އެޕާޓްމަންޓަކަށް ވަދެ މުދަލަށް ގެއްލުންދިން މައްސަަލައެއް ބަލަނީ
ހުޅުމާލެ ވަން އެވެނިއުގެ އެޕާޓްމަންޓަކަށް ވަދެ މުދަލަށް ގެއްލުންދިން މައްސަަލައެއް ބަލަމުން އަންނަ ކަމަށް ދިވެހި ފުލުހުންގެ ހިދުމަތުން ބުނެފި އެވެ.
މީސްމީޑިއާގައި ދައުރުވަމުންދާ ޕޯސްޓެއްގައި ބުނެފައި ވަނީ ވަން އެވެނިއުގެ އެޕާޓްމަންޓަކަށް ވަދެ އެޕާޓްމަންޓުގައި ތިބި މީހުންނަށް ބިރުދައްކައި މުދަލަށް ގެއްލުންދީފައި ވަނީ ޒުވާން ފިރެހެނަކާއި އަންހެނެއް ކަމަށެވެ.
މި ދެ މީހުން ވަނީ އެވަގުތު ނިދާފައި ތިބި އުމުރުން 13 އަހަރާ އަދި ފަސް އަހަރު ނުފުރޭ ކުޑަކުއްޖެއް ނަގައި އެ ކުދިން ކުޅެން ގެންގުޅޭ ތަކެތި އުކާލާފައި ކަމަށެވެ. އަދި ކުދިންނާއި މައިންބަފައިންނަށް މަރުގެ އިންޒާރުދީފައިވާ ކަމަށް އެ ޕޯސްޓުގައި ބުނެފައިވެ އެވެ.
މީޑިއާތަކަށް މިއަދު ފޮނުވި މެސެޖެއްގައި ފުލުހުން ބުނީ އެ މައްސަލަ ރިޕޯޓުކޮށްފައި ވަނީ މިއަދު ހެނދުނު 6:32 ހާއިރު ކަމަށެވެ.
ހުޅުމާލެ ވަން އެވެނިއުގެ އެޕާޓްމަންޓަކަށް ވަދެ މުދަލަށް ގެއްލުންދިން މައްސަލަ އާ ގުޅިގެން ބަލަން ޖެހޭ ކަންކަން އެ އިދާރާއިން ބަލަމުން އަންނަ ކަމަށެވެ.
