ހުއްދު ނުހޯދާ ބޮޑު ހިލަ ޖެހުމުން ހުރަވަޅި ރިސޯޓް ޖޫރިމަނާކޮށްފި
ތިމާވެށީގެ ގޮތުން ނިންމި ގޮތުގެ ލިޔުމަކާ ނުލައި ފަޅު ތެރޭގައި ބޮޑު ހިލަ ޖެހުމުން ޅ. އަތޮޅުގައި ހިންގަމުން އަންނަ ހުރަވަޅި އައިލެންޑް ރިސޯޓު 20،000ރ ޖޫރިމަނާކޮށްފި އެވެ.
އެންވާރަމަންޓް ޕްރޮޓެކްޝަން އެޖެންސީ (އީޕީއޭ) އިން ސަރުކާރުގެ ގެޒެޓްގައި ކޮށްފައިވާ އިއުލާނެއްގައި ބުނީ ބޮޑު ހިލަ ޖަހާފައިވަނީ އެ ރިސޯޓުގެ އިރުމަތީ ފަރާތުން ފަޅު ތެރޭގައި ކަމަށެވެ.
އެ މަސައްކަތް ކޮށްފައިވަނީ ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓް ހެދުމަކާ ނުލާ ކަމަށް އިއުލާނުގައި ބުންޏެވެ.
އީޕީއޭއިން ބުނީ އެހާ ކުޑަ އަދަދަކަށް އެ ރިސޯޓް ޖޫރިމަނާކޮށްފައިވަނީ ތިމާވެއްޓަށް އަސަރުފޯރާނެ މިންވަރު ބަޔާންކުރާ ގާނޫނުގެ ދަށުން އެ ކުށް ކުރި، ފުރަތަމަ ފަހަރު ކަމަށްވާތީ ކަމަށެވެ. އަދި އެ ރިސޯޓު ޖޫރިމަނާކޮށްފައިވަނީ މިދިޔަ ހޯމަ ދުވަހުގައި ކަމަށްވެސް އިއުލާނުގައިވެ އެވެ.
ޖޫރިމަނާގެ ފައިސާ 30 ދުވަސް ތެރޭގައި އީޕީއޭ އަށް ދައްކަން ހުރަވަޅި ރިސޯޓަށް ވަނީ އަންގާފަ އެވެ.
ހުރަވަޅި ރިސޯޓަކީ މަޝްއޫރު ވިޔާފާރިވެރިޔާ ޗަމްޕާ މުހައްމަދު މޫސާ (އުއްޗު) ގެ ރިސޯޓެކެވެ.
