އިތުރު ދެ އިސްލާހަކާއެކު ސިޔާސީ ޕާޓީގެ ގާނޫނުގެ ބިލު މުޅި މަޖިލިސް ކޮމިޓީން ފާސްކޮށްފި
އިތުރު ދެ އިސްލާހަކާއެކު ސިޔާސީ ޕާޓީތަކުގެ ގާނޫނަށް އިސްލާހު ގެނައުމަށް ރައްޔިތުންގެ މަޖިލީހަށް ހުށަހެޅި ބިލު މުޅި މަޖިލިސް ކޮމިޓީން މިއަދު ފާސްކޮށްފި އެވެ.
އެ ބިލު ކޮމިޓީން ފާސްކޮށްފައިވަނީ 40 މެންބަރުންގެ އިއްތިފާގުންނެވެ.
އެ ބިލު މަޖިލީހަށް ހުށަހެޅުއްވީ ސަރުކާރުގެ ފަރާތުން ދިއްދޫ ދާއިރާގެ މެންބަރު އަބްދުލް ލަތީފް މުހައްމަދެވެ.
މިހާރުވެސް ޕާޓީއެއްގެ މެންބަރުކަމަށް ގަވާއިދާ ހިލާފަށް މީހެއްގެ ނަން ހުށަހަޅައިފިނަމަ އެކަން ކުރި ފަރާތެއް 5,000ރ އާއި 10,000ރ ދެމެދުގެ އަދަދަކުން ޖޫރިމަނާކުރެވޭނެ ކަމަށް ގާނޫނުގައި ބަޔާންކޮށްފައިވެ އެވެ.
އެ ގާނޫނުގެ އެހެން މާއްދާއަކާ ހިލާފުވެއްޖެނަމަ 30,000ރ އާއި 75,000ރ އާ ދެމެދުގެ އަދަދަކުން ޖޫރިމަނާކުރާނެ ކަމަށް މިހާރުވެސް ގާނޫނުގައި ބުނެފައިވާއިރު އެ ޖޫރިމަނާގެ އިތުރުން އެއްލައްކައިން ޕާޓީ ޖޫރިމަނާކުރަން މި ބިލުގައި ހުށަހަޅާފައިވެ އެވެ.
ހުށަހަޅާފައިވާ އިސްލާހުތަކުގެ ތެރޭގައި ސިޔާސީ ޕާޓީތަކަށް ދައުލަތުގެ ބަޖެޓުން ފައިސާ ދިނުމަށްވެސް ބަދަލު ގެންނަން ހުށަހަޅާފައިވެ އެވެ. މިހާރު އެ ފައިސާ ދެމުން އައީ ދައުލަތުގެ އަހަރީ ބަޖެޓުގެ 0.1 އިންސައްތައާއި 0.2 އިންސައްތަ އާ ދެމެދު އަދަދެކެވެ. އެހެންނަމަވެސް މި އިސްލާހުގައި ބުނެފައިވަނީ ދެން އެ ފައިސާ ދޭނީ ދައުލަތުގެ ބަޖެޓުގައި ލަފާކުރާ އާމްދަނީގެ 0.1 އިންސައްތައާއި 0.2 އިންސައްތަ އިންނެވެ.
އޭގެ އިތުރުން އެއްވެސް އިންތިހާބެއްގައި ސިޔާސީ ޕާޓީގެ ޓިކެޓް ހޯދުމަށް އެ ޕާޓީގެ ޕްރައިމަރީގައި ވާދަކޮށްފައިވާ މެންބަރަކު، އެ އިންތިހާބު ގައި އެހެން އެއްވެސް ހައިސިއްޔަތަކުން ވާދަކޮށްގެން ނުވާނެ ކަމަށް ބަޔާންކޮށްފައިވާ މާއްދާ އުނިކުރުން ވެސް ބިލުގައި ހިމަނާފައިވެ އެވެ.
އެ ގާނޫނުގައި މިހާރުވެސް މިހެން ބުނެފައިވީ ނަމަވެސް ޕްރައިމަރީގައި ވާދަކޮށް އަމިއްލަ ގޮތުން ވާދަކޮށްފައި އެބަ ހުއްޓެވެ.
އެ ބިލަށް ކޮމިޓީ މަރުހަލާގައި ދެ އިސްލާހު ހުށަހެޅުއްވީ ފަރެސްމާތޮޑާ ދާއިރާގެ މެންބަރު އަޝްރަފް ރަޝީދެވެ.
އެ ގާނޫނުގެ 1 ވަނަ މާއްދާއަށް އިތުރުކުރަން ހުށަހެޅި އިސްލާހުގައި ބުނެފައިވަނީ ސިޔާސީ ޕާޓީއެއްގެ ގޮތުގައި ސިޔާސީ ޕާޓީގެ ދަފްތަރުގައި ރަޖިސްޓްރީ ކޮށްފައިވާ ސިޔާސީ ޕާޓިއެއް މި ގާނޫނާ އެއްގޮތްވާ ގޮތުގެ މަތިން އުވާލެވޭ ހާލަތެއްގައި އުވާލެވޭ ޕާޓީއަކުން ބޭނުންކޮށްގައި ނަމާއި ނިޝާނާއާއި ސައްކައާއި ކުލަ އެ ނޫން ވެސް ޕާޓީ ރަމްޒުކޮށްދޭ އެއްޗެހި އަލަށް އުފައްދަން ހުށަހަޅާ ސިޔާސީ ޕާޓީއަކަށް ބޭނުންކުރެވޭނީ އެ ސިޔާސީ ޕާޓީއެއް އުވާލާ ތާރީހުން ފެށިގެން 5 އަހަރު ފަހުން ކަމަށެވެ.
އެ އިސްލާހަށްހެންވޭރު އުތުރު ދާއިރާގެ މެންބަރު އަހުމަދު އައިފާން ތާއީދުކުރެއްވި އެވެ. އެ އިސްލާހަށް ވޯޓަށް އެހުމުން ފާސްވެފައިވަނީ 41 މެންބަރުންގެ އިއްތިފާގުންނެވެ.
ދެވަނަ އިސްލާހަކީ އެ ގާނޫނުގެ 30 ވަނަ މާއްދާގެ (ހ) ގެ 4 ވަނަ ނަންބަރު އުނިކުރުން ހުށަހެޅި އިސްލާހެކެވެ. އެ ގާނޫނުގެ 30 ވަނަ މާއްދާގައި ސިޔާސީ ޕާޓީއެއް އުވާލުމުގެ 4 ވަނަ ނަންބަރުގައި ބުނެފައިވަނީ 5 އަހަރަކުން 1 ފަހަރު ޕާޓީގެ ގައުމީ ބައްދަލުވުމެއް ނުބޭއްވުމެވެ. އެ އިސްލާހަކީ އެ މާއްދާ އުވާލަށް ހުށަހެޅި އިސްލާހަކަށްވާއިރު އެ އިސްލާހަށް ބާރަށު ދާއިރާގެ މެންބަރު އިބްރާހިމް ޝުޖާއު ތާއީދުކުރެއްވި އެވެ.
އެ އިސްލާހު ފާސްވެފައިވަނީ 39 މެންބަރުންގެ އިއްތިފާގުންނެވެ.
