އަވަށްޓެރިންގެ ސިޔާސީ މަޝްރަހުގެ ސަބަބުން އިންޑިއާ އަށް އަސަރުކުރޭ: ޖައިޝަންކަރު
ރާއްޖޭ ހިމެނޭހެން އިންޑިއާގެ އަވަށްޓެރި ގައުމުތަކުގެ ސިޔާސީ މަޝްރަހު ގޯސްވުމުން، އޭގެ ނޭދެވޭ އަސަރު އިންޑިއާއަށް ކުރާ ކަމަށް އެ ގައުމުގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖައިޝަންކަރު ވިދާޅުވެއްޖެ އެވެ.
ޖައިޝަންކަރު އެހެން ވިދާޅުވީ، އަވައްޓެރި ގައުމުތަކާއެކު އޮންނަ ގުޅުމާއި، ހާލަތާ ގުޅިގެން އިންޑިއާގެ ގާނޫނު ހަދާ މަޖިލީހުގައި އިިދިކޮޅު ކޮންގްރެސްގެ މެމްބަރު މަނީޝް ޓަވާރީ ކުރެއްްވި ސުވާލެއްގެ ޖަވާބުގަ އެވެ.
ރާއްޖެ އަކީ އިންޑިއާ ދެކޮޅަށް "އިންޑިއާ އައުޓް" ކެމްޕޭންކުރި 8 ވަނަ ގައުމުކަން ފާހަގަކުރައްވައި އިންޑިއާއިން ސަރަހައްދީ ނުފޫޒާ މެދު މަނީޝް ސުވާލު އުފައްދެވި އެވެ. އިންޑިއާގެ އަވަށްޓެރި ގައުމުތަކުގެ ތެރެއިން އެއްވެސް ގައުމެއްގެ "އިންޑިއާ ފުރަތަމަ ސިޔާސަތެއް" އޮތްތޯވެސް އެެއްސެވި އެވެ.
އެ ސުވާލަށް ޖަވާބު ދެއްވަމުން ޖައިޝަންކަރު ވިދާޅުވީ، މީގެ ކުރީގެ ސަރުކާރުތަކުން އަވައްޓެރި ގައުމުތަކާއެކު އޮންނަ ގުޅުން ވަރުގަދަކުރަން މަސައްކަތް ނުކުރި ނަމަވެސް، ބޮޑުވަޒީރު ނަރެންދްރަ މޯދީގެ ވެރިކަމުގައި އިންޑިއާއިން އަވަށްޓެރި ގައުމަތަކަށް އިސްކަންދޭ ކަމަށެވެ.
ރާއްޖެއާ ގުޅުންބަދަހި ކުރުމަށް މޯދީގެ ސަރުކާރުން ކުރަމުންދާ މަސައްކަތްތައް ހިއްސާކުރައްވަމުން އޭނާ ވިދާޅުވީ، އައްޑޫ ސިޓީގެ ލިންކް ރޯޑާ، 28 ރަށެއްގައި ފެނާއި ނަރުދަމާގެ ވަސީލަތްތައް ގާއިމްކުރުން ފަދަ ތަރައްގީގެ މަޝްރޫއުތައް ރާއްޖޭގައި ހިންގާފައިވާ ކަމަށެވެ. އެއަށް ފަހު ޖައިޝަންކަރު ވިދާޅުވީ އިންޑިއާއެކޭ އެއްގޮތަށް އަވަށްޓެރި ގައުމުތަކުގައިވެސް ސިޔާސީ ހަލަބޮލިކަން އޮންނަ ކަމަށެވެ.
"އަޅުގަނޑުމެންގެ އަވައްޓެރިންގެ ވެސް ސިޔާސީ ހަލަބޮލިކަން އެބައޮތް. އެމީހުންގެ ގައުމުތަކުގައި ސިޔާސީ ގޮތުން އުސްގަނޑާއި އަޑިގަނޑުތައް ވެސް އެބަހުރި. އެކަމުގެ ސަބަބުން އަޅުގަނޑުމެންނަށް ކޮންމެވެސް ވަރެއްގެ އަސަރުތަކެއް ކުރޭ،" ޖައިޝަންކަރު ވިދާޅުވި އެވެ.
ޖައިޝަންކަރު ވިދާޅުވީ، މުހިންމީ އަވައްޓެރި ގައުމުތަކުގެ ސިޔާސީ ހަލަބޮލިކަމުގެ ތެރެއަށް އިންޑިއާ ނުވަނުން ކަމަށެވެ.
މިދިޔަ އޮގަސްޓް މަހު ޖައިޝަންކަރު ރާއްޖެ ވަޑައިގެން އިންޑިއާއިން ރާއްޖޭގައި ހިންގި ގިނަ މަޝްރޫއުތަކެއް އިފްތިތާހުކޮށްދެއްވި އެވެ. ރާއްޖެ-އިންޑިއާގެ ގުޅުން ހަރުދަނާކުރުމާ ގުޅޭގޮތުން ފުޅާ ދާއިރާއެއްގައި ޖައިޝަންކަރު، ރައީސް ޑރ މުހައްމަދު މުއިއްޒުއާ މަޝްވަރާ ކުރެއްވި އެވެ. އެ ދަތުރުގައި އެމްޑީޕީގެ ލީޑާޝިޕާ ވެސް ޖައިޝަންކަރު ބައްދަލު ކުރެއްވި އެވެ.
އޭގެ ފަހުން ގުޅުން ބަދަހިކުރުމަށް ރައީސް މުއިއްޒު އިންޑިއާ އަށް ރަސްމީ ދަތުރުފުޅެއް ކުރެއްވި އެވެ. އެ ދަތުރުފުޅުގައި ބޮޑު ވަޒީރު މޯދީއާ ބައްދަލުކުރައްވައި ދެ ގައުމުގެ ދެމެދު އޮންނަ ގުޅުން އިތުރު ހަރުފަތަކަށް ގެންދަވަން ބޭނުންވާ ކަމަށް ރައީސް ވިދާޅުވެފައިވެ އެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ އެމްޑީޕީ ސަރުކާރުގައި އެންމެ ގާތް ގުޅުމެއް ބޭއްވީ އިންޑިއާއާ އެވެ. އޭރު އިންޑިއާގެ އެހީގައި އުމްރާނީ ތަރައްގީގެ ބޮޑެތި މަޝްރޫއުތައް ހިންގިއިރު ކޮވިޑް-19 ގެ ބަލިމަޑުކަމުގެ ހާލަތުގައި "ބަޖެޓް ސަޕޯޓް" އެ ގައުމުން ހަމަޖައްސައިދީފައިވެ އެވެ.
