ރައީސް ޔާމީންގެ އެކައުންޓުތައް ފްރީޒް ކުރުން: ސުޕްރީމް ކޯޓުގެ ފަނޑިޔާރުންގެ ވަރުގަދަ ސުވާލުތަކެއް ދައުލަތަށް!
ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމްގެ ބެންކު އެކައުންޓުތައް ފްރީޒް ކުރުމަށް ކްރިމިނަލް ކޯޓުން ކުރި އަމުރު، ހައި ކޯޓުން ބާތިލުކޮށް އެއެކައުންޓުތައް ދޫކޮށްލުމުން ސުޕްރީމް ކޯޓުގެ ފަނޑިޔާރުންގެ ވަރުގަދަ ސުވާލު ތަކެއް ދައުލަތަށާއި ފުުލުހުންނަށް މިއަދު އަމާޒުކޮށްފިއެވެ.
ރައީސް ޔާމީންގެ ބެންކު އެކައުންޓުތައް ފްރީޒް ކޮށްފައި ވަނިކޮށް، ހައިކޯޓުން ވަނީ ޖިނާއީ އިޖްރާތުގެ ގާނޫނުގައި ބަޔާންކުރާ އިޖްރާތު ފުރިހަމަ ނުކޮށް އެ އަމުރު ނެރެފައިވާ ކަމަށް ބުނެ، މިދިޔަ އަހަރުގެ މާރޗު މަހު އެއަމުރު ބާތިލުކޮށް އެކައުންޓުތައް ދޫކޮށްލާފައެވެ.
އެމައްސަލަ ދައުލަތުން ސުޕްރީމް ކޯޓުގައި ވަނީ އިސްތިއުނާފު ކޮށްފައިވާއިރު މިއަދު ބޭއްވި އަޑުއެހުމުގައި އެކޯޓުގެ ފަނޑިޔާރުންގެ ބެންޗުން ދައުލަތަށް ސުވާލުތައް އެންމެ ބޮޑަށް އަމާޒުވީ ޔާމީންގެ ހުރިހާ އެކައުންޓްތަކެއް ފްރީޒް ކުރުމުންނެވެ.
އެމައްސަލަ ބައްލަވާ ބެންޗުގެ ރިޔާސަތު ބަލަހައްޓަވާ ފަނޑިޔާރު ހުސްނުއްސުއޫދު ސުވާލު ކުރައްވާ ވިދާޅުވީ، ތުހުމަތު ކުރެވެނީ އެއް މިލިއަން ޑޮލަރުގެ މައްސަލައަކަށް ކަމަށް ވާއިރު، މުޅި މިލްކިއްޔާތު އެއްކޮށް ފްރީޒް ކުރުމުގެ އަމުރަކަށް އެދެވިދާނެ ކަމަށް ގަބޫލު ކުރެވޭތޯއެވެ. ޖަވާބުގައި ދައުލަތުން ބުނީ އެގޮތަށް އެދެވިދާނެ ކަމަށެވެ. ސަބަބެއްގެ ގޮތުގައި ދައުލަތުން ބުނެފައިވަނީ މަނީ ލޯންޑްރިންގެ ގާނޫނުގައި ލޯންޑަކުރާ މުދަލާއި ފައިސާ އާއި އެއިން ހޯދާ މަންފާ ވެސް ދައުލަތަށް ނެގޭނެ ކަމަށް އެ ގާނޫނުގައި ބަޔާން ކުރާތީ ކަމަށެވެ.
ފަނޑިޔާރު ސުއޫދު އިތުރަށް އެއްސެވީ، އެ "އަދަދު އެސަޓައިން ކުރެއްވިންތޯ" އާއި އެއްވެސް ވަރެއްގެ "އައިޑިއާއެއް އޮވެގެންތޯ އަމުރަކަށް އެދިވަޑައިގަތީ؟" އާއި "އަމުރަށް އެދިވަޑައިގަތުމުގެ ކުރިން ކޮން ހޯމްވާކެއްތޯ ހެއްދެވީ؟" އެވެ.
އެމައްސަލަ ތަހުގީގުކުރި ފުލުހަކު ވިދާޅުވީ ހުރިހާ އެކައުންޓްތަކެއް ފްރީޒްކުރަން އެދުނީ އެއް މިލިއަން ޑޮލަރާއި ގުޅިގެން ގިނަ މުއާމަލާތްތަކެއް ހިނގާފައިވާ ކަމަށް ފާހަގަ ކުރެވެމުން ކަމަށެވެ.
އަމުރަށް އެދިވަޑަައިގަތް އިރު އެވާހަކަތައް ލިޔުއްވާފައި ނެތީ ކީއްވެތޯ ފަނޑިޔާރު ސުވާލު ކުރެއްވުމުން ފުލުސްމީހާ ވިދާޅުވީ އަމުރަށް އެދުނުއިރު އޭގައި ހިމެނީ އެއް މިލިއަން ޑޮލަރާ ގުޅުންހުރި ކަންކަން އެކަނި ކަމަށެވެ.
ދައުލަތަށް ލިބެންޖެހޭ އަދަދެއް ދެނެގަނެވިފައިވާއިރު އެއަށްވުރެ ބޮޑު އަދަދެއް ފްރީޒް ކުރަން އެދުނީ ކީއްވެތޯ އަނެއްކާވެސް ފަނޑިޔާރު ހުސްނުއްސުއޫދު ސުވާލު ކުރެއްވުމުން ފުލުސް މީހާ ވިދާޅުވީ އެކައުންޓް ފްރީޒް ކުރުމުގެ ކޯޓު އަމުރަށް އެދުނީ ތަހުގީގުގެ ވަރަށް ކުރީކޮޅު ކަމަށެވެ.
