ގޮނޑި ގެއްލިގެން ވާދަކުރާ މެމްބަރުންނަށް ތާއިދުކުރަން އެމްޑީޕީން ފާސްކޮށްފި
ރައްޔިތުންގެ މަޖިލީހަށް އިންތިހާބުވާ ޕާޓީން ވަކިކުރުމުން މެމްބަރުކަމުގެ ގޮނޑި ގެއްލޭ ގޮތަށް ގާނޫނު އަސާސީއަށް ގެނައި އިސްލާހުތަކާ ގުޅިގެން މެމްބަރެއްގެ ގޮނޑި ގެއްލި އަލުން ވާދަކުރާނަމަ އެ މެމްބަރަކަށް ތާއިދުކުރަން އެމްޑީޕީގެ ގައުމީ މަޖިލީހުން މިރޭ ފާސްކޮށްފި އެވެ.
ކާނިވާ ސަރަހައްދުގައި ކުރިއަށް ދިޔަ އެ ޕާޓީގެ ގައުމީ މަޖިލީހުގެ ބައްދަލުވުމަށް ޕެޓިޝަނަކާއި ގަރާރެއް ހުށަހެޅުނެވެ. ޕެޓިޝަން ހުށަހެޅުއްވީ ކުރީގެ ޑިފެންސް މިނިސްޓަރު، އެމްޑީޕީގެ ގަލޮޅު އުތުރު ދާއިރާގެ ރައީސް މާރިޔާ އަހުމަދު ދީދީ އެވެ. އަދި ގަރާރު ހުށަހެޅުއްވީ އެމްޑީޕީގެ ކޮލަމާފުށި ދާއިރާގެ ރައީސް އަދި ގާނޫނީ ވަކީލު މަހުފޫޒް ސައީދެވެ.
އެ ގަރާރުގައި ބުނެފައިވާ ގޮތުގައި މެމްބަރަކު ވަކިކޮށްގެން ނުވަތަ ވަކިވެގެން އެމްޑީޕީގެ މެމްބަރަކަށްވެ އެ މެންބަރު އަލުން ވާދަކުރާނަމަ އެ މެންބަރަކު އަލުން ރައްޔިތުންގެ މަޖިލީހަށް އިންތިޚާބު ކުރުމަށް އެމްޑީޕީން މަސައްކަތްކޮށްދޭން ޖެހެ އެވެ. އަދި އެގޮތަށް މިރޭ ގައުމީ މަޖިލީހުގެ މެމްބަރުން ވަނީ އިގުރާރުވެ އެ ނިންމުން ފާސްވެސްކޮށްފަ ވެފަ އެވެ.
މަޖިލީހުގެ މެންބަރުން އިންތިހާބުވުމަށްފަހު ސިޔާސީ ޕާޓީ ބަދަލުކޮށްފި ނަމަ ނުވަތަ ޕާޓީން ވަކިކޮށްފި ނަމަ މަޖިލީހުގެ މެންބަރުކަން ގެއްލޭ ގޮތަށް ގާނޫނު އަސާސީއަށް އިސްލާހު ގެންނަން ސަރުކާރުން މަޖިލީހަށް ހުށަހެޅި ބިލު ފާސްކޮށް ތަސްދީގުކުރީ މިދިޔަ މަހުގެ 20 ވަނަ ދުވަހު އެވެ.
އެހެން ނަމަވެސް ކެންދޫ ދާއިރާގެ ކުރީގެ މެންބަރު އަދި ގާނޫނީ ވަކީލު އަލީ ހުސައިން މިިދިޔަ މަހުގެ 24 ވަނަ ދުވަހު ވަނީ ގާނޫނު އަސާސީއަށް ގެނައި އިސްލާހުތައް ބާތިލުކުރަން ސުޕްރީމް ކޯޓަށް މައްސަލަ ހުށަހަޅައިފަ އެވެ. އަދި މިދިޔަ މަހުގެ 28 ވަނަ ދުވަހު ސުޕްރީމް ކޯޓުން ވަނީ އެ މައްސަލަ ބަލައިވެސްގެންފަ އެވެ.
އެހެން ނަމަވެސް އެ މައްސަލައިގެ އަޑުއެހުންތައް ނުފަށައި ސުޕްރީމް ކޯޓު ވަނީ ރިސެސް އަށް ގޮސްފަ އެވެ.
