ޝަކުވާ ބޮޑުވެ މަގުތަކުން ކުންޏާއި ޕެލެޓްތައް ނަގަން އަނެއްކާވެސް އަންގައިފި
މާލެ ސިޓީގައި ދިރިއުޅެމުން އަންނަ އާންމުންނަށާއި ދުއްވާ އުޅަނދުތަކަށް އުނދަގޫވާ ގޮތަށް މަގުތަކާއި ގޯޅިތަކުގައި ހުރި ކުންޏާއި ޕެލެޓްފަދަ ތަކެތި ނަގަން މާލެ ސިޓީ ކައުންސިލުން އަންގައިފި އެވެ.
އެ ކައުންސިލުން މިއަދު ކުރި އިއުލާނެއްގައި ބުނީ، ކުންޏާއި ޕެލެޓްފަދަ ތަކެތި، މަގުތަކާއި އާއްމު ތަންތަނުގައި ގިނަވަމުންދާކަމުގެ ޝަކުވާ އެ ކައުންސިލަށް ލިބެމުންދާ ކަމަށެވެ.
އެހެންވެ، މިހާރު އާއްމުންނަށް އުނދަގޫވާ ގޮތަށް އެފަދަ ތަކެތި ބަހައްޓާފައިވާ ފަރާތްތަކުން އެ ތަކެތި އަންނަ އާދިއްތަ ދުވަހުގެ އިރުއޮއްސި 6 ޖެހުމުގެ ކުރިން ނެގުމަށް ކައުންސިލުން ވަނީ އަންގާފަ އެވެ.
އެއްވެސް ބާވަތެއްގެ ކުންޏެއް މާލެ މަގުމަތީގައި ބެހެއްޓުމަކީ މަނާ ކަމެއް ކަމަށް ކައުންސިލުން ގެޒެޓްކުރި އިއުލާނުގައި ބުނެފައިވެ އެވެ. އަދި މީގެފަހުން ކުންޏާއި މިފަދަ ތަކެތި ބަހައްޓާ ފަރާތްތައް ހޯދައި އެފަދަ ފަރާތްތަކާމެދު ފިޔަވަޅު އަޅާނެ ކަމަށް އެ އިއުލާނުގައި ބުނެފައިވެ އެވެ.
ކައުންސިލުން ވަނީ މާލެ ސަރަހައްދުގެ މަގުމައްޗަކީ ދުއްވާ ތަކެއްޗަށާއި، އެންމެންނަށް ވެސް ހިނގާބިނގާވެއުޅެން ފަސޭހަ، ރައްކާތެރި އަދި ސާފުތާހިރު ތަނަކަށް ހެދުމަށް އާއްމު ފަރާތްތަކުން އެއްބާރުލުން ދިނުމަށް އެދިފަ އެވެ.
މީގެކުރިން ވެސް މަގުތަކުގައި އާއްމުންނަށް އުނދަގޫވާ ގޮތަށް ހުންނަ އެފަދަ ތަކެތި ނެގުމަށް ކައުންސިލުން އަންގަ އެވެ. އަދި ގަވާއިދާ ހިލާފަށް ބަހައްޓާފައި ހުރި ޕެލެޓްތައް ނެގުމުގެ މަސައްކަތް ވެސް އެ ކައުންސިލުން ކުރެ އެވެ.
