ޕީއެސްއެމް ހަބަރެއްގައި ބޭއަދަބީ މަންޒަރެއް ދެއްކިފައިވާތީ ދެ މުވައްޒަފަކު ސަސްޕެންޑްކޮށްފި
ދައުލަތުގެ މީޑިއާ، ޕީއެސްއެމުން ދެއްކި ސެގްމެންޓެއްގައި ބޭއަދަބީ މަންޒަރުތަކެއް ދެއްކިފައިވާތީ އެ ކުންފުނިން މާފަށް އެދި، ދެ މުވައްޒަފަކު ސަސްޕެންޑްކޮށްފި އެވެ.
ޕީއެސްއެމުން ބޭ އަދަބީ މަންޒަރުތަކެއް ދެއްކިފައިވަނީ އަންގާރާ ދުވަހުގެރޭ 19:00 ގެ އިނގިރޭސި ހަބަރުގަ އެވެ.
އެ ޓީވީ ސްޓޭޝަނުން މިރޭ ނެރުނު ބަޔާނެއްގައި ބުނީ، އެކަމަކީ ކުންފުނީގެ ކޮންޓެންޓް ޕޮލިސީ އާއި އެޑިޓޯރިއަލް ޕޮލިސީ އާއި ހިލާފު ސީރިޔަސް މައްސަލައެއް ކަމަށެވެ.
"މި މައްސަލާގައި ކަންހިނގާދިޔަގޮތް ބެލުމަށްފަހު އިހުމާލުވި ދެ މުވައްޒަފަކު ސަސްޕެންޑްކޮށް، އެ މުވައްޒަފުންގެ މައްސަލަ މިހާރު ވަނީ ކުންފުނީގެ ކަމާބެހޭ ކޮމިޓީއަށް ފޮނުވާ އެ މައްސަލަ ބަލާ ފިޔަވަޅު އަޅަންޖެހޭ ފަރާތްތަކާމެދު އަޅަންޖެހޭ ފިޔަވަޅުތައް އެޅުމަށް ފޮނުވިފައެވެ" ޕީއެސްއެމްގެ ބަޔާނުގައި ބުންޏެވެ.
އެސްއޯޕީތައް އިސްލާހުކޮށް އެފަދަ ކަންކަން ތަކުރާރުނުވާނެ ގޮތަކަށް ކުންފުނީގެ އޮަޕަރޭޝަނަލް ކަންކަން ތަރުތީބުކުރަމުންދާނެ ކަމަށް ޕީއެސްއެމުން ބުންޏެވެ.
ޕީއެސްއެމުން ބޭއަދަބީ މަންޒަރުތަކެއް ދައްކާފައިވާ މައްސަލައެއް ބަލަމުން އަންނައިރު ލައިވްކުރި ޖަލްސާއެއްގައި ގުރުއާނުގެ ބައެއް އުނިކޮށް ދެއްކިފައިވާތީ އެ ކުންފުނިން ވަނީ އަންގާރަ ދުވަހު މާފަށް އެދިފަ އެވެ.
ކޮންޓްރޯލް ރޫމްގައި އެވަގުތު ތިބި މުވައްޒަފުންގެ އިހުމާލުން އެކަން ހިނގާފައިިވާތީ އެ ވަގުތު ޑިއުޓީގައި ތިބި މުވައްޒަފުން ވަޒީފާގެ މަސްއޫލިއްޔަތުން އެކަހެރި ކޮށްފައިވާ ކަމަށް ޕީއެސްއެމުން ބުންޏެވެ.
