ނެއްލައިދޫގައި ވަގުފް އިމާރާތް އެޅުމުގެ އެއްބަސްވުމެއް

ވަގުފް މަޝްރޫއުގެ ދަށުން ހދ. ނެއްލައިދޫގައި ވަގުފް އިމާރާތް އެޅުމުގެ އެއްބަސްވުމުގައި ސޮއިކޮށްފި އެވެ.

Ads by Hajj Corporation

އެ އެއްބަސްވުމުގައި އިސްލާމިކް މިނިސްޓްރީގެ ފަރާތުން ސޮއިކުރެއްވީ މިނިސްޓަރު ޑރ. މުހައްމަދު ޝަހީމް އަލީ ސައީދު އެވެ. އަދި ނެއްލައިދޫ ކައުންސިލްގެ ފަރާތުން ސޮއިކުރެއްވީ ކައުންސިލްގެ ރައީސް މުހައްމަދު އަލީފް އެވެ.

އިސްލާމީ މިނިސްޓްރީން ކުރިއަށް ގެންދިއުމަށް ހަމަޖެހިފައިވާ ވަގުފް މަޝްރޫއުތަކަކީ ރައީސް ޑރ. މުހައްމަދު މުއިއްޒުގެ މެނިފެސްޓޯގައި ހިމެނޭ ކަމެކެވެ.

އެ އެއްބަސްވުމުގެ ރަސްމިއްޔާތުގައި ވާހަކަދައްކަވަމުން މިނިސްޓަރު ޝަހީމް ވިދާޅުވީ ވަގުފްގެ މަޝްރޫއުތައް އިތުރުކޮށް އޭގެ ނަފާ ކަނޑައެޅޭ ދާއިރާތަކަށް ލިބޭގޮތަށް ފުޅާ ކުރުމަކީ ރައީސްގެ މެނިފެސްޓޯގައި ހިމެނޭ ކަމެއްކަމަށާއި، ނެއްލައިދޫ ކައުންސިލާއިއެކު ވެވުނު އެއްބަސްވުމުގެ ދަށުން އެރަށުގައި ވަގުފް މަޝްރޫއުއެއް ކުރިއަށް ގެންގޮސް އޭގެ ނަފާ ދީނީ ކަންކަމަށް ލިބިގެންދާނެ ކަމަށެވެ.

އޭގެ އިތުރުން ޝަހީމް ވިދާޅުވީ ރަށްރަށުގައި ވަގުފް އިމާރާތްތައް އިތުރު ކުރުމަކީ މިނިސްޓްރީގެ އަމާޒެއް ކަމަށެވެ.

އަދި ނެއްލައިދޫގައި އެ މަޝްރޫއު ކުރިއަށް ގެންދިއުމަށް ނިންމެވީ މިނިސްޓަރީއަށް ލިބުނު ޕްރޮޕޯސަލްތައް ދިރާސާކުރުމަށްފަހު، އެ ޕްރޮޕޯސަލްއަކީ އެންމެ ރަނގަޅު އެއް ޕްރޮޕޯސަލްއަށް ވީތީ ކަމަށް ޝަހީމް ފާހަގަކުރެއްވި އެވެ.

އެ ރަސްމިއްޔާތުގައި ނެއްލައިދޫ ކައުންސިލްގެ ރައީސް އަލީފް ވިދާޅުވީ، އެ މަޝްރޫއުއަކީ ކުރިމަގަށް ކުރެވޭ ރަނގަޅު މަސައްކަތެއް ކަމަށެވެ. އަދި އުއްމީދަކީ މި މަޝްރޫއުގެ ނަފާ ނެއްލައިދޫ އަށާއި މުޅި ރާއްޖެއަށް ވީހާވެސް އަވަހަށް ލިބިގެން ދިއުން ކަމަށް އަލީފް ވިދާޅުވި އެވެ.

ނެއްލައިދޫ ކައުންސިލުން ހުށައަޅާފައިވާ ވަގުފް މަޝްރޫއުއަކީ ލަނޑާ، ކަނޑާއި އަދި ފަރު މަސްވެރިކަމާ ގުޅޭ މަސައްކަތަށް އެ ރަށުން އާންމުންނަށް ކުއްޔަށް ދިނުމަށް، 10 އައުޓްލެޓް އިމާރާތް ކުރުން ކަމަށް ކައުންސިލުން ބުންޏެވެ.

އެ މަޝްރޫއުގެ ދަށުން އަޅާ 10 އައުޓްލެޓް ކުއްޔަށް ދީގެން ލިބޭ ނަފާއިން ރަށުގެ މިސްކިތްތައް މަރާމާތުކުރުމާއި، ދީނީ އިޖުތިމާއީ އެކި މަސައްކަތްތައް ކުރިއަށް ގެންދިއުމަށް މަގު ފަހިވެގެންދާނެކަމަށް ނެއްލައިދޫ ކައުންސިލުން ވަނީ ފާހަގަކޮށްފަ އެވެ.