ލާމަރުކަޒީ ނިޒާމަށް ހުރަސް އެޅޭކަމުގެ ކަންބޮޑުވުމާ އެކު އެމްޑީޕީން ލޯކަލް ގަވަންމަންޓް މިނިސްޓްރީއަށް
ސަރުކާރުގެ ފަރާތުން ގާނޫނުތަކަށް ގެންނަމުންދާ ބަދަލުތަކާ ގުޅިގެން ލާމަރުކަޒީ ނިޒާމަށް ހުރަސް އެޅޭކަމުގެ ކަންބޮޑުވުމާ އެކު އިދިކޮޅު މައި ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ސިޓީސް، ލޯކަލް ގަވަންމަންޓް އެންޑް ޕަބްލިކް ވާކްސް މިނިސްޓްރީއަށް ގޮސްފި އެވެ.
އެމްޑީޕީގެ ގައުމީ މަޖިލިހުގެ މެމްބަރުންގެ ޓީމަކުން މިއަދު ލޯކަލް ގަވަންމަންޓް މިނިސްޓްރީއަށް ގޮސްފައި ވަނީ ރައްޔިތުންގެ މަޖިލިހުން ފާސްކުރަމުންދާ ބައެއް ގާނޫނުތަކުގެ ސަބަބުން ލާމަރުކަޒީ ނިޒާމަށް ހުރަސް އެޅެމުންދާތީ އެކަމުގެ ކަންބޮޑުވުންތައް ހިއްސާ ކުރުމަށެވެ.
އެ ޓީމުގެ ފަރާތުން ނޫސްވެރިންނާ ބައްދަލުކޮށް ދެއްކި ވާހަކައިގައި ހުޅުމާލެ ދާއިރާގެ ކުރީގެ މެމްބަރު އަލީ ނިޔާޒު ވިދާޅުވީ އިސްލާހުތަކާ މެދު ކައުންސިލުތަކުގެ ކަންބޮޑުވުން އެބައޮތް ކަމަށެވެ. ރައްޔިތުންގެ މަޖިލިހަށް ހުށަހަޅާފައިވާ ބިލުތަކުން ލާމަރުކަޒީ ނިޒާމަށް ގެއްލުންވާ ކަމަށެވެ.
"ލާމަރުކަޒީ ނިޒާމް ރާއްޖޭގައި އޮތްއޮތުމުގެ މަގުސަދު އެއްކޮށް ގެއްލޭ ގޮތަށް އެކިއެކި ބިލުތައް ފާސްކުރަމުންދާ މައްސަލަ. މި މައްސަލައިގައި އަޅުގަނޑުމެން މިހާތަނަށް މަޑުން ތިއްބަސް، ކައުންސިލުތަކުގެ ޖަމިއްޔާ އާއި ވަކިވަކި ކައުންސިލުތަކާ މި ހުރިހާ ބޭފުޅުން ވެސް މިކަމުގައި ކަންބޮޑުވޭ،" ނިޔާޒު ވިދާޅުވި އެވެ.
އެމްޑީޕީގެ ފަރާތުން މިފަހުން ވަނީ ބޮޑުތިލަދުންމަތީގައި ތިބި އެ ޕާޓީއަށް ނިސްބަތްވާ ކައުންސިލަރުންނާއި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުންނަށް ހާއްސަކޮށް "ލާމަރުކަޒީ ގުޅުން" ގެ ނަމުގައި ބައްދަލުވުމެއް ބާއްވާފަ އެވެ. އެ ބައްދަލުވުމުގައި ބައިވެރިވި ކައުންސިލަރުންނަށް ވަނީ މަޖިލިހުން ފާސްކުރަމުންދާ ބައެއް ގާނޫނުތަކުގެ ސަބަބުން ލާމަރުކަޒީ ގާނޫނަށް ހުރަސް އެޅެމުންދާތީ އެ ނިޒާމުގެ ދިފާއުގައި މަސައްކަތް ކުރުމަށް އިގުރާރެއްވެފަ އެވެ.
