ރާކަނި ބީޗްގައި މާރާމާރީއެއް، އެކަކު ހައްޔަރަށް
ހުޅުމާލެ ރާކަނި ބީޗު ރެސްޓޯރެންޓުގައި ދެމީހެއްގެ ދެމެދުގައި ހިނގި މާރާމާރީއަކާ ގުޅިގެން މީހަކު ހައްޔަރު ކޮށްފި އެވެ.
އެ މާރާމާރީ ހިނގާ މަންޒަރު ފެންނަ ވީޑިއޯއެއް ސޯޝަލް މީޑިއާގައި ދަނީ ދައުރުވަމުންނެވެ. އެ ވީޑިއޯއިން ފެންނަ ގޮތުން ދެ މީހަކު ހަޓެއް ކައިރީގައި އިށީންދެލައިގެން ތިއްބާ އެ މީހުން ގާތު ދެ މީހަކު ގޮސް ހުއްޓޭ އެވެ.
އެމީހުން ތެރެއިން އެކަކު ގޮސް ހަޓް ކައިރި އިށީންދެގެން އިން މީހަކަށް ގޮނޑިއަކުން ހަމަލާދޭ މަންޒަރު ވީޑިއޯއިން ފެނެ އެވެ. އެއަށް ފަހު ދެ މީހުންގެ ދެމެދު މާރާމާރީ ހިނގާ މަންޒަރު ފެނެ އެވެ.
ފުލުހުން ބުނީ، އެ ސަރަހައްދުގައި މާރާމާރީ ހިނގި މައްސަލައެއް ރިޕޯޓް ކޮށްފައިވަނީ ރޭގެ ވަގުތެއްގައި ކަމަށެވެ.
އަދި އެ މައްސަލައާއި ގުޅިގެން ހައްޔަރު ކޮށްފައިވަނީ ދިވެހި ފިރިހެނެއް ކަމަށް ފުލުހުން ބުންޏެވެ. ފުލުހުން ބުނީ ބަންދުގެ މުއްދަތު ޖަހަން ހުޅުމާލެ މެޖިސްޓްރޭޓް ކޯޓަށް އެމީހާ ހާޒިރުކުރުމުން ޝަރުުތުތަކާއެކު ދޫކޮށްލާފައިވާ ކަމަށެވެ.
ފުލުހުން ބުނީ މި މައްސަލަ އިތުރަށް ތަހުގީގުކުރަމުންދާ ކަމަށެވެ.
