ކޮންމެ ގެއެއްގައި މައުލޫމާތަށް ފާރަވެރިވާނެ މީހެއް ބަހައްޓަން ޖެހޭ: ނާޒިމް
ޖަމާއަތުގެ ފެންވަރުގައި މީޑިއާއަށް ހޭލުންތެރި މުޖުތައެއް ބިނާކުރުމަށް "ކޮންމެ ގޭބީސީއެއްގައި މައުލޫމާތަށް ފާރަވެރިއެއް" ބެހެއްޓުމުގެ މޮޑެލްއެއް ރައްޔިތުންގެ މަޖިލިހުގެ ނައިބު ރައީސް އަދި ދިއްގަރު ދާއިރާގެ މެމްބަރު އަހްމަދު ނާޒިމް ހުށަހަޅުއްވައިފި އެވެ.
އޮސްޓްރޭލިއާގެ ވެރި ރަށް، ސިޑްނީގައި މިހާރު ކުރިއަށްދާ ކޮމަންވެލްތު ޕާލަމެންޓަރީ އެސޯސިއޭޝަންގެ ކޮންފަރެންސްގައި ކުރެއްވި ތަގުރީރުގައި ނާޒިމް ވަނީ މީޑިއާގެ މިނިވަންކަން ދެމެހެއްޓުމަށް މަސައްކަތް ކުރަމުން، މިއަދުގެ ޑިޖިޓަލް ވެށީގައި ކުރިމަތިވަމުންދާ ފޭކް ނިއުސް އާއި މަސްނޫއީ މީޑިއާއަށް މުޖުތަމައު އަހުލުވެރިކޮށް، ކޮމަންވެލްތުގެ ގައުމުތަކުން އާންމުންގެ ހޭލުންތެރި ކަމަށް މަސައްކަތް ކުރުމާ ގުޅޭގޮތުން ވާހަކަ ދައްކަވާފަ އެވެ.
އެ ކޮންފަރެންސްގައި ބަހުސްކޮށްފައިވާ މައުލޫއަކީ ފޭކް މިޑިއާ އާއި މަސްނޫއީ މީޑިއާގެ އުފެއްދުމުގެ ޒަމާނުގައި މީސްމީޑިއާގެ ޕޯސްޓްތަކަށް ލައިކު ޖެހުމާއި ވޯޓުދޭއިރު، ޑިމޮކްރެސީގެ މިނިވަން ވެށި ހިމާޔަތްކޮށް ހަރުދަނާ ކުރުމުގައި ކޮމަންވެލްތުގެ ޕާލަމެންޓުތަކަށް އަދާކުރެވިދާނެ ދައުރާ ބެހޭ ގޮތުންނެވެ.
އެގޮތުން ފޭކް ނިއުސް އާއި ސިންތެޓިކް މީޑިއާގެ ސަބަބުން، ހިޔާލު ފާޅުކުރުމުގެ މިނިވަން ކަމަށާއި ޑިމޮކްރަސީއަށް ކުރިމަތިވާ ނުރައްކާތަކަށް ނާޒިމް އަލިއަޅުއްވާލެއްވި އެވެ.
"ފޭކް ނިއުސް އާއި މަސްނޫއީ މީޑިއާއިން ހަމައެކަނި މުޖުތަމައާއި ފަރުދުންނަށް އޮޅުވާލަނީކީއެއް ނޫން. އެއީ މުޅި ޑިމޮކްރެޓިކް ނިޒާމު ގަޑުބަޑުކޮށްލައި ހަލަބޮލިކޮށްލާ ވަސީލަތެއް،" ނާޒިމް ވިދާޅުވި އެވެ.
ފޭކް ނިއުސްގެ ދާއިރާއިން ކުރެވިފައިވާ ދިރާސާތަކަށް އަލިއަޅުއްވާލައްވަމުން ވިދާޅުވީ މީސްމީޑިއާގައި ފެތުރޭ ދޮގު މައުލޫމާތަކީ ހަގީގީ ތެދު މައުލޫމާތަށް ވުރެ ހަ ގުނަ ބާރަށް ފެތުރޭ މައުލޫމާތު ކަމަށެވެ.
