އދ. އަތޮޅުގައި އާރުޓީއެލްގެ ހިދުމަތް ފަށަނީ
އދ އަތޮޅުގައި އާރުޓީއެލްގެ ހިދުމަށް ފަށަން ނިންމައިފި އެވެ.
އެ ހިދުމަތް އެ އަތޮޅުގައި ފަށަން ނިންމިކަން ހާމަކުރެއްވީ ރައީސް ޑރ. މުހައްމަދު މުއިއްޒު މިއަދު އދ. އަތޮޅު ކައުންސިލާއެކު ބޭއްވި ބައްދަލުވުމުގެ ތެރެއިން އެވެ.
އެ ބައްދަލުވުމުގައި ރައީސް ވަނީ ދަތުރުފަތުރުގެ ހިދުމަތް ފުޅާކުރުމަށް އާރުޓީއެލްގެ ހިދުމަތް އދ. އަތޮޅުގައި ކުރިއަށް ގެންދިއުމަށް މަސައްކަތް ކުރައްވާކަން ފާހަގަކުރައްވާފަ އެވެ.
ނަމަވެސް އެ ހިދުމަތް އދ. އަތޮޅުގައި ފަށާނީ ސީދާ ކޮން އިރަކުން ކަމެއް ރައީސް ވިދާޅެއް ނުވެ އެވެ.
އާރުޓީއެލްގެ ހިދުމަތް އދ. ގައި އަދި ނުފެށި ނަމަވެސް ލަކުޑި ފެެރީގެ ހިދުމަތް އެ އަތޮޅުގައި ގަވައިދުން ދަނީ ދެމުން ނެވެ.
އާރުޓީއެލްގެ ހިދުމަށް ފެށީ ނިމިގެން ދިޔަ ސަރުކާރުގަ އެވެ.
އެގޮތުން ރާއްޖޭގެ އެންމެ އުތުރުން ހއ. ހދ. އަދި ށ.އަތޮޅުގައި ފެށި އާރުޓީއެލްގެ ހިދުމަތް މިހާރު ވަނީ ނ.، ރ.، ޅ.، ގއ.، ގދ.، އަދި އައްޑޫއާއި ފުވައްމުލަކަށް ވެސް ފުޅާކޮށްފަ އެވެ.
އާާރުޓީއެލްގެ ހިދުމަތް ދިނުމަށް އެމްޓީސީސީން 25 އަށްވުރެ ގިނަ ލޯންޗު ބޭނުންކުރެ އެވެ.
