ޑްރަގް މައްސަލަ ބޮޑެތި ރަށްތަކުގައި ފުލުހުންގެ އޮޕަރޭޝަންތައް ފަށަނީ
އާބާދީ ބޮޑު ސަރަހައްދުތަކާއި، މަސްތުވާތަކެތީގެ މައްސަލަ ބޮޑު ރަށްތަކުގައި، އެ ފުރުސަތު ހަނިކުރުމުގެ ގޮތުން ފުލުހުންގެ އޮޕަރޭޝަންތަކެއް ހިންގަން ނިންމާފައިވާ ކަމަށް ކޮމިޝަނާ އޮފް ޕޮލިސް (ސީޕީ) އަލީ ޝުޖާއު ވިދާޅުވެއްޖެ އެވެ.
ސީޕީ އެހެން ވިދާޅުވީ، ސަރުކާރަށް މިވީ އެއް އަހަރުގެ ތެރޭގައި ފުލުހުންނަށް ހާސިލްކުރެވުނު ކަންތައްތަކުގެ މައުލޫމާތު ހިއްސާކުރަމުންނެވެ.
މަސްތުވާތަކެތީގެ މައްސަލައަކީ މޫލާފައިވާ މައްސަލައެއްކަން ފާހަގަކުރައްވާ ސީޕީ ވިދާޅުވީ، މަސްތުވާތަކެތީގެ މައްސަލައަށް ދާއިމީ ހައްލު ހޯދުމަށް މަސައްކަތް ކުރާނެ ކަމަށެވެ. އަދި އެކަން ކުރުމަށް ދުވަސްތަކެއް ނަގާނެ ކަމަށް ސީޕީ ވިދާޅުވެފައިވާ ކަމަށް ސަރުކާރުން ހިންގާ "ސަރުކާރު" ނޫސް ގައި ޝާއިއުކުރި ހަބަރެއްގައި ބުންޏެވެ.
"މާލެ އަދި ހުޅުމާލޭގެ އިތުރުން އާބާދީ ބޮޑެތި ހުރިހާ ރަށަކަށްވެސް މަސްތުވާތަކެތީގެ މައްސަލަ ބޮޑެތި ރަށްރަށަށް ވަކިން ހާއްސަ ސަމާލުކަމެއްދީގެން އޮޕަރޭޝަން ޓީމުތަކެއް ހަދައިގެން އަޅުގަނޑުމެން އެކަންކުރާ މީހުންނަށް އެކަން ކުރުމުގެ ފުރުސަތު ހަނިކުރުމަށްޓަކައި ވަރަށް ގިނަ މަސައްކަތްތައް އެބަހުރި. އެ މަސައްކަތްތައް އަޅުގަނޑުމެން ކުރާނަން،" ސީޕީ ވިދާޅުވި އެވެ.
މަސްތުވާތަކެއްޗަކީ ރާއްޖެއަށް ތަފާތު އެކި ގޮތްގޮތަށް އެތެރެކުރާ އެއްޗެއްކަމުން ހޯމް މިނިސްޓްރީ ހިމެނޭހެން އެކުލަވާލާފައިވާ ހޯމް ޓީމުގެ އެކި މުއައްސަސާތަކުން ކުރާ މަސައްކަތަށް ފުލުހުންގެ ފަރާތުން ދޭންޖެހޭ އެއްބާރުލުން ފުރިހަމައަށް ލިބޭނެކަމުގެ ޔަގީންކަން ވެސް ޝުޖާއު ދެއްވި އެވެ.
އެ މައްސަލަ ހައްލުކުރުމަށް މިހާރު ފުލުހުން ކުރަމުންދާ މަސައްކަތް ފާހަގަ ކުރައްވާ ސީޕީ ވިދާޅުވީ، ޑްރަގުގެ ނެޓްވޯކްތަކުގައި ހިމެނޭ މީހުންގެ މައްސަލަ ބަލަނީ ވަރަށް ސީރިއަސް ކަމެއްގެ ގޮތުގައި ދެކިގެން ކަމަށެވެ. އަދި ފާއިތުވި އަހަރުގެ ތެރޭގައި އާއްމުންގެ ރައްކާތެރިކަން ކަށަވަރު ކުރުމަށް، ފުލުހުން ފެންނަ މިންވަރު އިތުރުކޮށްފައިވާ ކަމަށް ވެސް ވިދާޅުވި އެވެ.
މިދިޔަ އަހަރުގެ ނޮވެމްބަރު މަހުން ފެށިގެން މި އަހަރުގެ އޮކްޓޯބަރު މަހުގެ 21 ވަނަ ދުވަހުގެ ނިޔަލަށް 328 މިލިއަން ރުފިޔާގެ މަސްތުވާތަކެތި ފުލުހުން އަތުލައިގެންފައިވެ އެވެ. ޝުޖާއު ވިދާޅުވެފައިވާ ގޮތުން، މަސްތުވާތަކެތީގެ މައްސަލައަށް ހައްލެއް ހޯދުމަށް ކުރަމުންދާ މަސައްކަތުގެ ތެރެއިން 11 މަަސްދުވަހުގެ ތެރޭގައި 177 ކިލޯގެ މަސްތުވާތަކެއްޗާއި 8300 އަށްވުރެ ގިނަ ބަނގުރާ ފުޅި އާއި ދަޅު އަތުލައިގެންފައިވެ އެވެ.