ނާޒިމްގެ ވާހަކައިގައި ކޮމަންވެލްތުގެ ގައުމުތަކުން، ތައުލީމީ ނިޒާމުގައި ބޭނުން ކުރުމަށް މީޑިއާ ލިޓެރެސީ ކަރިކިއުލަމެއް އެކުލަވާލުމަށް ގޮވާލެއްވި އެވެ. އެ ކަރިކިއުލަމަކީ ހުރިހާ އުމުރުފުރައަކަށް އެކަށޭނެ އަދި މެމްބަރު ގައުމުތަކުގެ އަމިއްލަ ސަގާފަތަށް ބައްޓަން ކުރެވޭ މަންހަޖެއް ކަމުގައި ހެދުމަށް އެދިވަޑައިގެންނެވި އެވެ.
"މި ޒަމާނުގައި މިޑިއާއަށް މުޖުތަމައު އަހުލުވެރި ކުރުމަކީ އިހުތިޔާރީ ހުނަރެއް ނޫން. އެއީ ޑިމޮކްރެޓިކް ވެށްޓެއްގައި ފަރުދުންނާއި ޖަމާއަތް ބައިވެރިވެ ބިނާކުރަނިވި މަސައްކަތެއް ކުރުމަށް ޓަކައި ހޭލުންތެރި ރައްޔިތެއް ބިނާ ކުރުމަށް ކޮންމެހެން ބޭނުންވާ އަސާސީ ހުނަރެއް،" ނާޒިމް ވިދާޅުވި އެވެ.
ނާޒިމް ހުށަހެޅުއްވީ ޕްރައިމަރީ ސްކޫލުން ފެށިގެން މަތީ ސާނަވީ ތައުލީމާ ހަމައަށް ހުރިހާ އުމުރުފުރައަކާ ގުޅޭ މަންހަޖެއް އެކުލަވާލުމަށް ކޮމަންވެލްތު ޕާލަމެންޓަރީ އެސޯސިއޭޝަނުން ވޯކިން ގްރޫޕެއް އެކުލަވާލުމަށެވެ. އަދި އެފަދަ ވޯކިން ގްރޫޕެއްގައި ރާއްޖެއިން ފުރިހަމައަށް ބައިވެރިވާނެ ކަމުގެ ޔަގީންކަން އެމަނިކުފާނު ދެއްވި އެވެ.
އޭގެ އިތުރުން ހުށަހެޅުއްވީ ކޮމަންވެލްތުގެ ގައުމުތަކުގެ ސްކޫލުތަކުގައި މީޑިއާ ލިޓެރެސީގެ މާއްދާ ކިޔަވައި ދިނުމަށާއި އެކަމަށް ބޭނުންވާ ޓީޗަރުން ތަމްރީނުކޮށް، ވަސީލަތްތައް ކަނޑައެޅުމުގައި ގައުމުތަކުގެ ޕާލަމެންޓުން އެހީތެރިވެ ދިނުމަށެވެ.
"ފޭކް ނިއުސް އާއި މަސްނޫއީ މީޑިއާއިން އަޅުގަނޑުމެންގެ ޑިމޮކްރެޓިކް މުއައްސަސާތައް ހިމާޔަތްކުރެވޭނީ ޖަމާއަތުގެ ދިފާއުގެ ފުރަތަމަ އައްޑަނަ ކަމަށްވާ، އަޅުގަނޑުމެންގެ ތައުލީމީ ނިޒާމު ހަރުދަނާކޮށްގެން،" ނާޒިމް ވިދާޅުވި އެވެ.
