ހަކުރު ބައްޔަށް ހޭލުންތެރިކުރުމަށް އެސްޓީއޯގެ ހަރަކާތްތަކެއް ހުޅުމާލޭގައި
ހަކުރުބައްޔާއި ދުޅަހެޔޮކަމަށް ހޭލުންތެރިކަން އިތުރު ކުރުމަށް ސްޓޭޓް ޓްރޭޑިން އޯގަނަޒޭޝަން (އެސްޓީއޯ) އިން ޕްރޮގްރާމެއް ކުރިއަށް ގެންދަން ނިންމައިފި އެވެ.
އެސްޓީއޯއިން ބުނީ ބައިނަލްއަގްވާމީ ހަކުރު ބަލީގެ ދުވަސް ފާހަގަކުރުމުގެ ގޮތުން އެސްޓީއޯއިން މެޑިކަލް ސާވިސް އަދި ހުޅުމާލެ ހޮސްޕިޓަލް ގުޅިގެން ހޭލުންތެރިކަން އިތުރު ކުރުމުގެ ހެލްތް ސްކްރީނިން ޕްރޮގްރާމެއް ކުރިއަށް ގެންދިއުމަށް ހަމަޖެހިފައިވަނީ ދެ ބަޔަކަށް ބަހާލައިގެން ކަމަށެވެ.
އެގޮތުން މިއަދު މެންދުރު 13:30 އިން 15:30 އަށް ހުޅުމާލެ ހޮސްޕިޓަލުގައި ހުންނަ އެސްޓީއޯ ފާމަސީ ކުރިމަތީގައި އާންމުންނަށް ހުޅުވާލައިގެން އެ ޕްރޮގްރާމް ކުރިއަށް ގެންދިއުމަށް ހަމަޖެހިފައިވާ ކަމަށް އެސްޓީއޯއިން ބުންޏެވެ.
އެސްޓީއޯއިން ބުނީ އެ ޕްރޮގްރާމްގެ ދެވަނަ ސެޝަން ކުރިއަށް ގެންގޮސްފައިވަނީ މިދިޔަ ބުރާސްފަތި ދުވަހުގަ އެވެ. އެއީ ހުޅުމާލެ ޕޮލިސް ސްޓޭޝަންގެ މުވައްޒަފުންނަށް ކުރިއަށް ގެންދިޔަ ޕްރޮގްރާމެއް ކަމަށް އެސްޓީއޯއިން ބުންޏެވެ.
އެ ޕްރޮގްރާމްގެ ދަށުން އެމީހުންނަށް ދީފައިވާ ހިދުމަތްތަކަކީ ލޭގެ ޕްރެޝާ ޗެކްކުރުމާއި، ބީއެމްއައި ޗެކްކުރުން އަދި ހަކުރު ޗެކްކުރުމަށްފަހު ހެލްތް ގައިޑެންސް ދިނުން ކުރިއަށް ގެންގޮސްފައިވާ ކަމަށް އެސްޓީއޯއިން ފާހަގަކުރެ އެވެ.
އެސްޓީއޯއިން ބުނީ ހަކުރު ޗެކްކުރުމަށްފަހު ދިން ގައިޑެންސްގައި ދިރިއުޅުމަށް ގެންނަންޖެހޭ ތަފާތުތަކާއި، ޑައިޓް ޕްލޭންސްތަކާއި، ކަސްރަތު އަދި އިތުރު ބޭނުންތެރި މައުލޫމާތު ހިއްސާކޮށްފައިވާ ކަމަށެވެ.
އެސްޓީއޯއިން ބުނީ އެ ދުވަސް ފާހަގަކުރުމުގެ ގޮތުން ދެ ކުރިއަށް ގެންދިއުމަށް ހަމަޖެހިފައިވަނީ ޑައިބެޓިކް ޕޭޝަންޓުންނަށް ހާއްސަ ސެޝަނެއް ކަމަށެވެ. އެ ސެޝަންގައި ޑައިބެޓިކް ޕޭޝަންޓުންނަށް ބޭނުންވާ މުހިންމު ސިއްހީ މައުލޫމާތު ދިނުމަށް ވަނީ ހަމަޖެހިފަ އެވެ.
އަދި "އައުކާ ފިޓްނެސް ފެސްޓް" ނަމުގައި އެކްޓިވް ބީޗް ހަރަކާތެއް އިއްޔެގައި ހުޅުމާލޭގައި ކުރިއަށް ގެންގޮސްފައިވާ ކަމަށް އެސްޓީއޯއިން ބުންޏެވެ.
އެ ހަރަކާތުގައި ހުޅުމާލެގައި މަސައްކަތްކުރާ ކޯޕަރޭޓް އޮފީސްތަކުގެ މުވައްޒަފުންގެ ތެރެއިން 100 އަށް ވުރެ ގިނަ މުވައްޒަފުން ބައިވެރިވެފައިވާ ކަމަށް އެސްޓީއޯއިން ބުންޏެވެ.
އެސްޓީއޯއިން ބުނީ ހަރަކާތުގެ މައިގަނޑު މަގްސަދަކީ އެކްޓިވް ލައިފްސްޓައިލް ޕްރޮމޯޓްކޮށް މުއައްސަސާތަކުގެ މެދުގައި އެކުވެރިކަން ބަދަހިކުރުން ކަމަށެވެ.
އެގޮތުން އެކި ޓީމުތަކަށް ބަހާލައިގެން މި ފެސްޓުގައި ބޭއްވުނު އެކްޓިވް ހަރަކާތްތައް ހިންގާފައިވަނީ އެމްއެންޑީއެފް ގެ ބެލުމުގެ ދަށުގައި ކަމަށް އެސްޓީއޯއިން ފާހަގަކުރެ އެވެ.
އެ ފެސްޓްގައި އެސްޓީއޯއިން ވަނީ ވަރަށް ޔޫސާ ފްރެންޑްލީ އަދި ކޮލިޓީ ރަނގަޅު ހަކުރު މޮނިޓާ ކުރާ ޑިވައިސްއެއް ތައާރަފްކޮށްފަ އެވެ.
އެ ޑިވައިސް އަކީ ގޭގައި ވެސް ބޭނުންކުރަން ފަސޭހަ، ސްމާޓް ޑިވައިސް އެކެވެ.
އެސްޓީއޯއިން ބުނީ އެ ޑިވައިސް ސްމާޓް ފޯނާއި ކަނެކްޓް ކޮށްލުމަށްފަހު ހަކުރު މޮނިޓަ ކުރުމުން އޮޓޯ އިން ހަކުރު ހުރިވަރު ފޯނުގައި ރައްކާކުރެވޭ ކަމަށެވެ.
އެގޮތަށް ސްޓޯކުރެވޭ މައުލޫމަތުތަކަކީ އަމިއްލައަށް އަދި ޑޮކްޓަރީ ފަރުވާ ހޯއްދަވާއިރު ހަކުރު މެނޭޖްކޮށް މޮނިޓާ ކުރުމަށް ވަރަށް މުހިންމު މައުލޫމާތުތަކެއް ކަމަށް އެސްޓީއޯއިން ފާހަގަކުރެ އެވެ.
އެސްޓީއޯ އިން އަލަށް ތައާރަފް ކުރި ބްލަޑް ގްލޫކޯޒް މޮނިޓަރިން ޑިވައިސް އަކީ ކޮރެޔާގެ ބްރޭންޑެއް ކަމުގައިވާ އެސްޑީ ބަޔޯސެންސާ ބްރޭންޑްގެ ޑިވައިސްއެކެވެ.
