ފުލުހަކަށް އިންޒާރުދިން މީހާއަށް އަނިޔާކުރި ކަމުގެ ޝަކުވާއެއް ނުލިބޭ: ފުލުހުން
މަސްތުގެ ހާލަތުގައި ހުރެ ފުލުހަކަށް އިންޒާރުދީ، ބިރުދައްކައި، ހަޑި ހުތުރު ބަހުން މުއާމަލާތް ކުރި ކަމުގެ ތުހުމަތުގައި ހއ. ހޯރަފުށިން ހައްޔަރުކުރި މީހާ ފުލުހުންގެ ބަންދުގައި ހުރިއިރު އަނިޔާކުރި ކަމުގެ އެއްވެސް ޝަކުވާއެއް މިހާތަނަށް ލިބިފައި ނުވާ ކަމަށް ފުލުހުން ބުނެފި އެވެ.
މީޑިއާތަކަށް ފޮނުވި މެސެޖެއްގައި ފުލުހުން މިއަދު ބުނީ ފުލުހަކަށް އިންޒާރުދިން ކަމުގެ ތުހުމަތުގައި އެ މީހާގެ ހައްޔަރުކޮށްފައި ވަނީ މިދިޔަ ނޮވެމްބަރު މަހުގެ 27 ވަނަ ދުވަހުގެ ރޭގެ ވަގުތެއްގައި ކަމަށެވެ. އެ މައްސަލައިގައި ފުލުހުންގެ ބެލުމުގެ ދަށަށް ގެންގޮސްފައި ވަނީ އުމުރުން 30 އަހަރުގެ ފިރެހެނެކެވެ.
އޭނާގެ ބަންދާ މެދު ގޮތެއް ނިންމުމަށް ނޮވެމްބަރު މަހުގެ 28 ވަނަ ދުވަހު ކޯޓަށް ހާޒިރުކުރުމުން ކޯޓުން ޝަރުތުތަކަކާ އެކު އޭނާ ދޫކޮށްލާފައިވާ ކަމަށް ފުލުހުން ބުންޏެވެ.
"މި މައްސަލަ އާ ގުޅިގެން ހައްޔަރުކުރި މީހާއަށް ފުލުހުންގެ ބަންދުގައި ހުރިއިރު އަނިޔާކުރި ކަމުގެ އެއްވެސް ޝަކުވާއެއް ފުލުހުންނަށް މިހާތަނަށް ލިބިފައެއް ނުވޭ،"
ފުލުހުން ބުނި ގޮތުގައި އެފަދަ ކަމެއްގެ ޝަކުވާ އޮތް ނަމަ އެ އޮންނަ އުސޫލުގެ ތެރެއިން ހުށަހެޅިގެން ބެލުމަކީ އެ ހިދުމަތުން ބާރުއަޅާ ކަމެއް ކަމުގަ އެވެ.
އަދި އެފަދަ ތަހުގީގުތަކަށް އެ ހިދުމަތުން ފުރިހަމަ އެއްބާރުލުން ދޭނެ ކަމަށް ވެސް ފުލުހުން ބުންޏެވެ.
