4،000 ފްލެޓުގެ ޓަވަރުތަކުން ވިޔަފާރި ބޭނުންތަކަށް ޖާގަ ދޫކުރަނީ
ހުޅުމާލެ 2 ވަނަ ފިޔަވަހީގައި ތަރައްގީ ކުރަމުން އަންނަ 4،000 ފްލެޓުގެ ޓަވަރުތަކުން ވިޔަފާރި ބޭނުންތަކަށް ޖާގަ ދޫކުރުމުގެ މަސައްކަތް އަންނަ ހަފުތާގައި ފަށާނެ ކަމުގައި ފަހި ދިރިއުޅުން ކޯޕަރޭޝަން (އެފްޑީސީ) އިން ބުނެފި އެވެ.
ސަރުކާރުގެ "ގެދޮރުވެރިޔާ" މަޝްރޫއުގެ ދަށުން 4،000 ފްލެޓު އަޅަން އިންޑިއާގެ ދެ ކުންފުންޏަކާ ހަވާލުކުރީ 2021 ވަނަ އަހަރު އެވެ. އެ މަޝްރޫއުގެ ދަށުން ޖުމްލަ 32 ޓަވަރު އިމާރާތް ކުރާއިރު، އޭގެ ތެރޭގައި ހިމެނޭ "އަމާން އުދަރެސް" ގެ 16 ޓަވަރުގެ މަސައްކަތް ކުރަނީ ކަލްޕަޓަރު ޕްރޮޖެކްޓްސް އިންޓަނޭޝަނަލް ލިމިޓެޑް (ކޭޕީއައިއެލް) އިންނެވެ. "އަމާން ދޯދި" ގެ 16 ޓަވަރު އަޅަނީ ނެޝަނަލް ބިލްޑިންގްސް ކޮންސްޓްރަކްޝަން ކޮމްޕެނީ (އެންބީސީސީ) އިންނެވެ.
އެފްޑީސީގެ މެނޭޖިން ޑިރެކްޓަރު ހަމްދާން ޝަކީލް "ދެން" އަށް ވިދާޅުވީ ވިޔަފާރީގެ ބޭނުންތަކަށް 32 ޓަވަރުން 127 ޖާގަ ދޫކުރާނެ ކަމަށެވެ. ޖާގަތައް 6 ޒޯން ކެޓަގަރީއަށް ބަހާލައިގެން ދޫކުރާއިރު، ފުރަތަމަ ޒޯނުން ކުއްޔަށްދޭ 18 ޖާގައަށް ކުރިމަތިލުމުގެ ފުރުސަތު އަންނަ ހަފުތާގައި ހުޅުވާލާނެ އެވެ.
ކުދި އަދި މެދުފަންތީގެ ވިޔަފާރިތަކަށް ހާއްސަކޮށްގެން ދޫކުރާ މި ޖާގަތަކަކީ 580 - 6،200 އަކަފޫޓާ ދެމެދުގެ ޖާގަތަކެކެވެ. މި ޖާގަތައް ކުއްޔަށް ދޫކުރާނީ އަކަފޫޓެއް 40 އާއި 45 ރުފިޔާގެ މަގުންނެވެ.
ހަމްދާން ވިދާޅުވި ގޮތުގައި ވިޔަފާރިތަކަށް ޖާގަތައް ދޫކުރާނީ ޓަވަރުތަކުގެ ތިރިންނާއި ފުރަތަމަ ފަންގިފިލާއިން ކަމުގަ އެވެ. ޖާގަތައް ދޫކުރާނީ ރީޓެއިލް ފިހާރަތަކާއި ގްރޯސަރީ ސްޓޯރުތަކާއި ސުޕަ މާކެޓުތަކާއި ހައިޕަ މާކެޓު އަދި ފްރެޝް މާކެޓުތަކަށް ކަމުގަ އެވެ. އޭގެ އިތުރުން ކެފޭ އާއި ރެސްޓޯރެންޓްތަކަށާއި ކްލިނިކްތަކާއި އޮފީސްތަކަށް ވެސް ޖާގަ ދޭނެ ކަމުގަ އެވެ.
އެފްޑީސީން ލަފާކޮށްފައިވާ ގޮތުން ޓަވަރުތަކުގައި ގާތްގަނޑަަކަށް 30،000 މީހުންގެ އާބާދީއެއް ދިރިއުޅޭނެ އެވެ. ވުމާ އެކު އެ ސަރަހައްދުގައި މީހުން އާބާދުވުމުގެ ކުރިން އަސާސީ ހިދުމަތްތައް ފޯރުކޮށްދިނުމަކީ އެ ކޯޕަރޭޝަނުގެ އަމާޒެކެވެ. ވިޔަފާރި ބޭނުންތަކަށް ޓަވަރުތަކުން ޖާގަ ދޫކުރަން ފެށުމުގެ މައިގަނޑު ބޭނުމަކީ ވެސް އެއީ ކަމުގައި އެފްޑީސީން ބުނެ އެވެ.
ތިޔަތަން ރައްޔިތުންނަށް ނުދެވުނަސް ތިޔަތަނުން ލާރި ލިބޭނެ ދެން ހުރި ކަންކަން ކުރަންވާނެ