ފަތުރުވެރިކަމުގެ އެވޯޑު ލިބުނީ ރައީސްގެ ސިޔާސަތުގެ ސަބަބުން: ފައިސަލް
ވޯލްޑް ޓްރެވަލް އެވޯޑްސްގެ "ވޯލްޑް ލީޑިން ޑެސްޓިނޭޝަން އެވޯޑް" އާއި "ވޯލްޑް ލީޑިން ގްރީން ޑެސްޓިނޭޝަން" އެވޯޑު ލިބުނީ، ރައީސް ޑރ. މުހައްމަދު މުއިއްޒު ގެންގުޅުއްވާ ސިޔާސަތުގެ ސަބަބުން ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.
މިއަދު "އެކްސް" ގައި ކުރެއްވި ޕޯސްޓެއްގައި ފައިސަލް ވިދާޅުވީ، އެ އެވޯޑުތައް ރާއްޖެއަށް ލިބުނީ ފަތުރުވެރިކަމުގެ ސިނާއަތް ދެމެހެއްޓެނިވި ގޮތެއްގައި ކުރިއެރުވުމަށް ރައީސް ގެންގުޅުއްވާ ސިޔާސަތުގެ ސަބަބުން ކަމަށެވެ. އަދި ރައީސްގެ ދައުރުގައި އެވޯޑުތައް ލިބުމަކީ ވެސް ފަހުރެއް ކަމަށް ވިދާޅުވި އެވެ.
މި އަހަރުގެ ވޯލްޑް ޓްރެވަލް އެވޯޑްސްގެ ރަސްމިއްޔާތު ބާއްވާފައި ވަނީ ޕޯޗުގަލްގެ މަދީރާގަ އެވެ. ރާއްޖޭގެ ފަރާތުން އެވޯޑާ ހަވާލުވެވަޑައިގެންނެވީ ފައިސަލް އެވެ. މި އެވޯޑު ރާއްޖެއިން ހާސިލުކޮށްފައި ވަނީ 18 ގައުމަކާ ވާދަކޮށްގެންނެވެ.
ފަތުރުވެރިކަމުގެ ދާއިރާއިން ދެވޭ އެންމެ ޝަރަފުވެރި މި އެވޯޑު ރާއްޖެއަށް ލިބުމާ ގުޅިގެން "އެކްސް" ގައި ކުރެއްވި ޕޯސްޓެއްގައި ފައިސަލް ވިދާޅުވީ އެވޯޑު ރާއްޖެއަށް ލިބިފައި ވަނީ އެތައް ބައެއްގެ ބުރަ މަސައްކަތުން ކަމަށެވެ. އެވޯޑާ ހަވާލުވެވަޑައިގަތުމުގެ ފުރުސަތު ލިބިވަޑައިގަތުމަކީ ފަހުރެއް ކަމުގައި ފާހަގަކުރެއްވި އެވެ.
ވޯލްޑް ޓްރެވަލް އެވޯޑްސްއަކީ 1993 ވަނަ އަހަރުން ފެށިގެން ދެމުން އަންނަ އެވޯޑެކެވެ. މި އެވޯޑުތައް ދެމުން އަންނަނީ ސަރަހައްދީ އަދި ދުނިޔޭގެ ފެންވަރުގައި ފާހަގަކުރެވޭ ކެޓަގަރީތަކުންނެވެ. މިއީ ރާއްޖެއަށް ވޯލްޑް ލީޑިން ޑެސްޓިނޭޝަން އެވޯޑު ޖެހިޖެހިގެން ލިބުނު ފަސްވަނަ ފަހަރެވެ.
