ގޯއްޗާ ގުޅޭ ޑިޖިޓަލް ހެކި ފުލުހުންގެ ބެލުމުގެ ދަށަށް
މާލޭ ރަށްވެހިންނަށް ގޯތި ދިނުމަށް ހިންގި "ބިންވެރިޔާ" ސްކީމުގެ ދަށުން ގޯތި ނުލިބޭ ބަޔަކަށް، ގަވާއިދާ ހިލާފަށް ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) އިން ހުޅުމާލެއިން ގޯތިތަކެއް ދިން މައްސަލަ އާ ގުޅިގެން ހައުސިން މިނިސްޓްރީގައި ހުރި ޑިޖިޓަލް ހެކިތައް ފުލުހުންގެ ބެލުމުގެ ދަށަށް ގެންގޮސްފި އެވެ.
ގޯތި ނުލިބޭ ބަޔަކަށް ގޯތި ދިން މައްސަލަ ފެންމަތިވެ، އެ މައްސަލައިގެ ޖިނާއީ ތަހުގީގެއް ފުލުހުން ދަނީ ކުރަމުންނެވެ. ފުލުހުން ބަލަނީ ޑޮކިއުމެންޓުތަކެއް ފޯޖުކުރި މައްސަލަ އެވެ.
ރޭ އިސްކަންދަރު ބިލްޑިންގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން، ސުޕްރިޑަންޓް އޮފް ޕޮލިސް ރަޖުނީ ޝުއައިބު ވިދާޅުވީ، އެ މައްސަލައާ ގުޅުންހުރި ޑިޖިޓަލް ހެކިތައް ފުލުހުންގެ ބެލުމުގެ ދަށަށް ގެންދެވި، ތަހުލީލު ކުރެވެމުންދާ ކަމަށެވެ.
"އެ އިދާރާގައި ހުރި [ހައުސިން މިނިސްޓްރީ] ކަމާ ގުޅޭ ޑިޖިޓަލް ހެކީގެ އިތުރުން ލިޔެކިޔުންތައް ވާނީ ފުލުހުންގެ ބެލުމުގެ ދަށަށް ގެނެވިފައި. ތަހުލީލު ކުރުމުގެ މަސައްކަތް މިހާރު ވަނީ ފެށިފައި،" ރަޖުނީ ވިދާޅުވި އެވެ.
މައްސަލައިގެ ތަހުގީގަށް އެޗްޑީސީއަށް ވަދެ އެތަނުން ކަމާ ގުޅުންހުރި ލިޔެކިޔުންތައް ފުލުހުން ވަނީ ގެންގޮސްފަ އެވެ. އެހެންނަމަވެސް އެ ދެ އިދާރާއިން ގެންދިޔައީ ކޮން ކަމަކާ ގުޅުންހުރި ލިޔެކިޔުންތަކެއް ކަމެއް ހިއްސާކޮށްފައެއް ނުވެ އެވެ.
އެ މައްސަލައާ ގުޅިގެން ހައުސިން މިނިސްޓްރީގެ ފަރާތްތަކާ ބައްދަލުކޮށްފައިވާ ކަމަށާއި، މައްސަލައާ ގުޅުންހުރި 6 ފަރާތަކާ ސުވާލުކޮށް، ލިޔުންތަކާއި އެގްރީމެންޓްތަކުގެ އަސްލު ވެސް ފުލުހުންގެ ބެލުމުގެ ދަށަށް ގެނެވި ތަހުލީލުތައް ފެށިފައިވާ ކަމަށް ވެސް ރަޖުނީ ވިދާޅުވި އެވެ.
އިތުރަށް ރަޖުނީ ވިދާޅުވީ، ހައުސިން މިނިސްޓްރީ އާއި އެޗްޑީސީ އާ ދެމެދު ލިޔެކިޔުންތަކެއް ބަދަލުކުރެވިފައިވާކަން ފާހަގަކުރެވިފައިވާ ކަމަށެވެ. އަދި ވިދާޅުވީ، އެ ލިޔުންތަކާއި، ދެވިފައިވާ ހުއްދަތައް ބާތިލްކުރި ކަމުގެ ލިޔުންތައް ވެސް ބަލައި، ވެރިފައި ކުރުމުގެ މަސައްކަތް މިހާރު ކުރެވެމުންދާ ކަމަށެވެ.
"އޭގެ އިތުރުން މައްސަލައިގައި ހިމެނޭ ލޮޓްތައް ފިޒިކަލީ ބަލައި، އެ ލޮޓްތަކުގައި ކުރެވިފައި ހުރި މަސައްކަތްތައް މިހާރު ވަނީ ފޮޓޯ ނެގިފައި،" ރަޖުނީ ވިދާޅުވި އެވެ.
ސޯޝަލް މިޑީއާގައި ފެންމަތިވި ގޯތީގެ މައްސަލަ ފުލުހުންނަށް ހުށަހެޅުމާ އެކު، އެންމެ ފުރަތަމަ ކަމަކަށް ބެލީ ސޯޝަލް މިޑިއާގައި، ގޯތި ނުލިބޭ މީހަކަށް ގޯތި ލިބުނު ކަމަށް ބުނެ ދައުރުވަމުން ދިޔަ ލިޔުމުގެ ސައްހަކަން ކަށަވަރު ކުރުން ކަމަށް ރޭ ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފް ވިދާޅުވި އެވެ.
އަދި އެކަން ޔަގީންކުރުމަށް ޓަކައި ފުލުހުން އެޗްޑީސީއަށް ޒިޔާރަތްކުރި ކުރުމުން އެ ލިޔުމަކީ އެތަނުގައި ވެސް އޮތް ލިޔުމެއްކަން ޝަރީފް ވިދާޅުވި އެވެ. އެއް ލިޔުމަކީ އެޗްޑީސީގެ މެނޭޖިން ޑިރެކްޓަރު އިބްރާހިމް ފަޒުލް ރަޝީދުގެ ބޭބެ އަދި އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލު ރަޝީދަށް އުސޫލުން ބޭރުން ދިން ބިމުގައި ވަށާ ފާރު ރޭނުމުގެ ހުއްދައަށް އެދިފައިވާ ލިޔުމެވެ.
