ތިނަދޫ ސިޓީއަކަށް ހެދީ އޮޅުވާލައިގެން ކަމަށް ބުނެ، ދަރަޖަ ބާތިލްކުރަން ކޯޓަށް
ގދ. ތިނަދޫއަށް ސިޓީއެއްގެ ދަރަޖަ ދިނުމަށް މިދިޔަ ސަރުކާރުން ނިންމެވި އިރު، އެ ރަށުގައި 10،000 މީހުން ހަަމަނުވާ ކަމަށް ބުނެ ސިޓީގެ ދަރަޖަ އަތުލުމަށް އެދި، ހައި ކޯޓަށް ދުސްތޫރީ މައްސަލައެއް ހުށަހަޅައިފި އެވެ.
ހައިކޯޓުގެ ރެޖިސްޓްރީން ދައްކާގޮތުން މިދިޔަ ބުރާސްފަތި ދުވަހު އެ މައްސަލަ ރައީސް އޮފީހަށް ހުށަހެޅުއްވީ ރައްދުވާ ގޮތަށް އެންވަޔަރަމެންޓް މިނިސްޓްރީގެ ސްޓޭޓް މިނިސްޓަރު އަދި ގާނޫނީ ވަކީލު މުހައްމަދު ރާގިބު އަހުމަދު އެވެ.
"ދެން" އަށް ލިބިފައިވާ މައްސަލައިގެ ލިޔުމުގައިވާ ގޮތުން މިދިޔަ ސަރުކާރުން ތިނަދޫއަށް ސިޓީއެއްގެ ދަރަޖަ ދިނުމުގައި ރަސްމީ އާބާދީގެ އަސްލަކަށް ބަލާފައިވަނީ އޭރުގެ ތިނަދޫ ކައުންސިލުން ހިއްސާކުރި ލިޔުންތަކެއް ކަމަށް ބުނެފައިވެ އެވެ. އަދި އެ ލިޔުމުގައި 10،150 މީހުން ހަމަކޮށްފައިވަނީ ސައްހަ ނޫން މައުލޫމާތު ހިމަނައިގެން ކަމަށް ބުނެފައިވެ އެވެ.
ކޯޓަށް ހުށަހެޅުނު މައްސަލައިގައި ފާހަގަކޮށްފައިވާ ގޮތުން، 10،000 މީހުން ހަމަކުރުމަށް ތަކުރާރުކޮށް އައިޑީކާޑު ބޭނުންކޮށްފައިވާ ކަމަށާއި، އެވަގުތު މަރުވެފައިވާ 115 މީހުން އާބާދީގައި ހިމަނާފައިވާކަން ފާހަގަ ކޮށްފައިވެ އެވެ. އަދި ޑިޕާޓްމަންޓް އޮފް ނެޝަނަލް ރަޖިސްޓްރޭޝަން (ޑީއެންއާރު)ގެ ރަޖިސްޓްރީ ލިސްޓަށް ބެލުމުން އެ އަދަދު 196 އަށް އަރާކަމަށް ވެސް ބުނެފައިވެ އެވެ.
އިތުރަށް އެ ލިޔުމުގައި ބުނެފައިވާ ގޮތުން ޑީއެންއާރުގެ ރަޖިސްޓްރީ ލިސްޓާއި ކައުންސިލްގެ ލިސްޓު އަޅައިކިޔުމުން ބޮޑު ފަރަގެއް ފާހަގަވާން ހުރި ކަމަށެވެ. އެ ލިޔުމުގައި ބުނެފައިވާ ގޮތުން މި މަހުގެ 17 ވަނަ ދުވަހާއި ހަމައަށް ޑީއެންއާރުގެ ރެޖިސްޓްރީއިން ދައްކާގޮތުން ތިނަދޫގެ އާބާދީ އަކީ 7،924 ކަން ވެސް ފާހަގަ ކޮށްފައިވެ އެވެ.
އެކަންކަން ފާހަގަކޮށް ރާގިބު ހުށަހެޅުއްވި ދުސްތޫރީ މައްސަލާގައި އެދިފައިވަނީ ތިނަދު އަކީ ސިޓީއެއްގެ ގޮތުގައި ކަނޑައެޅި ނިންމުމާއި އެ ނިންމުމާ ގުޅިގެން އަޅާފައިވާ އިދާރީ ހުރިހާ ފިޔަވަޅުތައް ބާތިލު ކުރުމަށެވެ. އެ މައްސަލައާމެދު ހައިކޯޓުން ވަކި ގޮތެއް ނުނިންމާ ކަމަށް އެ ކޯޓުގެ ރެޖިސްޓްރީން ދައްކަ އެވެ.
ލާމަރުކަޒީ ގާނޫނު ބުނާ ގޮތުން ސިޓީއެއްގެ ދަރަޖަ ލިބެނީ ރަށެއްގެ ރަޖިސްޓްރީގައި ވާ އެ ރަށުގެ އާބާދީ މަދުވެގެން 10،000 އިން މައްޗަށް އެރުމުންނެވެ.
ތިނަދޫއަށް ސިޓީއެއްގެ ދަރަޖަ ދިނުމަށް އެދި ތިނަދޫގެ ކައުންސިލުން ލޯކަލް ގަވަމަންޓް އޮތޯރިޓީ (އެލްޖީއޭ) އަށް ސިޓީއެއް ވެސް ފޮނުވާފައިވެ އެވެ.
2022 އަހަރު ކައުންސިލުން، އެލްޖީއޭއަށް ލިޔެކިއުންތައް ފޮނުވުމުން އޭރު އެލްޖީއޭގެ ސީއީއޯ އަފްޝަން ލަތީފް ވަނީ ރަށުގެ ރަޖިސްޓްރޭޝަން އާބާދީ މަދު ނަމަވެސް ރަށުން ހިދުމަތް ހޯދާ މީހުންގެ އާބާދީ 12،000 އަށް އަރާކަމަށް ކައުންސިލާއި ހަވާލާދީ ވިދާޅުވެފަ އެވެ.
Ads by STO
