން ހިންގަމުންދާތީ ހަރަދުކުޑަކުރަން އެ މަގުން މަަސައްކަތް ކުރަން އެންގުމަށެވެ. އަދި ބެންޗާއި ރިޔާސަތު ކަނޑައެޅުމުގައި އަމަލުކުރަމުންދާ އުސޫލު ކޯޓުތަކުގައި ބެންޗު ކަނޑައަޅާ އުސޫލު މުރާޖާކުމަށްވެސް ކޮމިޓީން ނިންމާފައިވެ އެވެ.
ހުސްނީ ވިދާޅުވީ ކޮމިޓީއަށް ފާހަގަކުރެވުނު ބައެއް ކަންކަމުގެ ތެރޭގައި ކޮރަޕްޝަންގެ ބައެއް ކަންކަން ހިމެނޭ ކަމަށެވެ. އެހެންކަމުން އެ މައްސަލަ ބަލަން އޭސީސީއަށް ފޮނުވަން ނިންމާފައިވެ އެވެ.
