ފަޅުވެރިޔާ ހޯދުމުގެ މަސައްކަތް މެދުކަނޑާލައިފި
އައްޑޫން މާލެ ފުރައިގެން ދަތުރު ކުރި ދޯންޏަކުން ރޭ ގެއްލުނު ފަޅުވެރިޔާ ހޯދުމުގެ މަސައްކަތް މެދުކަނޑާލައިފި އެވެ.
ގެއްލިގެން ހޯދީ އައްޑޫ ސިޓީން ފުރައިގެން މާލެ ދަތުރުކުރި ސީމެކްސް ބޯޓުގައި މަސައްކަތްކުރާ ނޭޕާލަށް ނިސްބަތްވާ ފަޅުވެރިއެއް ކަމަށްވާ ރާޖް ކުމާރު އެވެ.
ފުލުހުން ބުނެފައިވާ ގޮތުގައި އެ ބޯޓު އައްޑޫ ސިޓީން އަންގާރަ ދުވަހުގެ ރޭ 11:30 ހާއިރު ފުރިއިރު ރާޖް ކުމާރު ބޯޓުގައި ހުއްޓެވެ. އަދި އެރޭ 1:15 ހާއިރު ކެޕްޓަނާ ވާހަކަ ދެއްކިކަން މިހާތަނަށް ލިބިފައިވާ މައުލޫމާތުން އެނގޭ ކަމަށް ވެސް ބުނެފައިވެ އެވެ.
ފުލުހުން ކުރިން ބުނީ، ރާޖް ކުމާރު ބޯޓުގައި ނެތްކަން އެނގިފައިވަނީ އައްޑޫއާ ފުވައްމުލަކު ސިޓީއާ ދެމެދު ކަނޑުމަތިން ކަމަށެވެ. އަދި އޭރު ބޯޓު އޮތީ ފުވައްމުލަކު ސިޓީއާ 8 މޭލަށް ކައިރިވެފައި ވަނިކޮށް ކަމަށް މައުލޫމާތު ލިބިފައިވާ ކަމަށް ވެސް ފުލުހުން ބުނެފައިވެ އެވެ.
މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މީޑިއާތަކަށް މިއަދު ފޮނުވި މެސެޖެއްގައި ބުނީ، ގެއްލުނު ފަޅުވެރިޔާ ހޯދުމުގެ މަސައްކަތް މެދުކަނޑާލައިފައިވާ ކަމަށެވެ. އަދި އެމީހާ ހޯދުމަށް މިދިޔަ އަންގާރަ އަދި ބުދަ ދުވަހު 304 ނޯޓިކަލް މޭލުގެ ސަރަހައްދެއް ބަލާފައިވާ ކަމަށް ބުންޏެވެ.
އޭގެ އިތުރުން، އިއްޔެ ފުވައްމުލަށް ވަށައިގެން ބަލާފައިވާ ކަމަށް ވެސް ބުނެފައިވެ އެވެ.
އެމްއެންޑީއެފުން އެ ފަޅުވެރިޔާ ހޯދުމުގެ އޮޕަރޭޝަން ކުރިއަށް ގެންގޮސްފައިވަނީ ކަނޑު މަގުންނެވެ. އެ އޮޕަރޭޝަނުގައި ޑްރޯން ބޭނުން ކޮށްފައެއް ނުވެ އެވެ.
ފަޅުވެރިޔާ ހޯދުމުގެ އޮޕަރޭޝަނުގައި ޑްރޯން ބޭނުން ކޮށްފައި ނުވަނީ ކީއްވެތޯ އެހުމުން އެމްއެންޑީއެފްގެ މީޑިއާ އޮފިޝަލް އެ ސުވާލަށް ޖަވާބު ދީފައެއް ނުވެ އެވެ.
