ޖޫރިމަނާ ކުރަމުންދާތީ އިދިކޮޅުން "ހައްޤު ފޮށި" ބަހައްޓައިފި
އިދިކޮޅު ޕީޕީއެމް/ޕީއެންސީ އިން ބާއްވާ ހަރަކާތްތަކާއި ގުޅިގެން ސަރުކާރުން ޖޫރިމަނާގެ ފިޔަވަޅުތަކެއް އަޅަމުންދާތީ، "ހައްޤު ފޮށި" ގެ ނަމުގައި އެކޯލިޝަނުން ފަންޑު ފޮށްޓެއް ބަހައްޓައިފިއެވެ.
މިއަދު ހަވީރު ކޯލިޝަން އޮފީހުގައި ބޭއްވި ޙަފްލާއެއްގައި މިފަންޑު ފޮށި ހުޅުވައި ދެއްވީ ޕްރޮގްރެސިވް ކޯލިޝަންގެ އެޑްވައިޒަރ އަދި ކުރީގެ ރައީސް މުޙައްމަދު ވަހީދު ޙަސަން މަނިކެވެ.
ރައީސް ވަހީދު އާއި އިދިކޮޅު ކޯލިޝަންގެ ބައެއް ބޭފުޅުން ވަނީ އެފަންޑު ފޮށްޓަށް ފައިސާ ލައްވާފައެވެ.
ކޮންމެ ދުވަހަކު ވެސް އިދިކޮޅު ކޯލިޝަންގެ ސަޕޯޓަރުންނަށް އެކޯލިޝަން އޮފީހަށް ގޮސް ފަންޑު ފޮށްޓަށް ފައިސާގެ އެހީ ދެވޭނެ ކަމަށާއި ރަށްރަށުގައި ތިބި ސަޕޯޓަރުންގެ ތެރެއިން ފައިސާގެ އެހީ ދޭން ބޭނުންވާ މީހުން 773000013564 މިއެކައުންޓު ނަންބަރަށް ފައިސާ ޖަމާކޮށްގެން އެހީވެވިދާނެ ކަމަށް ވެސް އިދިކޮޅު ކޯލިޝަނުން ބުނެފައިވެއެވެ.
އިދިކޮޅު ކޯލިޝަނުން "ހައްޤު ފޮށި" ބަހައްޓާފައިވާއިރު، ސިޔާސީ ޕާޓީތަކުގެ ގާނޫނާއި އެއްވެ އުޅުމުގެ ގާނޫނާއި އެޗްޕީއޭގެ ގައިޑްލައިންތަކާ ހިލާފަށް އެ ކޯލިޝަން އިން ސިޔާސީ ހަރަކާތް ހިންގި ކަމަށް ބުނެ އިލެކްޝަންސް ކޮމިޝަން (އީސީ) އިންވަނީ އެ ކޯލިޝަން 75،000 ރުފިޔާއިން ޖޫރިމަނާ ކޮށްފައެވެ.
މީގެ އިތުރުން އިދިކޮޅު ފަރާތްތަކުން އިންތިޒާމު ކޮށްގެން މާލޭގައި ބޭއްވި ސައިކަލު ބުރަކާއި ގުޅިގެން، ފުލުހުން ވަނީ އެކޯލިޝަންގެ ބައެއް އިސް ބޭފުޅުން 1000 ރުފިޔާއިން ވެސް ޖޫރިމަނާ ކޮށްފައެވެ.