އެމްޑީޕީގެ ފަރާތުން މިއަދު ލޯކަލް ގަވަންމަންޓް މިނިސްޓްރީއަށް ޒިޔާރަތްކުރީ ކަމާ ގުޅޭގޮތުން ހުރި ކަންބޮޑުވުންތައް މިނިސްޓްރީ އާއި މިނިސްޓަރާ ހިއްސާ ކުރުމަށް ކަމަށް ނިޔާޒު ވިދާޅުވި އެވެ. އެ ޒިޔާރަތުގެ ކުރިން މިނިސްޓަރާ އެކު މުއާމަލާތު ކުރެވުނު ކަމަށެވެ.
"އަޅުގަނޑުމެން ވެސް ގަބޫލުކުރަނީ ވަޒީރަކީ މިކަމުގައި ސަރުކާރުގެ ފަރާތުން އެންމެ އިސްކޮށް މަސައްކަތްކުރާ މީހާ ވީމާ މިކަމުގެ ކޮންސާން ވަޒީރު އައްސަވަން ބޭނުންފުޅުވާނެ ކަމަށް،" ނިޔާޒު ވިދާޅުވި އެވެ.
މަޖިލިހުގެ ކޮމިޓީ ބައްދަލުވުމުގައި ގާނޫނަށް ބަދަލު ގެނައުމުގެ މަރުހަލާގައި ލޯކަލް ގަވަންމަންޓް މިނިސްޓްރީ އާ މަޝްވަރާކުރެވިފައި ނުވާކަން އެ މިނިސްޓްރީގެ ފަރާތުން ބައިވެރިވެ ވަޑައިގެންނެވި ބޭފުޅުން ފާހަގަކުރައްވާފައިވާ ކަމަށެވެ. ވުމާ އެކު މިނިސްޓަރާ ބައްދަލުކޮށް މިހާރު ވެސް ކަން ހިނގަމުންދަނީ އެގޮތަށްތޯ އާއި މިނިސްޓަރަށް ސަރުކާރުން އެއްބާރުލުން ނުލިބެނީތޯ ސުވާލުކުރަން ބޭނުންވާ ކަމަށެވެ.
"ސިޓީސް މިނިސްޓްރީއެއް އުފެއްދުމުގެ އެންމެ ބޮޑު އެއް ބޭނުމަކަށް ވެފައި އޮތީ ވަޒީރުންގެ މަޖިލިހުގައި ސީދާ ކައުންސިލަރުންގެ އަޑު އުފުލުން. ކުރީގައި ކެބިނެޓްގައި އޮތް ވުޒާރާއެއް ވެސް ނޫން،" ނިޔާޒު ވިދާޅުވި އެވެ.
ނިޔާޒު ވިދާޅުވި ގޮތުގައި ވަކި މިނިސްޓްރީއެއް އުފެއްދުމުން މިނިސްޓަރުގެ ޒިންމާއަކަށް ވާނީ ކައުންސިލްތަކާ ގުޅޭގޮތުން ކެބިނެޓުގައި ވާހަކަ ދެއްކުން ކަމުގަ އެވެ. ހުރި ކަންބޮޑުވުންތައް ކެބިނެޓާ ހަމައަށް ގޮސްފައިވޭތޯ ސާފުކުރަން ބޭނުންވާ ކަމުގަ އެވެ.
ލޯކަލް ގަވަންމަންޓް މިނިސްޓްރީއަށް އެމްޑީޕީގެ ޓީމުން ދިޔައީ މިނިސްޓަރާ ބައްދަލުކޮށް ހުރި ކަންބޮޑުވުންތައް ހިއްސާކޮށް ސިޓީ މިނިސްޓަރުގެ އަތްޕުޅަށް އަރުވަން ކަމުގައި ފާހަަގަކުރެއްވި އެވެ.