ގައުމީ މުހިންމު މައްސަލަތަކަށް ސްކޫލު ނިޒާމުގެ ތެރެއިން، ދަރިވަރުން މެދުވެރިކޮށް ބެލެނިވެރިންނާއި ޖަމާއަތް ހޭލުންތެރި ކުރުމުގައި ކާމިޔާބު މަސައްކަތެއް ކުރެވިދާނެ ކަމަށް ވިދާޅުވެ ރާއްޖެއިން ހިންގާފައިވާ ސްކޫލު ހެލްތުގެ ކާމިޔާބު ޕްރޮގްރާމަށް ނާޒިމް އަލިއަޅުއްވާލެއްވި އެވެ. އެ ރޮނގުން ރާއްޖޭން ގައިންގަޔަށް އަރާބަލިތައް ކޮންޓްރޯލުކޮށް، ޕަބްލިކް ހެލްތުގެ ދާއިރާއިން ހޯދި ކާމިޔާބީ ފާހަގަކުރެއްވި އެވެ.
ނާޒިމްގެ ވާހަކައިގައި އިތުރަށް ހުށަހެޅުއްވީ، "ކޮންމެ ގޭބިސީއެއްގައި މައުލޫމާތަށް ފާރަވެރިއެއް" ބެހެއްޓުމަށެވެ. "ހައުސްހޯލްޑް އިންފޮމޭޝަން ގާޑިއަން" އަކީ މީޑިއާއަށް ހޭލުންތެރިވެފައިވާ ދަރިވަރުން، އެ ދަރިވަރުންގެ މީޑިއާ ލިޓެރެސީގެ ހުނަރުތައް ބެލެނިވެރިންނާއި ޖަމާއަތާ އެކު ހިއްސާ ކުރުމުން ޖަމާއަތުގެ ފެންވަރުގައި މީޑިއާއަށް ހޭލުންތެރި މުޖުތައެއް ބިނާކުރުމަށް ހުށަހެޅުއްވި މޮޑެލްއެކެވެ.
ނާޒިމްގެ ވާހަކަ ނިންމަވާލައްވަމުން ރާއްޖޭގައި މީޑިއާ އާއި ތައުލީމީ ދާއިރާގެ ތަރައްގީއަށް އޮސްޓްރޭލިއާއިން ފޯރުކޮށްދޭ ދެމެހެއްޓެނިވި އެއްބާރުލުމަށް ޝުކުރު އަދާކުރެއްވި އެވެ. ދެ ގައުމުގެ ދެމެދު އޮތް ގުޅުމަކީ "ކޮމަންވެލްތުގެ މެމްބަރުންގެ މެދުގައި އެއްބާރުލުމުގެ މޮޑެލެއް" ކަމަށް ވެސް ސިފަކުރެއްވި އެވެ.
"ގާނޫނު ހަދާ މަޖިލީހުގެ މެންބަރުންގެ ގޮތުގައި ތިބެ، އަޅުގަނޑުމެނަށް އަތް އުރާލައިގެން ތިބެވޭކަށެއް ނެތް. ޑިމޮކްރެޓިކް ވެށީގެ މިނިވަންކަމާއި ނަޒާހަތްތެރިކަން ދަމަހައްޓައި، ހިމާޔަތްކޮށް، ކޮންމެ ރައްޔިތަކަށް ވެސް ހަގީގަތާއި ހިޔާލީ ވާހަކަތައް ވަކިކުރެވޭނެ ގޮތް ހަދައިދީ، އެކަން ކަށަވަރު ކުރުމަކީ އަޅުގަނޑުމެންގެ ކޮނޑުގައި އެޅިފައިވާ މަސްއޫލިއްޔަތެއް! ވާޖިބެއް!،" ނާޒިމް ވިދާޅުވި އެވެ.
ސިޑްނީގެ އިންޓަނޭޝަނަލް ކޮންވެންޝަން ސެންޓަރުގައި ބޭއްވި 67 ވަނަ ކޮމަންވެލްތު ޕާލަމެންޓްރީ ކޮންފަރެންސްގައި 56 ގައުމެއްގެ މަންދޫބުން ވަނީ ފުޅާވަމުންދާ ޑިޖިޓަލް ލޭންޑްސްކޭޕްގައި ޑިމޮކްރެސީ ރައްކާތެރިކުރުމުގެ ސްޓްރެޓެޖީތަކާ ބެހޭގޮތުން ފުޅާ ދާއިރާއެއްގައި މަޝްވަރާ ކުރައްވާފަ އެވެ.
