ޒުވާނުންނަށް އަގުހެޔޮ އުމްރާ ޕެކޭޖްތަކެއް ތައާރަފް ކުރަން މިނިސްޓަރު ގޮވާލައިފި
ހައްޖު އަދި އުމްރާ ގްރޫޕުތަކުން މިހާރު އާންމުކޮށް އުފައްދާފައިވާ ޕެކޭޖްތަކަށް ބަދަލުތަކެއް ގެނެސް، ހާއްސަކޮށް ޒުވާނުންނަށް އަގުހެޔޮ ޕެކޭޖުތައް ތައާރަފްކުރުމަށް އިސްލާމިކް މިނިސްޓަރު މުހައްމަދު ޝަހީމް އަލީ ސައީދު ގޮވާލައްވައިފި އެވެ.
އިސްލާމީ މަރުކަޒުގެ ޖަލްސާކުރާ މާލަމުގައި ބޭއްވި ދިވެހިރާއްޖޭގައި ބޭއްވޭ ފުރަތަމަ ހައްޖު އުމްރާ ކޮންފަރެންސްގައި ވާހަކަދައްކަވަމުން ޝަހީމް ވިދާޅުވީ ރައީސް ޑރ. މުހައްމަދު މުއިއްޒުގެ އަމާޒަކީ ހައްޖާއި އުމްރާގެ ނިޒާމަށް ހެޔޮ ބަދަލުތަކެއް ގެނެސްދެއްވާ ރައްޔިތުންނަށް ލުއިފަސޭހަކަމާއެކު ހެޔޮ އަގުގައި ހައްޖާއި އުމްރާގެ އަޅުކަން އަދާކުރެވޭނެ މަގު ތަނަސްކޮށްދިނުން ކަމަށެވެ.
ޝަހީމް ވިދާޅުވީ ރާއްޖޭގެ ހައްޖު އަދި އުމްރާގެ ނިޒާމަށްވެސް ހެޔޮ ބަދަލުތަކެއް އަންނަން ޖެހޭ ކަމާއި އެކަން އެންމެ ފުރިހަމައަށް ކުރެވޭނީ އުމްރާ އަދި ހައްޖު ގުރުޕޫތަކަކަށް ކަމަށެވެ.
"އިލްމީ އަދި ތަރުބަވީ މައުލޫމާތުތަކެއް ދަތުރުތަކުން ލިބޭނެ ފަދަ ގޮތަކަށްވެސް ޕެކޭޖުތަކަށް ބަދަލުތައް ގެނައުމަކީވެސް މުހިންމުކަމެއް"
އޭގެ އިތުރުން މިނިސްޓަރު ވިދާޅުވީ ރާއްޖެ އިން އާންމުކޮށް މިހާރު އުމްރާއަށް ގެންދާ ޕެކޭޖްތަކުގައި، ކޮންމެ މީހަކަށް ނުދެވިދާނެ ކަމަށެވެ. ނަމަވެސް 20،000ރ. އަށް ނުވަތަ 15،000ރ. އަށް ލިބޭ ޕެކޭޖުތަކެއް ތައާރާފް ކޮށްފިނަމަ ގާބިލުކުރަން ހުންނަ މީހުން ތިބޭނެ ކަމަށް މިނިސްޓަރު ވިދާޅުވި އެވެ.
ޝަހީމް ވިދާޅުވީ މައްކާ އާއި މަދީނާގައި ވެސް ޕެކޭޖްތަކުގެ އަގު ބޮޑުވަނީ ހަރަމްފުޅާ ކައިރިން ހޮޓަލްތައް ނަގާތީ ކަމަށެވެ.
"އަޒީޒިއްޔާގައި ތިބޭ ގޮތަށް ހުޅުވާލާ ޕެކޭޖުތައް އަގުހެޔޮވާނެ. ކޮނޑުގައި ދަބަސް އަޅުވާލައިގެން ބާރުގަދަ ޒުވާނުންނަށް ބަހުގައި ފަސް ނަމާދަށް އާދެވޭނެ. ހުރިހާ ނަމާދަކަށް ހަރަމްފުޅަށް ދެވޭނެ،"
ޝަހީމް ވިދާޅުވީ ރާއްޖެއިން މީހުން އުމްރާއަށް ގެންދިއުމުގެ ކަންކަމަށް ނިޒާމީ ހެޔޮ ބަދަލެއް އަންނަ ޖެހޭ ކަމަށެވެ.
"މިހާރު ކަންތައް ހަމަޖެހިފައިވާގޮތުން ސައުދީ އަރަބިއްޔާއިންވެސް ބޮޑަށް ބާރުއަޅަނީ ހައްޖުގެ ކަންކަން ދައުލަތުގެ ބެލުމުގެ ދަށުގައި ބާއްވަން. އެހެން ނަމަވެސް އުމްރާގެ ކަންކަންކަމަކީ އެންމެނަށްވެސް ހުޅުވާލެވިފައިވާ ކަންކަން."
އެ ކޮންފަރެންސްއަކީ ރައީސްގެ އިރުޝާދުގެ ދަށުން ދިވެހިރާއްޖެއިން މީހުން ހައްޖާއި އުމްރާ އަށް ގެންދިއުމުގެ ނިޒާމު އިތުރަށް ހަރުދަނާކުރުމަށްޓައި މަޝްވަރާކުރުމުގެ މަގުސަދުގައި ބާއްވާ ކޮންފަރެންސްއެއް ކަމަށް ޝަހީމް ފާހަގަކުރެއްވި އެވެ.
ކޮންފަރެންސް ރާވާލާފައިވަނީ ހައްޖާއި އުމްރާއާއި ގުޅޭ ޕެނަލް ޑިސްކަޝަންތަކާއި ކީނޯޓު ސްޕީކަރުންގެ ވާހަކަދެއްކެވުން ހިމެނޭ ގޮތަށެވެ. ޕެނަލް ޑިސްކަޝަންތަކުގައި ހައްޖާއި އުމްރާއާއި ގުޅުންހުރި އެކި މުއައްސަސާތަކުގެ ބޭފުޅުންނާއި، ދީނީ އިލްމުވެރިން ބައިވެރިވާ ގޮތަށް ވަނީ ހަމަޖެހިފަ އެވެ.
